Good News From Afar (Proverbs 25:25)

Siyin Region Baptist Association

May 2012
MAY THA May tha sia tate theampo atu in thupi mama khat hi a, ih pianna Nute tungah ih itna, ih lungdamna ih ko/lak thei na hunpha mama khat ahi hi. Pawlpi mintaw ahizong, mimal tungpan ahizong, Nute tungah itna ihlak thei hun hi a, tua bek domngawl kum 70,60,50 val sateng leh Nu theampo tungah lungdamna letsong piakna taw itna ihlak thei hunpha NU NI sia, may 13 ni ahi hi. 27 May 2012 ni sia PENTECOST SUNDAY hi a, Pawlpi simpan limci tak in kivawthei cithu kiza ahiman ki lungdam mama hi. SCC ANNUAL MEETING 1 May 2012 ni-in Limkhai Zo Baptist Church ah Siyin Christian Community (SCC) Annual Meeting nuamtak kivawtthei a, innteak Pawlpi ten neak le dawn liimcitak leangna dothei cithu kiza hi. Siyin Christian Community SCC pan SACC (Siyin Association for Christian Communication) sia SCCEC 2011/02(b) pan hong puaktona bang in kikupna kinei a, Rev.James Nang Khai Secretary, Rev.P.Suangh Cin Pau President, Rev. Lian Khua Hau Advisor, Rev. Lian Cin Nang Assistant Treasurer te in CACC huam, Leitung bup huam a, hi kipawlna taw kisai a omzia teng acing theibel le mipi tel theibel tu sonna hong neizawk ciang kipsakna kinei hi. 2012 kum pan kipan min sia SACC zangh paitu a, thu paizia om bang 2014 Triennial ciang kipsak tu in mipi lungkimna kinei hi. SRBA GS HONGCIA KIK ZO April 25 - 1 May 2012 hunsung Rev.D. Cin Za Dal (GS,SRBA) Malaysia ah Globle Chin Christian Fellowship (GCCF) The 2nd Conference ka apaina pann 9 May 2012 nin cidam tak hong theng kikthei a, thuhoi thu manpha tampi taktaw hongcia cithu kiza hi. Conference ah Election om in GCCF panmun kiteal na zong kinei thei uh hi. Mipui te taw kimu in MSCF ah ni vei hunpi hanthotna zangh thei a, home cell thumvei zangh thei ci thu kiza hi. ANNEAK KHOP PUINA NEITHEI 7 May 2012 (Monday) ni-in SCC-OB teng in U Kam Za Pau te nupa (Australia) te anneak khop puina Chaung Restaurant ah neithei cithu kiza hi. KUM(80)BIRTHDAY VAWTTHEI 12 May 2012 nin Pa Ngo Khua Pau (Limkhai Bungh) in Topa ih ompuina, khansau cidam apiakna tungtawnn ama piankum (80) cin lungdam ko thungetna vawthei a, SRBA-OB tengzongh sam a, uapthei tek cithu kiza a, tua sungah Rev. Cin Za Dal (GS) in Lai thiangtho kammal tungtawn in hanthotna le thapiakna neithei cithu kiza hi. MOTOR LAM KIPUATHAK THEI Kumpi te lampui nataw in Thang-Thuklai Motor lampi azai zaw, anuam zaw tun Set lamzik pui tawn kivawt saan a, mi theampo ki lungdam mama cithu kiza hi. TINTAN KIVAWTTHEI 10-13 May 2012 hun sungteng Leipui Siyin Baptist Church (LSBC) ah Sya Tin Phone lampui nataw Tintan vawtthei a, Pawlpi mite Pathian thu sungah thuthak / thuthuk tampitak zathua ahiman thanga tek mama cithu kiza hi.

2012/03
TINTAN KIVAWTTHEI 15-19 May 2012 hun sungteng Yangon Siyin Baptist Church (YSBC) Myanmar Fellowship lampui ahi, Pr. Ruth Dim Kang lampui in Chaungta ah tintan thanop huaitak vawtthei cithu kiza hi.

