Sa Komunidad ng Basic Ecclesial Community sa ibat ibang parokya ng ating Diyosesis at sa buong bayan ng Diyos ang pagmamahal at kapayapaan ng ating Diyos ay sumainyo nawa. Sa ika-6 na taunang toldang tipanan at pagbubukas ng buwan ng paghubog, muli tayong nagkakatipon para sariwain ang ating nasimulan na gawain sa pagpapalaganap ng salita ng Diyos at sa pag-buo ng mga munting pamayanan. Sa pagpapatuloy ng pagsasabuhay ng maililiit na pamayanan sa ating Diyosesis, muli tayong hahakbang sa panibagong taon puno ng pagtitiwala at pagmamahal. Sa taong ito, halinat baunin natin sa ating puso ang tawag tungo sa bagong ebanghelisayon o new evangelization habang patuloy nating pinapalamin ang ating pananampalataya sa Taon ng Pananampalataya Annus Fidei sa ating mga mumunting pamayanan. Inaanyayahan tayo na makilahok sa pagsasabuhay ng pananampalataya sa bagong ebanghelisasyon. Ano ang malalim na kahulugan nito?
Sa pagpapalawig ng CBCP, ang Ebanghelisasyon ay
nangangahulugan bilang pagpapalaganap, pagsasalin at pagsasabuhay ng mabuting balita na ibinahagi sa katauhan ng ating Panginoong Hesukristo at ang pagbubukana sa buhay ng tao, lipunan, kultura at kasaysayan sa Katauhan ni Hesukristo at sa kanyang bayan ng Diyos, ang Simbahan. Ang Bagong Ebanghelisasyon tumutugon unat higit sa lahat sa mga tumalikod palayo na miyembro ng simbahan sa hilaga. Tinatatawag tayong mga taga-Asya na tignan muli ang paraan ng pagpapalaganap ng mabuting balita, suriin mabuti at lumingap ng mainam na paraan ng pagpapalawig ng salita ng Diyos sa ating mga kapatid. Inaayayahan tayo isabuhay nang may pagmamahal at kasiyahan ang pananampalatayang ibinigay sa ating ng Panginoong Diyos sa bawat maliliit na simbahan sa ating pamayanan. Inaanyayahan tayo maging liwanag sa ating sarili sa mga tao sa ating pamayanan at simbahan. Inaayayahan tayo maging taga-paghatid ng liwanag ni Kristo sa ibang bansa sa Asya. Sa pagpapatuloy ng ating misyon na maisabuhay ang pananampalataya sa bawat munting simbahan sa
ating Diyosesis, manatili nawang nakasindi ang
liwanag ng buhay ni Kristo sa ating mga puso. Lumaganap pa nawa ang ating mga mumunting simbahan at patuloy na makatagpo ang mga anak ng Diyos ng tahanan. Isang pamayanan na handang mag-paalab sa mga nanlalamig na puso ng ating mga kapatid. At higit sa lahat, patuloy nawa natin isabuhay ng may pagmamahal ang pananampalatayang ibinahagi sa atin ng Panginoong Hesukristo. Ito ang baunin natin sa ating mga puso. Ito ang magpagalaw sa ating mga kamay. Gabayan nawa tayo ng Poong Maykapal ngayon at magpakailanman. Kaisa ng simbahan sa pagpapalaganap ng mabuting balita ng Diyos, Reb. Padre Prospero Tenorio Tagapangulo Komisyon ng Paghubog