Written by Vanneihtluanga Sep 10, 2009 at 07:37 PM Ka fapa Ryan-a, kum ruk mi chu naupang danglam tak mai

a ni a. Unau pathum an ni a, a u Jordan (8) leh a nau Keegan (3) te inkara mi a ni. Naupang te mah ni se, mi dang hi a ngai pawimawh thei em em mai a. Naupan laia mahni ngaihven lam thil an ngaihven vak hun laia thil thleng satliah angah ka ngai mai a. Mahse, kum li kaltaah khan, tlai khat chu kan nupaa kan hnathawk haw chu, kawngka bulah min lo chang a.Ka nu, ka pa, dollar 70 (Rs 3,300) ka duh!a ti thut mai a. Chu thu chu kan thu sawi tur intanna hi a lo ni ta a ni.Dollar Sawmsarih Dilna Engtin nge mipa naupang kum ruk miin dollar 70 a duh ngawt theih? eng atan nge a hman ang? A tirah chuan fiamthu emaw, tuin emaw an tihder emaw a nih ka ring a.Eng atan maw? Africa-a mite tan mawle! Ta deuh deuh a! Africa a?Niang chu! Tui thianghlim in tur an nei ve lo va, vawiinah kan school-ah min hrilh a. Dollar 70 hi an tuichhunchhuah laihsak theihna turin a tawk tih zirtirtuin min hrilh a lawm. ..chuan, min pe la..? Thil danglam tak a nih avangin inngaihtuah ka mamawh a, chhungkuaa sawiho tham niin ka hria a, Bawihpui, zanriah ei pahin kan sawi dawn nia, tiin ka chhang ta a. Chaw chu kan han ei a, thil awmzia kan han zawt chiang a, Vawiinah zirtirtuin a sawi a lawm. Africa rama retheite chuan tui chhia an in a, an dam lo va, Dollar 70 nei thei ila

chuan, tuichhunchhuah an laihsak ang a, tui thianghlim an in mai dawn a ni. Dollar 70 nei thei ila aw... a ti vawng vawng mai a. Kan ngawi thiap a. A ruk chuan ka fapa thinlunga mi dang puih duhna nasa tak lo piang chu ka chhuang a, ka lawm ru hle a ni. Mahse khawvel hi chuti ngawta chinfel chi a ni lo va, Ryan-a te anga naupang rilru thianghlim awm khawmin an siam a ni lem lo tih ka hria. Canada rama school naupang pawl khat zirlai dollar 70 chu kengin, Africa rama tuichhunchhuah lai turin mi tumah hi an kal tak tak dawn lo tih ka hre bawk. Kum ruk mi chauh a ni. Zirtirtute thusawi chu kan ngai pawimawh thin reng a lawm. Zaninah a mu ang a, naktuk zingah a theihnghilh mai ang tih rilru puin, kan zanriah titi chu ka tihtawpsak ta a. Dan pangngai angin Ryan-a mu tur chu a khum sirah thingthiin a tawngtai a. Bang kila dingin ka thlir reng a. Lalpa, khawngaih takin ka nu leh ka pa leh ka unaute malsawm ang che. Chu lo pawh, Africa rama mi zawng zawngte tan tui thianghlim pe ang che. tia tawngtaiin a mu ta a. A mut dawn chuan a la theihnghilh lo chu a ni phawt mai a... Kan nupain Ryana leh dollar 70 chungchang chu mu chungin kan sawi dun a. Kan fapa hi naupang danglam a ni. Zana a muthilh avangin a theihnghilh hlen hauh lovang. Mahse, Pawisa hi kan pek ringawt chuan engmah a zir chhuak dawn lo. Hlawh chhuak turin kan fuih dawn nia, tih chu ka pasal Mark-a ngaihdan a ni. Kei pawhin tha ka ti

