eCabangeni

Unathi September1
3. eCabangeni

Angenilamakhwenkwe kaSir Langham evathezimyama nabomvu.

Ngokusesikweni ke mfundi aqale ngomhobe wesikolo phambi
kwaloonginginya yamakhwenkwe ebekudala ilindile. Wawusithi xa
uwajongile lamatyendyana ecula ubone ukuba kukho nabazele
ziinyembezi, kubonakala ukuba alungele ukuzijula ijacu.

Usompempe akakhange aphozise maseko, uyimumathile impempe

yakowabo, angenemngqushweni amakhwenkwe. Lalithe gqolo ukuhlasela
iqela lasekhaya, ukanti lona iqela laseMonti livale ngci
linqandamanzengenendlwini. Kuthe kanye kwesosithuba waliqaligwijo
uSokhetye:

Selbornufanewavala, Selbornufanewavala, Selbornufanewavala

Hee- Bholthi vula

Selbornufanewavala, Selbornufanewavala, Selbornufanewavala

Hee-Bholthi vula

Avakele nawo amantombaza awayezimase lomdlalo esitsho encedisa:

.Ufane wavala, ufane wavala, ufane wavala

Hee-Bholthi vula

Tyhini! Nango namadoda engqokola nawo esitsho ngendyondyo:

Vula lo mnyango vul Seblornufanewavala

2
Hayi ifuthe lelogwijo ke mlesi, kwakungathi ooxholovane
bafakwamafutha. Bawunyathela umcephe, betyhoboza besiya ngakhona
oku kweenkabi zeenkomo entsimini. Lo Bholthi kuculwa ngaye mfundi
yayingumdlali obalaseleyo wasecabangeni lasekhohlo, uBongani Bholthi
Gobidolo. Ngelingeni ibhola yafika ecabangeni lasekhohlo. Unkabi
wayibamba itshisa, yapholela ezandleni, walanyaza oku kombane umgama
ongamashumi amathathu eemitha, qakatha qakatha walalemgceni!

Yimpunduuuuuuulu!!!

Kanye emva kokuba izicande kubini iimpondo ibhola, yaqala ke inkathazo

mfundi. Uthe uphela umdlalo wabe uBholthi sele elele amatyeli amahlanu
emgceni. Amanqaku ebhodini, ngamashumi amane kubafana baseQonce,
ukanti iyimbhande yesikhova kumakhwenkwana aseMonti.

Kwaba yilomincili kubaxhasi bebhola yombhoxo besikolo iDale College.

Intswahla wawuyiva ungekaliboni nelobala lombhoxo. Owayengumhambi
wayengafunga athi yirally yamaKomanisi ngenxa yaloomibala. Wawubona
nje ngomngcelele emva komdlalo ukuba bekudibene oomakadebonwa,
ooxholovane, amakhwenkwe amakhulu mfo ndini.

EzaseMonti izithuthi zayikhomba ngentla indlela emva kwaloomdlalo,

ukanti ezaseQonce zona zangena esixekweni. Xa kuyimigcobo kunje
wawusazi ukuba indawo zolonwabo zaseQonce ziyakuzala zime
ngeembhambho, ingakumbi xa iyilempelaveki yokubuya kwamadoda
awayesandula kuba ngabafundi kwiminyaka engaphambili, iRe-union
ngabula maNgesi.
3
Emva kwaloomdlalo abafundi ababezimasile bayibetha yancinci indlela
ukuya emakhaya. Kuthe kungaphelanga neeyure ezingephi abafundi babe
bezalise indawo yolonwabo yodumo yaseQonce, iMans. Kuyacaca ukuba lo
tshe wokuvela emakahaya yayikukutshinthsa nje isinxibo eso sesikolo. Abo
bafundi basuka kwiziphaluka zaseQonce, kooZwelitsha, Bisho, Phakamisa,
Masele, Dimbaza bazikhulula ezozinxibo bazithi khatha kwiitasi zeencwadi.

