PATHIAN BIA

(The Word of God) #48

Pathian hmai le mi vialte, a nungmi he a thimi he bia a ceihtu ding Khrih Jesuh hmaiah, fak piin kan nawl; cun a rat lainak le a pennak in kan nawl fawn; phung kha chim hna. A caan a rem zongah a rem lo zongah chim hna; al a herh ahcun al hna, chimhhrin a herh ahcun chimhring hna, a nawl in nawl a herh ahcun nawl hna law lungsau thinfual in cawnpiak hna.

Cawnpiaknak a hmaanmi kha mi nih an ngaih duh lo i anmah duhnak tu kha an zulh i anmah theih duhmi chimtu dingah cawnpiaktu an lak hna lai caan kha a phan lai. Biaktak kha an kaltak lai i minung tuanbia tu kha ngaih an duh deuh lai. Sihmanhsehlaw nang cu zeitik caan paoh ah daite le khualu khuataw khak tein um ko; harnak kha in i zuam, Thawngha karhter kha fak piin i zuam law Pathian nih a kan kawhchan rian vialte kha uan ko.

Cathiang hi a dihlakin Pathian thawchuahhnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a hahnemmi a si. Cucaah Pathian rianuantu a simi cu zeizong vialte ah tlamtlingmi a si awk le thilha phun zakip tuah khawh awkah thilthuam tling tein a ngeimi a si awk a si.

Tlik zuamnak ah khan ka tha a dih-umnak in ka chuah cang; a dongh tiang khitkhet in ka tli cang, zumhnak kha fek tein kaa tlaih zungzal. Atu cu teinak laksawng nih khan a ka hngah ko cang; cu laksawng cu ka Bawipa, dinnak Bawi nih, cu Ni i a ka pek laimi dinnak suiluchin cu a si. Keimah lawng cu a ka pekmi ka si lai lo, amah a langh lainak dawtnak in a hngaktu vialte zong kha a pek ve hna lai.