a. Dollar 70 chu a hlawh chhuak zo ta lo a nih pawhin, hna hahthlak thawh hlutzia kan zirtirna remchang a ni dawn a... tiin kan phurpui ru ta viau a ni. Thawh Hlawh Rawh! A tuk zingah chuan, a pa rin ang ngeiin Ryan-a chuan tuichhunchhuah thu chu a rawn thawhchhuahpui leh ta tak tak a. Tichuan, puitling indawt dan dik takin kan nupain kan fapa kum 6 mi chu kan thutpui a. Dollar 70 hi kan pe thei lo che. Mahse I hlawh chhuak thei ang. Tunah hian ni tina i hna thawh thin tura kan duansa chu dawhkan hruk fai leh rem fel te, ui chaw pek te, nangma khum siam te a ni tih i hria a. Hemi bakah hian, hna kan pek belh che ang a, i thawh that dan a zir zelin hlawh i nei ang, i hlawh lak dan tur chu I nuin a ruahmansak ang che tiin a pa chuan a hrilh a. Chumi thu a hriat rualin Ryan-a hmel chu a hlim nghal hle mai a. Chhang bur ruak pakhat hi fridge chungah ka dah a. Bangah chuan chho zawngin ka rin a, ka thil rin chu hmun 35-ah ka thai hrang a. He bur chhungah hian i hlawh chu kan thun zel ang. Rin 35 inkar zel hi dollar 2 entirna a ni. Dollar 2 I hlawh apiangin rin pahnih inkar hi rawngin i chei thei ang, i chei chhuah vek hunah dollar 70 i hlawh dawn tihna a ni, tiin, ka ruahmanna siam chu ka hrilhfiah ta a. Ryan-a chu a phur ta khawp mai a. Tukverh a hrufai a, car dahna garage chhuat a phiat fai a, khaw vawh em em lai pawhin, vur thlipui surin thingtang a len thlakte hi phun miah lovin a thian a. Zirna lamah chuan zirlai thiam thei a ni lova, a vantlang mai a ni a. Chumi thal laia an result a lo chhuah chuan, a hmasa aia tlema a tih that avangin lawmmanah dollar 5 kan pe bawk a. Ama tana hman a tum lo, rang takin fridge chunga bawmah chuan a dah vat mai a ni. Zan tin hian a tawngai tawpnaah Africa rama retheite tan tui thianghlim pe tura Pathian hnenah a dil a theihnghilh ngai lo. Ka mitsir hian ka fapa

nungchang chu ka melh ru reng a. Chhungkaw tana a hnathawh ang zat chu kan thenawm velah leh, a school kalpui mipa naupang, a kum rualpui zinga tumahin an thawk ve lo. Reiloteah a ning ang a, a theihnghilh ang a,tuichhunchhuah hi kan chhungkaw titi a ni lo thuai turah ka ngai a. Mipa naupang kum 6 mi tan dollar 2 hlawh a hautakzia chu hriain a beidawn mai hi ka ring a. Mahse, a ni telin a thawk tamin a thawk thiam tial tial a, a chang phei chuan kan chhungkuaa thawh tur a awm loh veleh, hlawh nei miah lo hian thenawmte tual a va phiahsak thin. A taihmakzia chu miten an hria a. Ka nu chuan pines rah tla hmangin in cheimawina a siam thin a. A inhlawhna pangngai bakah, pines rah tla chhara a pi hnuaiah a inhlawh belhchhah ta deuh deuh a. Thla reilote chhungin Ryan-a chuan ka thil rin inkar chu rawngin a chei chhuak thei dawn tih a chiang ta. Lak thutak a ngai ta tlat. Thutak deuh angin kan nupa hian kan fapa hi kan dawr a. Chhungrilah erawh chuan kan ringhlel a, a zuzi hun kan nghak a, chuvangin engtin chiah nge he dollar 70 hi Africa ramah kan thawn ang tih hi kan lo la ngaihtuah tak tak hauh lo. Kan fapa hian a ti tak tak a, a nu leh pate hian lemchangin kan phurpui mai mai a ni tih ka inhmuchhuak ta a. Thilpek Hlu Tichuan, dollar 70 chu