Dlaaaaaaaala DJ!!!, latsho igezazana sele libambe umqheba walo

lonwabele umculo owawugqumza kunene. Huntshu nto kaGobidolo!
Kwedini kuyacaca ukuba ufuzuyihlo, yatsho into kaNantsi ivuyisana
noBholthi. Bambha naligrangqa kwekwe uthobe unxano, iqhubeke
yatsho le ndoda inika uBholthi ubhelu lomsele. Hayi Bhuti, ndiyabulela,
andiseli mna, uphendule watsho uBholthi esala loo mdiliya. Tyhini!!!
Uphambene yintoni Gobidolo? KuseMans apha kuzoselwa, ucinga
sizokuteketisa? Yenzokwendoda kwedidni, yeka ukuzenza
intombenzima. Akazange anikwe nethuba lokuphinda aphendule
umfana. Hee!! isimanga sento mlesi. Iqhube njalo ingayeki londoda sele
ingathi ifuna ukumtyibela nangezithuko uBholthi ngenxa nje yokwala
utywala ngokungathi wonile. Ubanjalo ke umntu oyindlamanzi
etshatheleyo, mzuzwana mzuzwana wonwabile, kuthi kungephi umbone
elugcwabevu ngumsindo, kudlule nje ithutyana umve sele ehlabela
uWakrazulwa ngenxa yam. Kuthe kuselapho wahlangulwa uBholti
kwesisinyanzelo ngumlingane wakhe osenyongweni uZintle. Ndiyithetha
ke lento yaleMans shlobo sam, uyabona ngoku uphantse ukubethwa nje
ngenxa yegqabi likalonji? Kutheni lento xa sifuna ukuzonwabisa emva

4
komdlalo singayi nokuba kukwaSpur? Umcokovise ngemibuzo
ethontelelanayo njalo uZintle, ezama ukubonisa uBholti lo ubungozi
bokuzonwabisa kwindawo yentselo emncinci, ingakumbi emva komdlalo
wombhoxo. Bavakale bendumzela abahlobo bakaBholthi ngasetafileni
ezele ziintlobo ntlobo zeebhotile zamanzi kaMaqoma Yhini le? Lo mntana
uthi sizakunxila ngabani xa esisa uBholthi ngaapha ezimbhanjeni zehagu?
Thina sifunukonwaba, nokuba silambile, wandumzela ngelitshoyo
uBhesengile. Kaloku njengoko sesivile ngaphambili, ukuvuselwa
kukaBholthi kwakutyisa nje abahlobo bakhe kuba yena engabuphathi.
Kwabonakala ke loomini ukuba umfo omdala akanaye uhayi xa kufikwa
apha kubahlobo bakhe kuba watsho phantsi uZintle.

Yadlula ke lompelaveki ende yokubuya kwamadoda amhla mnene.

Lalingapheli igama likaBongani Bholthi Gobidolo emilonyeni
yalamododa. Kwakucaca nje mhlophe ukuba umfana unekamva
eliqaqambileyo. Bambi babesele beqinisekile ukuba uyakuba ngumdlali
wamaBhoko-bhoko ophambili ngenye imini. Amadoda ayevela
ngakwelentlanzi azama cebo lithile lokuba uBongani aziwe ngamaqela
amakhulu akwelo leNtshona Kapa. Kwathi kungekudala labe igama lakhe
lisemaphepheni abahloli babadlali abaselula.

Zaqengqeleka iinyanga ke uBongani engumdlali obalaseleyo kweliqela

laseDale College. Kwimidlalo elishumi elinesibini wayesele elele emgceni
amatyeli angamashumi amabini anesibhozo. Kwathi xa kanye kusondele
iiholide zobusika zalonyaka, kwavalaka ukuba uBongani uchongwe kwiqela
leBorder labaminyaka ingaphantsi kwamashumi anesibhozo.
5
Kwakungonelanga oko, umqeqeshi weliqela wamonyula njengomdlali
ozakukhokela eliqela kwitumente yoMdibaniso uphela eyayizakubanjwa
kwelikaBhanana. Nalapho unkabi wazibalula ngokubalilangatye ukuya
phantsi kweempondo. Kambe uBholthi wayesele ejongiwe ngabahloli
boompondo zihlanjiwe bamaqela ngamaqela. Lazibula apho ke iqela
leBorder ukuba liphumelele indebe exabisekileyo phakathi kwamaqela eli
loMzantsi liphela. Yathi iphela nje lotumente abe amaphepha ndaba
ezemidlalo engawuvali umlomo ngaye. Usaziwayo wombhali wephepha
ndaba langeCawa into kaXabanisa yatyibela kumqolo wayo welophepha
langeCawa ibalisa ngoBongani, ingasagxilanga kwimpumelelo
yeentshathseli. Tyhini!! nento kaNtunja nayo yayingawuvali umlomo wayo
kwinkqubo kamabona-kude uPhaka ngalomdlali.

