Ang buhay natin sa mundo ay makabuluhan Punung-puno ng liksyon, aral at katuruan Kaalamang napulot at ating natutunan Mula pa sa dahon ng ating kapanganakan Sa pagmulat, paglaki at pagpasa-libingan. Mga magulang natin ay nagpasan ng hirap Mailuwal lang sa mundo ang mahal na anak Di matutumbasan ang pagkalinga't paglingap Na kanilang binigay, kaya ang nararapat Sila'y pakamamahalin ng wagas at tapat. Ang pagsunod sa utos at batas sa tahanan Napakahalagang aral na matututunan Pagka't sa paglaki, pagtuntong sa paaralan Sa ating gobyerno at sa buong pamayanan Ang pagiging masunurin ay isang huwaran. Lumayo sa mga masasamang impluwensya Pati sa sugal, alak, sigarilyo at droga Iwasan ang maling gawi, sundin ang konsyensya Ingatan ang dangal, igalang ang kapwa Mag-aral ng mabuti at huwag magpabaya. 'Wag gawin sa iba ang masama para sa'yo Punain ang sarili bago ang ibang tao Iwasan ang mga masasamang biro't Panatilihin ang mabuting pakikitungo Ang paglimot nito ay pag-anyaya ng gulo. Tuklasin ang nilalaman bago ka lumayo H'wag kang maghusga batay sa panlabas na anyo Kagandahan ng kalooban ang s'yang simuno Ito ang basehan sa pagpili ng kasuyo Hindi kislap ng mata kundi tibok ng puso. Sa pag-aasawa naman ay ito ang turo Pag-iisang dibdib, 'wag dali-daling isubo Pagka't mahirap iluwa 'pag ika'y napaso Iyong pakatandaan na ang sugatang puso Matagal maghilom kung pag-ibig ay binigo. Bawat tao'y mayroong kalayaang mangarap Makamit ang ninanais, umahon sa hirap Kahit pa may wikang, "kapalara'y nakatatak", Tayo pa rin ang pipili, tayo ang tatahak Ituloy lang ang paglipad kahit na lumagpak.
Suriin mo ng mabuti ang bawat desisyon
Kapakanan ng iba ay isama sa layon Malusog ang tanim kapag sagana sa dahon Pagpupukpok ng mag-isa ay hindi babaon Kailangan ng karamay sa hampas ng alon. Ang 'di marunong lumingon sa pinanggalingan Ay hindi makararating sa paroroonan Ikaw ay wala ngayon sa iyong kalagayan Kung walang sumuporta at nagsilbing sandalan Kaya't pasasalamat, sa kanila'y ilaan. Kabutihang-loob, asal, at pusong-dalisay Buo at positibong pananaw sa buhay Iyan ang sandata sa pagkamit ng tagumpay Subalit ang pagtindig ay hindi rin titibay Kung marupok ang tiwala sa D'yos na gumabay. Anumang mga pagsubok at hamon sa buhay Magtiwala lang sa Kanya at S'ya ang aakay Tibayan ang pananalig, itiklop ang kamay Kaganapa'y may dahilan at 'wag kang bibitaw Sa likod ng mga ulap, maningning ang araw. Magtanim ng kabutihan at iyon ang bunga Ang wakas ay laging kamag-anak ng simula Ang nagaganap ngayo'y dulot ng naganap na Ang mali'y di maaayos ng isang mali pa Bagkus ito'y gamiting tagamulat ng mata. Kung ang buhay mo'y masaya at makabuluhan Ay iyong mawiwikang tila kahapon lamang Ngunit kung ito'y hungkag at walang kasiyahan Masama ang ugat at puno ng pagdaramdam Magbubuntung-hininga ka't may pagsisisihan. Darating ang araw na malalaglag ang dahon Ang paglisan ay hindi lilihisan ng taon Kaya't maging handang humalik sa Panginoon Mag-iwan ng mabuting gunita sa panahon At ang iyong alabok, ikakalat ng alon.