tu hnenah nge kan pek ang tiin ka ngaihven tan ta a. khawvel puma ram thanglaite tanpuina hna thawhna office-a thawktu pakhat, ka thian Brenda-i chu min ngaihvenpui turin ka sawm a, Ani chuan phur takin Ryan-a project chu a lo buaipui chhunzawm ta a ni. Brenda-i chuan ni hnih khat hnuah min rawn phone a. Ryan-a thil tih chiah chiah bawhzuitu hi Ottawa khawpuiah hian an lo awm reng a lawm. An pawl hming chu WaterCan tih a ni a, Ryan-a hi an puih theih ngei ka ring a ni, tiin min hrilh ta a. Chumi kum April thlaah chuan Brenda-i hovin Ryan-a nen chuan WaterCan office-ah kan kal ta a. Pawisa thir, dollar 70 chu mipa naupang kum 6 mi lek tan chuan rit tham tak mai hi a ni a. Kensak kan tum a, a phal hauh lo! Amah ngeiin WaterCan director Nicole Bosley hnena thlen a tum tlat a, a hnen kan thlen chuan uluk takin an hotunu Nicole-i chu a hmachhawn a. Hei le, dollar sawmsarih panga, ka hlawh chhuah ngat! Khawngaihin Africa rama tuichhunchhuah laihnan min hman sak ang che. Dollar 5 kha a chuang a. Hnathawktute chawchhun lei nan in hmang thei ang! Nicole-i chuan, Ryan, kan lawm e. I thilpek hi a ropui takzet a ni. Mahse, thil pakhat ka hrilh ang che. Dollar 70 hi chu tui

siak chhuah (hand pump) siamna daih chauh a ni a. Tuichhunchhuah tak tak laihna atan chuan dollar sang hnih a ngai a, tiin a hrilhfiah a. Ryan-a chu a phu zawk ngei ang ka ti a. Teuh lo. A pawi hlei nem. Ka inhlawh leh mai ang! Bat Belh Thilpek! Dollar 70 chu kan hlan ang a, thawveng leh lawm takin kan haw mai dawn emaw ka tih laiin, dollar 2,000 ba in kan haw leh ta hnak hnak mai a. Keiin ka huphurh takzet a, a hlawhchhuaktu tur zawk chu a phur em em mai bawk si a! Zanah chuan kan nupain mut hmunah kan sawi dun leh ta a. Dollar 70 hlawh chhuak turin thla 4 a thawk a. Engti kawng mahin dollar 2,000 hi chu a hlawh chhuak tawh lovang, ka ti a, ka fapa chu ka khawngaih si a. WaterCan chawp chuan ka haw hlur tawh mai a. Mark-a chuan, Hlawh chhuah theih a ni tih a zir chhuah hi kan hlawkna a ni. Hei hi a kawng tur a ni ang. Kan tihnual tur a ni lo. Bei leh rawh se, a ti bawk si. Ka fapa hian he chakna leh phurna hi khawiah nge a neih? A tawngtai. Zan tinin tihtakzetin Africa tan a dil tlat a ni. Chuvangin, ka fapa tana tawngtai mai loh chu tih theih dang ka nei bik lo tih ka ngaihtuah chhuak ta a. Lalpa, ka fapa hahzia i hria. Hei aia nasaa hah leh tur hi chuan ka

fapa hi ka phal lo. A rilru tihnat ka duh bawk si lo. Lalpa, khawngaih takin ka fapa hi enkawl la veng ang che, tiin ka tawngtai ve ta ringawt mai a ni. Dan pangngaiin bur chhungah, pawisa nawi kan khawl leh tan ta. Dollar 70 hlawh tura dollar 2 te tea rawnga chei tura rin kha chu a har lo. Dollar 2 te tea 2,000 chena sei rin tur chuan kan bang san zawngin a tlin tawh lo. Mi tan chuan thil naran a ni maithei. A nu tan chuan manganthlak tak a ni. Hriat Kan Hlawh Ta Kan tualchhung chanchinbu Kemptville Advance -ah Brenda chuan Ryan-a chanchin chu a lo chhuah a. Chhiartute chuan an ngaihven ta khawp mai a. Ryan-a burah chuan thawhlawm an rawn thawh belh tan ta. Ryan-a pawh kum sarih a tling ta. Taima tak leh hnual chuang miah lo hian a inhlawh ngat ngat a. Kar tluana a inhlawhn pawhin dollar hnih bak a tling thei bawk si lo. A chang hi chuan a hlawh punsak a, tlintir vat mai hi ka duh a. Mahse ka pasal ngaihdan a ni si lo. Hming Sign Chawl miah lova kum tluana a inhlawh hnu chuan Ottawa Citizen chuan, Ryans Well tih thupuia hmangin a chanchin an rawn chhuah leh a. TV station pakhat hian Ryan-a chanchin hmangin programme an rawn buatsaih leh bawk a. Chutah zet