Le ndumasi kwacaca ukuba sele izakumphazamisa ke noko uBholthi kuba

izikhululo ngezikhulu zoonomathotholo zazifuna udliwano ndlebe
nalomfana. Yavalwa ngokusesikweni ke lootumente, uBholthi echongwe
njengomdlali obalaseleyo. Akuzange kulalwe ngobo busuku kuba
kwelikaBhanana likhuphintlanzi emanzini nasebusika. Njengesiqhelo
abafana bakhangela iindawo zolonwabo, kwamandi kwanjeya kungekho
zigigaba. Kaloku mfundi apha kwiidolophu ezinkulu iindawo zolonwabo
zinokhuseleko oluqilima. Ababonakala ngathi nje ababambi cwangco
bakhutshwa ngesixhanti ngabagcini bocwangco.

Labuyela iqela lasekhaya nalondebe. Amakhwenke nawo abuyela

kumakhaya ngamakhaya, eQonce, Monti, Komani neziphaluka. Zavulwa
izikolo emva kweholide zobusika, abafundi babuyela esikolweni.
6
Kwathi kungaphelanga looveki yokuvulwa kwezikolo wabe umnxeba
ungena kwi-ofisi yenqununu yesikolo. Ntrrr. Ntrrr. Ntrrr. Ntrrr.
watsho umnxeba kabini kathathu KuseDale ngapha ndingakunceda?
watsho umncedisi ophendulayo. Molweni Mam, nguMnumzanuRobbie
Fleck umqeqeshi weqela laseNtshona Kapa iiStomers, ndingadlanindlebe
nenqununu, ayixakekanga kodwa? bambha kancinane Ufikile
kwiOfisi yenqununu, ndingakunceda? iphendule yatsho inqununu. Ewe
mhlekazi, uncedo lwakho ndingaluvuyela. Mhle, amade ngawetyala,
ndizakuwenza abemafutshane. Injongo yalomnxeba kukuxelela ukuba
sinqwenela ukubona lomdlali uBongani Gobidolo edlalela iqela lethu
kulonyaka uzayo . Wahambisa njalo umqeqeshuFleck, ebeka zonke
izizathu zokufuna lomdlali kweliya lentlanzi, ethembisa kananjalo ukuba
lomdlali uyakuphatheka kakuhle kweliqela. Yaqukunjelwa incoko phakathi
kwenqununu nomqeqeshi uFleck ngelithi kwiveki elandelayo
kuyakudityanwa nabazali bakaBongani, futhi eliqela lizakube liphethe
isivumelwano sengqesho esandleni.

Ngenene lwafika olosuku lokutyikitya isivumelwano sengqesho salomdlali

uphambili. Basuka kwilali yakwaNtonga abazali bakaBongani ngeenqwelo
zangentseni zokuqala ezisingise eQonce. UBongani wavuka ngenjixukuxa
naye kuloomzi wabafundi iJoubert elungiselela loomhla mkhulu
owayekade ephupha ngawo eselityendyana. Indibano leyo yabanjwa
phakathi kwamagosa eqela laseNtshona Kapa, abazali bakaBongani,
kwakunye noBongani ubuqu kanye apho eQonce. Okukhwanqisayo ngale
ndibano kwaba kungabikho kwegqwetha okanye ummeli onobuchule

7
kwizivumelwano zengqesho zabadlali bombhoxo. Igosa leqela layindulula
intlanganiso ngokubulela ubukho babazali. Kowu sibonga ngokuzixhamla
bazali ngalentseni, njengoko nisazi sihleli negolide apha phakathi kwethu,
uBongani unekamva eliqaqambhileyo kwaye amathuba afana nala
anqabile, ingakumbi kubadlali abaneziduko, lahambisa latsho igosa.
Kwelethu icala sele siwuqukumbele umcimbi wamaphepha,
okulindelekileyo kukutyikitywa njee kwesisivumelwano ngabazali njengoko
umfana lo engaphantsi kweminyaka elishumi elinesibhozo. Bambha ke
MamTshawe... Igosa lanikezela esosivumelwano kumama kaBongani kuba
engutitshalakazi, ngethemba lokuba uyakubanalo ufifi. Wasiphendla
isivumelwano uMamTshawe ezama ukufunda konke okulindelekileyo
kuBongani ukuba uthe watyikitya esosivumelwano. Hee MamTshawe,
yintoni le ingaka uyifundayo kulomqulu? Akuvanga ukuba unyana kuthiwe
uzakunikwa etshisiweyo yona imali?.. Yhini le! Akuwathembanga
lamagosa?, udanduluke watsho uyise kaBongani, uGobidolo ubuqu
kucaca ukuba akakholwa koku kufunda kuthatha ithuba elide. Yise
kaBongani, ndifuna nje ukuqiniseka ukuba umntwana akazifaki emgibeni
apha. Ndicela siphume sithethele bucala malunga neminye imigomo
endingayiqondiyo kulomqulu.., watsho ecela uMamTshawe, kodwa
wakha phantsi isitya sigcwele. Bantu bakuthi kanti abafazi banjani ni na?
Masityikitye lamaphepha kuphele uchuku, uBongani uzakuphathwa
kakuhle amkele nangaphezulu kunawe. Kowu, ngokuthobela
nokuhlonipha indoda, wamnika elokugqibela uyise kaBongani
uMamTshawe. Akazange afumane nethuba lokubuza izinto angaziqondiyo