CRUSADE KIVAWT 17-20 May 2012 hun sungteng Leipui Siyin Baptist Church (LSBC) ah Women Fellowship te ih lampui nataw Rev. Khuang Lian Thang in, Tintan piakna nei a, tua sungah Pawlpi mite lawptek mama ban ah thanga in mai lamsang zongh ah samkik nuamlai cithhu kiza hi. BD DEGREE TAW HONGCIA Pr. Ngin Lam Cin Thang @ Lamcin s/o Pa Lian Khan (Buanman) in Laithiangtho sang Nagaland, Makokchung, Clark Theological Collage pan kum 3 le lang sin a, Topa nah ngualzawna hongpiaksak in, cidam tak Buanman a Pawlpi ah hongtheng kik a, Pawlpi bup in a innpi Pa Lian Khan inn pan Lungdam ko thungetna neithei uh a, Nu le Pa te nah ih ngamsung, ih minam sungah hibang khangno pilna sangman hongtam le ci ki kukum tek cithu kiza hi. UNDP TINTAN VAWT Tedim Myone UNDP te lampui nataw in Buanman khua ah S/m Nuam le S/m Mangnu te lampuin 11-12 may 2012 ni (2) hunsung Tintan piakna neithei uh a, Tintan ka mi (27) pha a, maisang khanto natu thu manpha tampitak sinpui uh a, tintan kate lungdam in thanga tek mama cithu kiza hi. E&M SECRETARY KHUALHAW Rev. Langh Go Laang (E&M Secy. SRBA), ZBC Men Fellowship te lampui nataw in ZBC ngam sungah Thado Baptist Associaton (TBA) ah 22-24 May 2012 le Ramsi (Matupi) 24-28 May 2012 hun sungteng Tintan piatu in paithei cithu kiza hi. SCC Games & Sport Committee Kiim le paam ih suapuite kalsuan ziate ih et ciang ei zong Games & Sport Committee khat neitu thukimna kinei a, a nuai bang Committee 1 May 2012 ni SCC Annual Meeting Limkhai Zo pan kiphuan ci thu kiza hi. President Secretary Treasurer Pa Thawng Hen Pau Thuklai Pa Cin Do Thang Siyin Rev.Ngo Khua Nang SDA

aus;&Gmtkyfpk tkyfcsKyfa7;rSL; tm;vkH;

SRBA-OB TE KHUALHAW 25-28 May 2012 hun sungteng Rev.D. Cin Za Dal (GS) Rev. Thang Za Pum (AGS), Rev.James Nang Khai (Treasurer), Pr. Dim Hau Cing (WF Secy.) te Dolluang Siyin Baptist Church le Suangdaw Baptist Church te ah E&M Fundraising le Branch Office II Fund kaikhawm kawm in paithei cithu kiza hi. Anuai abangh in Topa kammal taw thapiakna neithei uh hi. 25.5.2012 Dolluang Rev.D.Cin Za Dal 26.5.2012 Suangdaw Rev.J.Nang Khai 27.5.2012 Suangdaw Rev.Thang Za Pum E&M Fund Branch II Fund 01. Dolluang Ks. 24,000/- Ks.13,000/02. Suangdaw Ks. 72,500/- Ks. 95,000/PRESCHOOL GRADUATION Suangdaw Baptist Church ih lampui nataw a (1) veina Jochebed Preschool Graduation Service sungah SRBA-OB teng (4) in uapthei a, Degree la mi (8 ) pha a, Certificate piakna sia Rev.D. Cin Za Dal, GS in neisakthei cithu kiza hi. LAM KIMAN KIK DEKTAK ZO Khuasak le Buanman khua ki laklaw ningkum nguatui tamleei na tungtawn in lampi nasiatak honglal a, paina cia na hong nuamngawl het ciang khuakim khuapaam te tungah huna kingen a, 25 May 2012 niin Lophei khuapan thu um mite nah hu a, tampitak manpui uh a, hibang in mapang khawmtek leang haingawl kiman paitu citek uh cithu kiza hi. MISSIONARY PAI Theizang Baptist Church, Church Cetenary teptee na in Missionary tu in Pr. L.Cing Khawm Dim Monyu ah Mission nasep kipan tun 28 May 2012 ni-in Theizang a Pawlpi pann kuankhia cithu kiza hi. TINTAN THANOP HUAI 14-17 May 2012 hun sungteng Theizang AG Church ah Rev. Ngo Khan Thang ( Salvation ), Evan. Thian Cin Thang ( Hamsiatna ), Rev. Thang Do ( Speaker ) cibangh in Tintan le biakpiakna thanop huaitak vawtthei a, Pawlpi mite lungdam in thanga tek mama cithhu kiza hi. Capt.A.Khup Za Thang Honourary piak natu vai Capt.A.Khup Za Thang Honourary piak nopna vai {Zo Suanh Khang simna Laibu (Genealogy of the Zo (Chin) race of Burma} taw kisai Annual Meeting in Patoaina piaktu thukimna kinei hi. Khangsimna taw kisai Laibu a suaksak zong mi pawl khat om hikale tu ciang dong ih zakbel sia Patoaina piaktu khensatna tungtawn pan {aMu; tungah Patoaina lai at tu} Minam bup kipawlna pan Ks.100,000/- piaktu thukimna kinei a, kul le kisamh bang hong vaantu OB te vaipuak ki aap hi. Tua laipi nuai ah Ngeina la khat Pu Vungh Ko Khai in Patoaina Langui phuaksak tu ci thu kiza hi. Hi patoaina piaktu hun sia EC Meeting Khaikam hun sung piaktu in khensatna kinei a, Minam bup kipawlna bek hi ngawl biakna min taw, Be le phung le innkuan min taw a pia nuamte zong piaksak theitu thukimna kinei ci thu kiza hi. Special Sunday Pawl khat Hong pai tu June tha sung sia Ecology Sunday, Pate ni & Nipi tawp khakbek sia SRBYF nipi ahikom a kuamapo in thanop huai tatak vawttek tawng. Kum sim June tha hong thettu kal kingakla mama a, ih omna mun le ngam Pawlpi tetek pan THINGNO ih suantek tu kingin sa in om tek tawng.