chuan, Ryan-a kum rualpui naupangho chuan kan fridge chunga Ryan-a bur chhungah thawhlawm an rawn thawh ve tan ta. A tirah pawisa nawi, a rei zel a, pawisa note, a rei leh deuh a WaterCan office lamah chuan cheque a lo thleng tan ta. Cheque pakhat chu Ryan-a hmingin an rawn thawn si. Kan buai ta! Bawihpui, i tih tur chu maw, cheque hnungah hian i hming i sign a ngai a ni, Hming sign maw? Ni e. Puitling angin i hming i sign a ngai a lawm! Cheque chu a en vang vang a, cheque-a pawisa inziak chu hah taka thla thum a thawh pawha a hlawh chhuah zawh loh tur khawpa tam a ni si. Pawisa chu a duh si.. Mahse, puitling ka ni hlei nem! Hming chauh ka la nei a, sign ka la nei lo a lawm! Pawisa hi kan lachhuak thei dawn si lo... a tap ta mai! Bawihpui, puitling i la ni lo tih kan hre vek a maw. Mahse hna ropui tak i thawh avangin miten puitling angah an ngai che a... Mahse sign ka nei lo...! A pa hming sign dan anga thai kawi kual vel ngai lovin, cheque hnunga ama hming a ziah mai chuan Bank chuan an pawm dawn a ni tih ka han hrilhfiah ruala ka fapa hlim hmel chu khawvela thil mawi ka hmuh tawh zawng zawngah hian a la mawi ber awm e. Family Dance! Ryan-a sum tlingkhawm chuan dollar

1,000 a hnaih ta thuak mai. Mahse a leta tam thawhchhuah a la ngai dawn. Ryan-a lah chu a phur zauh zauh mai bawk si. Lawmawm hle mah se, a zirna pawhin a tuar thei dawnin ka hria. A huphurhawmzia kan hre thiam dawn chauh ni berin a lang. Dollar 1,000 a tlin karah vek chuan WaterCan hotunu Nicole-in phone-in min rawn bia a. Susan, chanchin lawmawm kan nei a sin. WaterCan hian Canadian International Development Agency (CIDA) kan thawhpui a. Ryan-a chanchin hi an lo hre ve a. Tichuan, Ryan-a thawhchhuah zat ang zel hi an thawhpui dawn! Tunah hian tuichhunchhuah laih chungchangah CPAR (Canadian Physicians for Aid and Relief) ka be nghal dawn e, a rawn ti ta mai. Chuti a nih chuan, Ryan-an dollar 1,000 a khawl chuan, dollar 1,000 dang chu CIDA-in an tum dawn tihna a ni. Ka fapa hi naupang danglam tak a ni a, a lm hi ka la hmu ngai lo. Chumi thu Ryan-an a hriat chuan, a lawm takzet a, tihtakzetin in chhung dungah chuan a lm kual a, keini nupa tan pawh lawm vanga lam mai loh chu tih theih dang a awm lo. Chumi tum ang reng rengin kan chhungkua kan la lam nasa ngai lo. Kan Tlin Tawh Lo vang! Tichuan, Ryan-a nen, kan nufa-in WaterCan chuan lengah min sawm a. Tlema