8
kwesisivumelwano. Kulengxoxo mpikiswano uBongani umfo omdala
wayebukele nje, elindele ukuba kuthiwe naye makatyikitye. Eyona nto
yayiphambili kuye yayikukuthabatha umfanekiso xa etykitya njengabadlali
abayindumasi basemazweni. Yaqukunjelwa lo ntlangano onke amaphepha
etyikityiwe.

Kwathi kungaphelanga neyure le amaphepha etyikitiwe, wabe uBongani

sele ewuxhomile umfanekiso waloondibano kwikhasi lakhe likaFacebook,
epapasha ngokuzimanya kwakhe neqela laseNtshona Kapa kunyaka
olandelayo . Hayi ke ukunwenwa kwezondaba uMzantsi Afrika nje uphela,
kaloku lomfana wayenabalandeli abaninzi kwelikhasi lakhe likaFacebook.
Loo mfanekiso wathandwa ngabalandeli abangaphaya kwamawaka
amahlanu.

Saaaaaadlaaaaa!!!, wavakala esitsho uBhesengile ethetha yedwa,

enethemba lokuba ezindaba soze zingabhiyozelwa. Ithemba alibulali
kaloku mfundi. Ngenene iminqweno kaBhesengile yafezeka. Wathi ebuya
uBongani kulondibano babe abahlobo bakhe bemgxagxamisa, bemcenga
ukuba makuyokonwatywa, kwamkelwe ezindaba ngesithethe
ababesiqalile. Baqhwesha ke oonkabi ngobusuku balomhla besiya
njengesiqhelo kulamzi wodumo wolonwabo waseQonce. Akuzange
kubenjengesiqhelo ngobobusuku. Bangena njee ooxholovane bevathe
iihempe zangaphantsi, kanye ezi ziveza ezihlunu zeengalo ngaphandle.
Tyooooooooviiityoooo!!!! Tyooooooooviiityoooo!!! Tyooooo!!! atsho
amadoda ngamakhwelo, Halaaaaala Halaalaa, zalandela iintombi
ziyiyizela. Kaloku zazingundaba mlonyeni ngoku iindaba zikaBongani kwaye
9
wonke ubani wayenemincili. Zathontelana iibhotile kulootafile, ingulowo
emnqwenelela impumelelo uBongani. Ngalemini zatshintsha izinto,
abahlobo bamncenga ukuba athabathe ithamo nje elinye ukubhiyozela
iindaba zalomini. Down! Down! Down!... Down! Down! Down!, bavakala
besithso abahlobo bemkhuthaza. Tyhini! ithamo elinye lajika langamabini,
amabini azala amathathu, amathathu azala amane. Liyinene elithi inkqayi
ingena ngentlontlo. Koze Kuse!!!, wavakala esitsho uBongani. Bathi
buqina obobusuku wabe eludaka, emnyama uBholthi. Nangalemini
wayekhona uZintle, wathi akuwubona lombono wantshingintshingi
ebusweni, kubonakala ukuba akasathandi kwaphela. Kodwa Bhesengile
yintoni le niyenzayo kuBongani, wabuza ekhathazekile uZintle. Hayi
sukaa! Usincede thina ayingomntu wakho uBongwani futhi,
wambhebhetha ngelitshoyo uBhesengile. Kudala ndikubona ukuba
uyandifuna wena!, uzakufundekela ngalaSpur nangoku?, watsho
uBongani, ebhekisa kuZintle evakala ukuba uqhuba amatakane ngenene.
Uyabona! Sokuze uphinde undibone uyandiva? Kodwa uyakuze uthi
ndanditshilo ngababahlobo bakho. Ngabalahlekisi aba Bhesengile,
waqwela esitsho uZintle enyembezana. Kaloku wayemkhathalele ngenene
umhlobo wakhe, exolele nokuya nasezipotsoyini kuba egade ukuba
angakhuthuzwa ngamantombazana. Wagoduka intliziyo yakhe ibuhlungu
ngobobusuku uZintle, futhi wazithembisa ukuba akasoze aphinde
abonakale ezipotsoyini ingakumbi ngoku kusondele ixesha leemviwo
zokuphela konyaka zebanga leshumi. Kwade kwasa ngenene
lamatyendyana ejuxuza, eqhuba ubusuku ngezoobhotile. Uyaboba