PHONE NEITHAK Rev.D. Cin Za Dal, GS 0943202657 SCCMeeting vawt natu munte Lampui masate ngealnasa tungtawn pan EC & Annual Meeting natu munte 4 April 2011 ni Hiangziing pan (SCC-Tri:2011/10 &11) thukimna sa tungtawn Annual Meeting in kipsakna kinei a, a hunzui lampuite in phawsakna lai paisak kiktu thukimna kinei ci thu kiza hi. EC Meeting 01. 2012 Khaikam 02. 2013 Bekan 03. 2014 LSBC Annual Meeting 01. 2012 Limkhai Zo BC 03. 2013 Voklaak 03. 2014 Thuklai Sizang kipawlna heaktu kilawm pawl khat SBMC = Sizang Burmese Mission Church, USA USSBC = United State Sizang Baptist Church, USA ASWA = Australia Siyin Walfare Association, Ausi SOM = Siyin Organization of Malaysia, Malaysia DSF = Denmark Siyin Fellowship, Denmark SSF = Singapore Siyin Fellowship, Singapore NSI = Nanchuang Sizang Innkuan, Nanchuang LSKU = Leipui Sizang ki Uapna, Leipui TSDP = Tahan Sizang Dongtawk kipawlna, Tahan TSI = Tedim Sizang Innkuan, Tedim KHUAVAK & SCC MAGAZINE 2012 Kum sim ih suasak tawntung Khuavak Magazine & SCC Magazine taw kisai minam atu le ngam atu dei sak nataw Article nong puak tek natu Siyin News pan in kong za sak uh a, vaipuak neite kungah ih puak tek tu hi vak. MOPOAI 01. Tg. Khan Do Dal @ Daltawng s/o Pa Mang Khua Vum Taingen le Lia Niang Khat Cing @ Niangsui d/o Pa Cin Hen Thang te 23 May 2012 ni-in pumkhat sua kiteenna Rev. Dr. Mang Cin Khup a inn Taingen pan neisak hi. 02. Tg. Cin Lam Thang @Thangno s/o Pa Khai Nang (Thingunau) le Lia Vung Khan Ciin @Ciinciin d/o Pa Thawng Za Thang (Buanman) te Buanman S/ m Dim Man Vung te innpi ah Mopoai tha nophuaitak vawt thei hi. 03. Tg. Thang Suan Mung s/o Pa Lam Thian Pau (Thuklai) le Lia Cin Lam Dim d/o Pa Zam Cin Nang (Buanman) te Pa Zam Cin Nang te innpi pann Mopoai thanop huaitak vawtthei hi. MITHI 01. Pa Kam Khai (kum 82) s/o Pu Tuang Khai in a innpi Khuasak pan in 13 May 2012 (Sunday) nin Leitung hong nusia a, 15 May 2012 nin thantanhna Service hun sungah Rev. Thang Za Pum (AGS, SRBA) in henep hanthotna neithei a, Rev.L.Do Cin Pau (Church Pastor)in Leisung apna neithei hi. 02. Nu ------ (kum--) d/o Pa ----- in a innpi Pumva pan 17 May 2012 nin leitung hong nusia a, 18 may 2012 ni thantanh service hun sungah Rev. Thang Za Pum (AGS, SRBA) in henep hanthotna neithei hi. 03. Lia Mang Thian Uap (Tha 1 le ni 10) d/o Pa Zam Cin Thang in a innpi Mualpi pann 20 May 2012 Leitung hong nusia a, 21 May nin thantanh service hun sungah Rev. Ngo Khan Thang in henep hanthotna neithei hi. 04. Nu Niang Za Cing (kum 72) d/o Pu Mang Pum in a innpi Tahan pan 26 May 2012 nitak in Leitung hong nusia a, 28 May 2012 nin Rev. Job Nang Khua Thawng in henep hanthotna neithei hi. 05. Lia------ (Kum--) d/o Pa---- in 28 May 2012 niin Thingunau a innpi pan in Leitung hong nusia a, 29 May 2012 ni-in Rev.----- in henep hanthotna neithei hi.