pa danglam deuh, sam leh mitmu dum hian Ryan-a chu a rawn pan a. Ka hming chu Gizaw Shibru a ni a, Uganda-a CPAR director ka ni. Tuichhunchhuah min laihsaktu mipa naupang i ni tih ka lo hria a... tiin Ryan-a chu a chibai a. Hemi tum hian mak ti deuh ka nei thar a. Hetianga social woarks-a inhmangte a biak reng reng hian Ryan-a hi a puitling riau mai a ni. Ryan-a chuan Tuichhun-chhuah laihna hmun chu school bulah ni se ka duh. Tichuan school naupangte chuan tui an in ang a, school banah tui an chawi haw ang a, in lamah tui thianghlim in tur an nei thei bawk ang. a ti nghal par par mai a. Kum tluana a lo suangtuah tawh a nih avangin, a mitthlaah chuan tuichhunchhuah awm dan tur te, naupang tana chawi awlsam, tlak theih si loha siam dan turte thlengin rawtna a nei vek mai a. Gizaw-a chuan map entirin tuichhunchhuah laihna lai tur chu an thlang dun ta a ni. Gizaw-a chuan, tuichhunchhuah verhna khawl te chi pawh dollar 25,000 man lai a nih avangin, khawl tha aiah kut tha hmangin laih an tum thu a hrilh a. Tuichhunchhuah verhna khawl chu nei ta ila, khawl pakhatin tuichhunchhuah tamtak kan verh thei dawn tihna a ni maw? Gizaw chu a bu nghat a. Thil awm dan hi ka duh miah lo!

Ryan-a hian Dollar 70 a tuak tawh a, chumi hnuah amah avangin dollar 2,000 tuak chhuah a ni a. Tunah dollar 25,000 an sawi leh ta. Ka fapa hi a thi hrim hrim ang! Ka hlauh ang ngei ngeiin Ryan-a chuan Chuti chu lei verhna khawl man tur tuak leh ila, tichuan tuichhunchhuah tamtak kan nei thei ang a.. a ti leh ta! Dollar 70 kan pek khan dollar 2,000 kan ba hawng a. Tunah dollar 2,000 avangin dollar 25,000 ba bawkin kan haw leh ta. Mite chuan thilpek hi hlimna a ni an ti a. Ka fapa ang hi nei ve sela, hlimna a ni pawh an ti tawh lovang - ka ti a, ka lawm lo a ni! Mahse ka fapa ka hmangaih ang bawkin, a thinlunga thawktu Pathian chu ka zah si, ka sawi ngam si lo. Sum Tuak Dan Dang Mahse, tun tum Ryan-a sum tuak dan chu a dang ta zak mai. A hna pangngai thawh thulh chuang lovin lehkhathawn leh e-mail hmangin beihpui a chhuah ta thung a ni. Tunah chuan, a dil phawt chuan thahnemngai taka thawhlawm thawh duh tur thian tamtak a nei tawh tlat a. Chu mite hnenah chuan lehkha a thawn chhuak tan ta a. Chuti khawpa a beih nasat avang leh a tih tak takna chu a unauten an hmuhpui avangin, phur takin an tanpui a. Lehkhathawn pangngai a nih chuan, ama kut ngeiin a ziak a, enevelope-ah a thun a,

taima takin a nau Keegan-a chuan postage stamp chu a lo liak huh a, a lo bel thlap thlap zel a. Hmun hrang hranga a thusawina hmuna a lem hmanga lantir (presentation) buatsaih lam hna chu a u Jordan-a chuan a lo buatsaihsak bawk a. An unau zingah mai ni tawh lovin, an school lamah te pawh chu chanchin tha chu a darh zel a. An zirna pawl hnih pindanah chuan an zirtirtuin bawm a dawh a, Africa rama tuichhunchhuah laihna tura thawh thei apiangte tan thawh tur a ni tih thu a han sawi rual chuan school naupang chu an phur nghal hle bawk a ni. Mite hian Ryan-a chu thusawi turin an sawm thin a. School banah, homework a tih zawh veleh hian, service club hrang hranga thu sawi turin a chhuajk leh thin a ni. Tum khat chu tv-a interview na-ah, he hna a thawhna kawnga Pathianin a puih dan a sawi a. Pathian hian he leia min dah hian, chhan neiin min dah a. Mahse min dah chhan ti fel vek thei khawpa famkim (perfect) kan ni lo. Tha famkim ni ila, khawvel hi tha lehzuala siam a ngai lo vang. a ti a ni. Chutiang thu chu ka ngaihtuah ve phak lo va, ka lo la ngaihtuah ngai hek lo. Chuvangin, Pathianin chhan neiin ka fapa hi heng thil hi a tihtir a ni tih ka ring nghet ta deuh deuh a ni. Mi