10
keBholthi mfo ndini, uncede wemka laaZintle, uzakutsho ubonwe ngoku,
kaloku lamntwana wayekuvalela amathuba, yaqhuba njalo incoko
bebuyela kuloomzi wabafundi. Elo qela labafundi langena ngempumelelo,
linyonyoba kuba laliqhweshe kubusuku obungaphambili.

Lafika ixesha leemviwo zokuphela konyaka. Ngokwesivumelwano

awasityikityayo uBongani kwakunyanzelikile ukuba aliphumelele ibanga
leshumi, kodwa kuba wayengananzanga ngalamhla wotyikityo
lwesivumelwano wayengakwazi oko, wothuswa ngumxeba osuka kunina
osuka kwaNtonga. Bongani, ndiyathemba ukuba uzilungiselele kwaye
ukulungele ukubhala oluviwo, kaloku lonke ikamva lakho lixhomekeke
ekuphumeleleni ezimviwo, watsho uMamTshawe. Andiva mama?,
njani? wabuza uBongani. Ewe kaloku nyana zezinye zezigqibo ezo. Yathi
iphela looncoko lwabe uvalo lubethela phezulu kuBongani. Kaloku unkabi
wayesele ewuyekelele umxakatho ezifundweni ethe phithi ziipotsoyi
kwaye nexesha lonyaka lombhoxo lisele lidlulile. Waqonda lomini ukuba
udinga uncedo ukuze aphumelele, kwaye oloncedo lalungazokuvela
kooBhesengile. Namhlanje wakhumbula umhlobokazi wakhe uZintle kuba
wayesazi indlela awayekrelekrele ngayo. Zabethabethana ingcinga,
ekhumbula laamini wamvisa ubuhlungu ngayo uZintle, kodwa wagqiba
kwelokuba uzakumzama kuba ikamva lakhe lixhomekeke kwezimviwo.
Ngenene uBongani wathumela umyalezo omfutshane kuWhatsapp, ecela
uxolo kwaye ecela noncedo kwezimviwo zokuphela konyaka. Akazange
abenanqala uZintle, walwamkela oloxolo, futhi wathembisa
nangokumncedisa ukuba aphumelele naye kwibanga leshumi. Ngenene

11
kwabanjalo. Zaphuma iziphumo kwiphephandaba iDaily Dispatch
kweyoMqungu kunyaka olandelayo. Ngoncedo lukaZintle, waziphumelela
ezomviwo uBongani, ukanti naye uZintle waphumelela emagqabini, kwaye
wamkelwa kwizifundo zobugqirha kwiYinivesithi yaseKapa (UCT).

Huuntshu! Nyana, uyabona ke yenjenje indoda, ngoku uzakudlala

umbhoxo, urhole imali etshisiweyo ungenexhala lezincwadi
zikulibazisayo, watsho uyise. Hayi tata kaBongani, ngokwesivumelwano
esasityikityayo, kufuneka aqhubeke nezifundo zakhe lo mntwana.., uthe
engekawagqibi lomazwi, Peeewu! Uqalile keMamTshawe nezizinto zakho
zalamqulu. Ndanditheni kuwe?, wamthulisa ngalomazwi uMamTshawe
uyise kaBongani. Lwafika usuku lokuya kwelo lentlanzi. Ngethamsanqa
uZintle naye ngalemini wayesiya eKapa. Abahlobo abadala bahlangana
kwisikhululo seenqwelo ntaka saseMonti. Kungekudala, wayidumisa
umqhubi wenqwelo ntaka injini, yenyuka inqwelo. Kuthe nje emva
kweyure enesiqingatha yangena kwelentlanzi inqwelo moya. Bongani,
uziphathe kakuhle, kusemazweni apha, ungaliphoxi ikhaya lakho, uyayazi
ukuba uMamTshawe ukhathazekile ngawe. Ufunde isivumelwano sakho
sengqesho ngenyameko, wazi omawukwenze. Futhi uMamTshawe uthe
ndikugade wena, ungaphumi emgceni, uZintle wamyala ngalomazwi
uBongani.

