Si Bulan, Si Bituon Kag Si Adlaw

Ni: Jessica V. Namo

Kang ginpasad kang Makaako ang kalibutan, Ana man gintuga

sanday Bituon, Bulan Kag Adlaw agud magtugro kasanag mapaibabaw
man ukon mapaidalom.
Nangin suod nga mag- abyan ang tatlo tubtub nga nangin hamtong
nga daraga si Bituon kag soltero sanday Bulan kag Adlaw.
Sa padayon nga pagligad kang mga inadlaw, nagadugang ang
kaambong, kapagros kag kaisog ni adlaw samtang si Bulan nagdugang
man ang ana kaambong tungod sa ana manami kag nagahuluy- huloy nga
mata kag kalulu kon mag- istorya. Si Bituon nangin maanyag nga daraga
kag manami magsaot. Ginapaanggid tana nanday Bulan kag Adlaw sa
marahalon nga dyamante sa ana pagki-ay ki-ay. Kag kon imo turukon
halin sa idalom daw ipot- ipot tana nga naga- igpat- igpat sa panganod.
Likum kay Bituon, si Bulan kag si Adlaw nagabatyag kang lain
nga baratyagon tuhoy kana. Ang paghiguma.
Sangka adlaw, samtang nagapahuway huway sanday Bulan kag
Adlaw nag- istoryahanay sanda parti kay Bituon. Bulan, kaanyag gid
kay Bituon noh? Kanami pa kana magsaot, Hambal ni Adlaw kay Bulan.
Huod gani Adlaw. Kanami kana magki-ay- ki-ay. Hayyy. Gusto ko

gid tana mangin sawa Adlaw. Daw hindi ako mabuhi kon hindi ko tana
Makita,sabat ni Bulan. Ano? Hindi takun magpasugot. Gusto ko ako
ang mangin ban ana. Kami ang mas angayan,ngawarus nga sabat ni
Adlaw.
Tungod sa pareho sanda nga hindi magpalupo sa sara kag sara,
nangin rason dya agud mag- initay ang darwa kag wara magsapakanay.
Natalupangdan dya ni Bituon. Ana ginparapitan si Adlaw kag namangkot:
Adlaw, wara kamo gasapakanay ni Bulan haw?
Ah, gaugot ako kana. Kuon na raw-ay kaw kuno kag daw umangumang kaw sige saot nga wara man ti Kanta. Padit man kuno kiwu
mo,binutig ni Adlaw. hmmm.. amo gali? Tingala ko man nga wara
kamo gabugnuhanay,sabat ni Bituon.
Sangka aga, samtang nagasaot si Bituon nagparapit si Bulan kag
nanamyaw: Mayad nga aga Bituon. Bag-o pa gid kadya istilo mo sa
pagsaot bah. Kada adlaw naganami nga naganami ang imo pagsaot.
Hmmmpf. Kuon mo gidlang kay Adlaw padit akon saot, maraw-ay
kag daw umang- umang ka sige saot nga wara ti kanta, nagasungon nga
sabat ni Bituon. Ha? Wara takon kahambal kang amo kara.
Abaw,ginpamalain na gali ako kanimo? Sa matuod- tuod Biruon, gin- ako
ko kay Adlaw nga may baratyagon ako kanimo Hambal ko kana
pamasyaran ko ikaw kag kon ako imo pagasabton, pangasaw- un tikaw
dayon. Pero wara ako maghuna- huna nga pakalainun na ako

kanimu,malawid nga paathag ni Bulan kay Bituon. Nahangyos si Bituon

sa ana nabatian halin kay Bulan.
Ha? Ano hambal mo Bulan?

Hamabal ko, ginahigugma ko ikaw Bituon. Kag kon ako imo pili-on,
pakaslan tikaw dayon, sabat ni Bulan.