dangte puih hi eng angin nge a ngaih tih an zawt leh a. Pangpar chi ang deuh hi niin ka hria. Thli a lo tleh hian, pangpar chi chu hmun tinah a taidarh thin ang hian midangte puih hi a tul a ni tih thu thehdarh hi ka tum a ni, tiin a sawi. Ka fapa, hmanni lawka mahni hming sign nei lo kha, heti tak maia a puitling chho ta mai hi, keimah ngei hian mak ka ti. Ryan-a Thian Thar Chutia mipui hmaa thu a sawi tam ang zelin tanpuina sum a lo lut tam ta zel a. An zirtirtu pawh chuan an class naupangte leh Angolo Primary zirlaite inkarah pen-pal campaign a buatsaih a. Tum khat chu hlim takin Ryan-a sikul bang chuan lehkha pakhat hi a rawn vai lauh lauh a. Chutiang lehkhathawh a dawn pakhat chu a lo ni a. A rawn thawntu naupang chuan a thiam tawka saptawng uluk hian Africa atangin lehkha a rawn thawn a. Dear Ryan, Ka hming chu Jimmy Akana a ni. Kum riat ka ni. Football khelh nuam ka ti. Kan in chu hnima siam a ni. Canada a nuam em? I thian - Jimmy Akana. Ryan-a chuan mi ropui tak tak lehkha hi a dawng fo tawh a. A thian Jimmy-a lehkha hi chu vawi tamtak a chhiar nawn a, uluk takin a chhanna a ziak a, Jimmy chuan a rawn chhang ve zel a, Angolo leh Kemptville inkarah chuan, a taka la

inhmu ngai reng reng lo chu, tuichhunchhuah vangin an inkawm ngeih ta hle mai a ni. Dilna Dang... January 1999 ah chuan Ryana tuichhunchhuah chuan thingtlang khuaa tui in tur nei lo mi tamtak tan tui in tur a pe ta tih thu kan lo hre ta a. Ryan-a chu a phur hle mai a. Chumi zana a tawngtai hla chu a danglam tan leh ta. Aw Lalpa, Ka thiante veng la, Ka thian Jimmy leh Gizaw phei chu veng lehzual la. Lalpa, engtik niah emaw ka tuichhunchhuah min hmuhtir ang che! Ryan-a hian tawngtaia thil a dil tawh chu pek a la ni zel. A tuichhunchhuah hmuhtir chu kan chhungkua hian kan tlin lo. Mihausa kan ni lo va, Uganda-a tuichhunchhuah pakhat en tur hian, a zinna senso kan tuak chhung tur hi ka han chhut thin a. Ryan-a chu kum 12 a tling hman ang! Chung thu zawng zawng chu ka hrilhfiah a. Uganda hlatzia te, ka retheihzia te... A ngawi vang vang a. Pawi lo! Ka tawngtai vak mai ang! Zan tin hian a mut dawnah tuichhunchhuah bula kal chu Pathian hnenah a ngenin a ngen a ni ber mai. Keini chu min kar miah lo. Pathian lamah a a dil hlauh mai a. A tawpah chuan, nu leh pa kan nih bawk si chuan, Dil tawh suh! kan ti thei bik si lova, Lalpa, Ryan-a Uganda-a a kal theihna senso min ngaihtuahpui