Lafika ke ixesha lokuzilolonga kwabadlali, bezilungiselele itumente enkulu

yeSuper 18. Ngokwesithembiso samhla mnene, umqeqeshuCotzee
wamfaka kooxholovane zisuka nje uBongani. Akazange adanise naye umfo
omkhulu. Wawumbona kwalapha ekuzilolongeni ukuba ngumdlali
12
ophambili, nangona wayenemimnyaka elishumi elinethoba kuphela.
Umgama ongamakhulu eemitha wayewugqiba nje ngaphantshi
kwemizuzwana elithoba, ephakamisa neentsimbi ezubunzima
obungamashumi asibhozo eekhilogram mihla le. Kwathi kufika ithuba
lomdlalo wokuqala weSuper 18 wabe uBongani ekulungele ukungena
eqeleni elalizakuqubisana nooKrebe bakwelikaBhanana. Wawuqala
loomdlalo, ingumdlalo wakhe wokuqala evathe imibala yeli leNtshona
Kapa. Wamkelwa ngezishushu zona izandla kwelobala iNewlands Stadium,
sele esaziwa kuba wayekhokela iqela beBorder kunyaka odlulileyo.
Iintatheli zaziwujonge ngamehlo abamvu lomdlalo wokuqala kaBongani,
belindele ukubona ukuba uyakumelana na noxinzelelo lokuqala umdlalo
okwizinga eliphezulu kangaka. Iingongoma zamaphepha ndaba
zalooMgqibelo zazizalise esosixeko saseKapa, Bolt to Thunder against
Sharks on debut, Bolt to strike against Sharks njalo njalo. Inene
ngalooveki yandulela umdlalo wakhe wokuqala uBongani, igama lakhe
lalingapheli kumaphepha ndaba, koonomathotholo nakoomabona kude.

Ngenene wafika loomhlamkhulu womdlao wokuqala kaBongani Gobidolo

kwelizinga. Ibala lombhoxo iNewlands laligcwele limmi ngeembhambho,
kungabamhlophe nabamyama, kodwa kubonakala ukuba ukubakho
kwalomdlali kutsale inkxaso enkulu yabamnyama. Ngenene lafika elothuba
bekudala lilindelwe. Wayivithuthela impempe yakhe usompempe uCraig
Jourbert, wanduluka umdlalo. Kuthe ngomzuzu wesihlanu uqalile umdlalo,
layibamba embindini webala ibhola iqela lasekhaya. Abadlali basembindini
webala, bayiphaka ibhola bebaleka ngesantya esiphezulu kunene.

13
Ngelingeni yafika ecabangeni lasekhohlo, hayke mfundi, yatsho instwahla
kwelobala abalandeli sele bemmi ngenyawo belindele okuzakwenzeka xa
ibanjwe nguBholthi loobhola. Wayibamba umfo kaGobidolo, qakatha
qakatha umgama ongephi, wahlangana nomdlali ophambili wooKrebe,
wambamba esinqeni wambeka egadeni lomfana, Ufikile apho ububhalele
khona kwedini!, watsho lomfana ebhekisa kuBongani. Lahlokoma icala
labalandeli booKrebe ngesandi esithi Beeeeeeeeeeeeaaast!!!!.
Wamkelwa olohlobo uBholti, kwisigaba sokuqala somdlalo wakhe
wokuqala, engafumani thuba kwaphela lokwenza adume ngazo ngenxa
yalomdlali bambiza uBeeeeeeast! Kwakubonakala futhi ukuba ngoku sele
edlalala ngoloyiko ingakumbi emva kokubekwa egadeni kabuhlungu.

Lafika ixesha lekhefu emaphikana umfo uBholthi, kubonakala ukuba

udanile ngumdlalo wakhe wesiqingatha sokuqala. Kwathi kufika eloxesha
lekhefu labe iqela lasekhaya lihamba ngasemnva ngamanqaku
angamashumi anesihlalu kumathathu, nto leyo wayengayiqhelanga
uBongani. Unkabi wafumana amazwi enkuthazo kumqeqeshi, emxelelela
ukuba uselithemba leliqela. Lamazwi amkhuthaza uphopho, wacinga
ngasemva apho asuka khona nazo zonke iindebe awakhe waziphumelela.

