Gusto ko na mangindulaan.

Indi ko na masarangan.
Ang paghigugmaanay ta nga daw kahoy.
Ang kahoy nga nagabunga sing maayo, maayo nga kahoy.
Apang ang nagabunga sing malain, indi maayo nga kahoy.
Kag ang indi maayo nga kahoy ginapulog.
Ano ta nga sahi sang kahoy?
Pulugon ta bala ini?

Nagahuyhoy ang akon abaga

Kay pamatyag ko daw wala na paglaum
Apang ang akon panimuot sayop
Samtang ara pa kita nagapanguyapot
Aton huna-hunaon kg handurawon
Nga wala sing sablag ang makabalabag sa aton

Ako ang taming sa imo dughan

Nga magapugong sa kasakit
Apang kung kaisa
Ako man ang balasulon sa kapait
Balikawot man
Pero padayon ko panalipdan
Ang akon mga pinamulong
Kay tuod 'to tanan

Ang kahoy nga indi maayo

May paglaum nga magmaayo
Kon kaisa, ginahan-usan lang ka tubo
Ginabakol, ginahanot
Mahimo indi 'ta maayo nga kahoy kon kaisa
Kinahanglan ta lang masakitan
Masakitan sang matam-is nga dapat ta maagihan
Para ang paghigugmaanay ta
Tubtub na sa walay katubtuban.