rawh! tiin kan tawngtai a tul ve ta a ni. Mak tak a ni! Kan dilna chu hla taka mi hrang hrang thinglungah Pathianin a thlen kual leh pek dawn emaw kan tih laiin, a virkual hnaivai angreng khawp mai a. Kawngkhar an rawn kik a, kan thenawm Beverly leh Bruce Paynter te nupa an lo lut a, Ryan-a hi a tuichhunchhuah en turin Ugandaah kal ngei sela kan duh a ni! an rawn ti ringawt mai a. Chumi pah chuan an envelope hi min pe a. A chhungah chuan frequent flyers card a awm thlap! Anni nupa hi an eizawnna avangin hmun hrang hrang tlawhin an zin kual thin a. Thawhnaa an thlawh tam avangin lawmmanah thlawhna company-in frequent fliers te tana an phalsak, a thlawna thlawh theihna remchang an siamsak chu, hmang lovin min rawn pe a ni. Ryan-a tawngtaina hi chu a tuan a rangin a thawk chak takzet a ni. Company-in an phalsak zat chu kan han belhkhawm a, kan nufa-a England thlenga kan thlawh theihna daih lai hi a lo ni ta mai a. Tichuan, mi dangin an rawn thawh belh zel a, WaterCanin min pui bawk a, Mark-a leh Ryan a nen, kan pathuma Uganda kan thlena kan let leh na daih chu July 1999 thlaah kan dawng a, kan thawkchhuak ta a ni. A Hmunah Tichuan, Uganda thingtlang kawng bumboh tak maiah hian, Ryan-a, Mark-a

Gizaw Shibru-a leh kei chu pick-up truck hnungah kan chuang a. Ryan-a te khua kan luh dawn chuan zai dual dual thawm hi kan hria a. African ho hian puithuna dan mak engemaw tak an nei ang a, an zai dual dual a nih dawn hi ka ti mai a. Kan kal hnai zel a, ka hre chiang ta, Ryan! Ryan!! Ryan!!! ti ringawtin an au rual a ni. Anmahni pawh kan hmu ta. Kan chuanna pick up truck ding leh veiah chuan intlarin an lo aurual a ni. Ka fapa hming lamin... Ryan-a pawh chuan mak a ti takzet a, Engtin nge ka hming an hriat le? an ti leh ringawt thin a. Gizaw-a chuan nui chungin, Helai khua zawng zawng hian i hming an hria a sin Ryan! Tual laiah kan inher kual a, kan chhuk ta a. School naupangte chuan an uniform dumpawl leh var chu hain min hual a. Ka fapain Angolo Primary School a luh lai chuan kut an beng dur dur mai a. Chu mai a ni lo. Khaw hotu, upate an lo kal a, He lamah Ryan-a lo kal la, I tuichhunchhuah chu rawn en rawh le, an ti a. Tuichhunchhuah chu kan pan a, mawi tak mai hian pangparin an lo chei a. Tuichhunchhuah banga thil inziak chu en turin Ryan-a chu a zuk thingthi a: Ryans Well, Funded by Ryan H tih hi a lo inziak a. Naupang thawm zingah chuan ring deuh lauha Ryan! tih ri

hi kan hria a. A penpal Jimmy kha a lo ni. An inhmuh chuan an inkuah chawt mai a. An pahnih chuan tuichhunchhuah tui siak chhuahna ngul chu an vuan a, an kutphah tikumin tui lo chhuak chu an kutah an dawh a, hlim em em hian an in dun a. Mipui chuan lawm takin kut kan lo beng a. Kan va hlim tehreng em! Miten mi dangte tan thil ropui tak tak an ti thin tih ka hria. Keini chhungkaw rethei takin kan tih ve theih chhun hi tlem teh mah se, thil tha tih eng pawh hi malsawmna a lo ni. Hah taka hnathawh hian lukhawng ropui a nei tih ka fapa hnena ka lo hrilh hlauh hi vannei ka inti a. Hrilh ringawt lova kan nupa nuna entir thei tura hriselna leh dawhtheihna min petu Pathian chungah ka lawm a. Ka fapa kal tlang hian zirlai tamtak ka zir a. Mipa naupang rinna tlawm tak avangin tunah hian Africa leilung ka rap a ni.