Safika esesibini isiqingatha somdlalo, wayimumatha impempe umfo

kaJourbert, saqala isiqingatha sokugqibela somdlalo. Hayi ke mlesi, kwesi
isiqingatha watyhila kwelinye iphepha umfo kaGobidolo. Yayisithi xa ifika
ecabangeni lasekhohlo ibhola, umfo omkhulu ayibambe inamathele
ezandleni, abhide umkhondo ngokubhekabheka kabini kathathu, alanyaze
okombane ukuya emgceni. UGobidolo wayequqa ebuyelela okwezulu
14
laseMthatha ngaphantsi kwezompondo zooKrebe kwesi isiqingatha.
Ukoyika kwakumkile kwaphela ngoku engulaaBholthi waseDale. Hayi ke
amatshamba emva kokulala emgceni. Kwathi kusele imizuzu emihlanu
phambi kokuba uphele umdlalo wabe elele amatyeli asibhozo emgceni,
olohlobo ebhalisa igama lakhe kwincwadi zembhali zeliqela likhulu.
Kwabakokokuqala ngqa ezimbhalini usiva amagwijo ebaleni kuba lomdlali
wayetsala inkxaso yabamnyama kulomdlalo. Yiva sele kusele imizuzu
emibini uphele umdlo lihlabela eloqela labalandeli abamnyama lisitsho
ngetenala, liphehlwa ngabatsho ngendyondyo:

Khawuthathe nalithemba

Sicelamalizo,

o-nalithemba

nalithemba

o-nalithemba

Sicelamalizo

nalithemba

UBholthi ulithemba.

15
Liqhube njalo ke igwijo, waziva esekhaya uBongani, bemamkele
ngokusesikweni abaxhasi. Waphela umdlalo echongwe njemdlali
ophambili wosuku, futhi oku kwamenza abenokuzithemba nangakumbi
uBongani. Latshona elalomini izikhululo zoomabona kude ziphinda-phinda
ezozihlandlo zisibhozo zokulala emngeni kwelityendyana.

Emva kwemidlalo elithoba yaletumente yeSuper 18, iqela laseNtshona

Kapa lalitshotsha phambili kwaye noBongani engumdlali onamanqaku
amanintsi. Kanye emva kwalomidlalo, lavakala igama likaBongani kuluhlu
lwabadlali abachongelwe imidlalo yendebe yehlabathi kwabangaphantsi
kweminyaka engamashumi amabini. Loo midlalo yayizakubanjwa ngaapha
kwelamaNgesi kanye emva kwalootumente yeSuper 18.

Wathi akubona ukuba ngoku uqinisekile ngendawo yakhe kweliqela

leNtshona Kapa, wamila iintsiba unyana kaGobidolo. Wabanomkhuba
wokungafiki ngethuba lokuzilolonga kwabadlali, ingakumbi ngeMivulo,
nangooLwezihlanu. Ukuba uthe wafika ngezoontsuku wayebonwa
nguwonke-wonke ukuba uqhuba adlule kwimizi yemidiliya
emfaxangiweyo. Hee ntanga, kumnandi phi namhlanje? Masenze esezolo
kaloku nanamhlanje nokuba kungeCawa, wabuza esitsho uBhesengile.
Kaloku mfumndi, kangangendlela wayerhola ngayo uBongani wayekwazi
ukuhlawulela itikiti lenqwelo moya umhlobo wakhe osenyongweni,
ukusuka eMonti ukuzokutsho eKapa. Mlesi, umntu akalahlwa. Naye kaloku
uBhesengile wayenethemba lokuba mhlawumbi uyakuze abengumdlali
wombhoxo ngenye imini noxa eligwala nje. Wayesithi naxa endwendwele
uBongani ehleli nabadlali beliqela, naye azibabaze unobuchule bokudlala
16
umbhoxo. Pewu! Siyazi ke ukuba isigodo singahlala emanzini, kodwa soze
sibeyingwenya. Uyabona Bhesengile, nanamhlanje sipha eLong Street
nakanjani, izakuba ziibhotile nje mhlobam, siyabangena!!!, watsho
uBongani. Waqhuba lomkhuba iimpela veki nempela veki kwaye sele
elibele ngezifundo zakhe awayebhaliselwe zona liqela lakhe.
Ekuzonwabiseni kwakhe ngalendlela, wayengajonganga nemali
ayichithayo ngempela veki enye yolonwabo uBongani. Nangona
bafundiswa ukucwangcisa imali abadlali, umfo omdala yena akazange
azinanze ezoongcebiso. Wayekhupha nje elokhadi lasebankeni athenge
konke njee okuzamonwabisa.

