BORJA, Mark Vergel B.

BSChE V
PI 100
MATAM-IS NGA KATAPUSAN
Akon mga kasimanwa, maga-abot na ang matam-is nga katapusan,
Mapungko na sa pwesto ang magadala sang iwag sa aton tanan.
Kabay pa nga ini maging umpisa sa paghatag sang seguridad
Sa aton himamatyon nga pinalangga nga komunidad.
Ako isa lang ka ultimo nga manunuway,
Wala sang dako nga bugal kag simple lang akon kalipay.
Indi man ako nahatagan sang tsansa na maging edukado pareho mo
Apang utod, sa tiyempo sang eleksyon, ang gahum ko kasubong sang gahum
mo.
Sa sulod sang malapit tatlo ka-tuig ako nagkabalaka
Sang paglaganap sang makahalalit nga droga,
Nalulong ang mga inosente nga kabataan
Bangud sa baligya ni Toto, nga sang-una ko pa nga abyan.
Halin sang una naging isa man sa akon mga problema,
Kabudlay nga ginahatag sang mga tawo nga oportunista.
Tuway nga binakasan nga kuntani pambakal sud-an,
Nadula, ginbitbit sang wala makilan-an nga kawatan.
Sin-o magakalipat sa panahon sang bagyong Yolanda,
Nga nagdala sang sobra-sobra nga halit sa akon pamilya.
Sa mga panahon na wala kami halos makaon kag matulugan,
Hamili nga bulig halin sa mga yara sa pwesto wala gid mabatyagan.
Maayo pa ang mga bugto namon nga kubos kag mga lain sang rasa,
Sa pagresponde sa amon kinahanglanon wala gid nagpangduwa-duha.
Sa diin ka, pinalangga namon nga sekretarya?
Sa diin ka sa panahon nga kinahanglan ka sang imo mga kasimanwa?
Sa subong nga panahon na naman sang eleksyon,
Respeto man kuntani kung lain sang sa imo ang akon desisyon.
Kay ikaw, siya, kag ako yara sa mga nagakalain-lain nga sitwasyon,
Intsakto kag sala may yara kita sang personal nga interpretasyon.
Pag-umwad sang komunidad indi kapot sang isa ka persona,
Wala sang pagbag-o kung kita tanan magpinaiya-iya.
Utod ko, ginapangayo ko na maghulugay kita abaga
Ululupod kita sa pagbag-o kay ang matam-is nga katapusan yari na.