Eyona nto yayixhalabisa umqeqeshi kaBongani yayikukubona izinga

lomdlalo wakhe usehla, nangona wayelala kanye kabini emgceni umdlalo
ngamnye. Indlela awayeziphatha ngayo uBongani xa engekho ebaleni
yayimkhathaza umqeqeshi kuba esazi ukuba akuyondlela yokuziphatha
komdlali ophambi, futhi iziphumo ziyabonakala ebaleni. Minazana ithile
wamkhwebela ecaleni uBongani umqeqeshi omkhulu emxelela
ngobungozi botywala obugqithisileyo kumzimha womdlali wombhoxo.
Wamxelela ngomgangatho womdlalo wakhe owehlayo ngenxa yotywala.
Kutsho bani ukuba ndiyasela mna?, wama ngentla ephika ukuba
unengxaki yotywala uBongani. Ndisakucebisa njengomzali nto
kaGobidolo, ukuba umba ofana nalo ungafikelela kumagosa aphezulu,
ungazifumana ungaphandle kweliqela, noko mfo ndini, buyisa unyawo,
wamcenga ngalomazwi umqeqeshi.

17
Kanti utsho kubani? Watsho phantsi umqeqeshi. Angena kweyasekhohlo
aphumela kweyasekunene indlebe loomazwi.

Minazana ithile, kanye emva kwemviwo zobusika zaseUCT, uZintle wagqiba

kwelokuzikhupha nabahlobo bakhe kuba begqibelisana belungiselela
ukuya emakhaya. Ngalomhla bakhetha ukuya kwesositalato solonwabo
saseKapa, iLong Stree. Tyhini! NankuBongani, watsho ngochulumanco
uZintle, Hayi maan Zintle ungazenzi lamantombazana aphaphayo, nathi
siyamazi Bholthi, simazela kumabonakude, sukuzenza iGroupie apha,
watsho omnye wabahlobo baka Zintle emnqanda. Hayi mna sihlobo
ndimazele kwaNtonga, ngumkhaya wam nomhlobo wam osenyongweni lo.
Ndizakunazisa nonke, waphendula uZintle. Bongani, Bhesengile, kanti
nani nilapha heeee, anisatsho, wabothusa uZintle ababafana, ..kodwa
wena Bhesengile ubekwa yintoni eKapa, uBongani ebekwa ngumbhoxo?,
Ndibekwa ziinyawo!, wagwexa ngelo uBhesengile. Kutheni ngathi sele
umanzi nje Bongani? wabuza uZintle. Heyi wena! Ufuna ukuxelelwa
kangaphi ukuba andithandani nawe, kutheni uzakundibuza lonto nje
nakulonyaka? Akuboni ukuba ndixakekile apha yigenge? Suka emva
kwam! waphendula uBongani. Uthini Bongani? wabuza uZintle.
Awusiso isithulu sisi. Uva ngantoni kanti? Ngegushemnyama?,
walandela uBhesengile. Yazi! Ndakunceeeeda wena!.... ukuba uyakuze
uphinde undibone Bongani! Yintoni uvele ubekrwada xa usele,
ndanditshilo ndathi ungaze uzihlobanise neebhotile kodwa wala, kuthiwa
inkomo enotshobo ayinqandwa mhlobo wam.. Wena Bhesengile,
uBongani uyakuze ayibone into oyiyo ngenye imini., watsho enyembezana

18
kwakho uZintle, ekhumbula esalamhla wokuqala ezintyintya uBongani.
Waphuma kuloondawo yolonwabo uZintle ephoxekile futhi ehlazekile
naphakathi kwabahlobo bakhe. Uyamthanda na lamfana Zintle,
wazikhathaza kangaka ngaye?, sabuza isihlobo sikaZintle kodwa akuzange
kuvele mpendulo. Bashiyeka bejuxuza bona abafana bezivisa kamnandi
ngeendidi ngeendidi zeentlobo zeenyembezi zikaVitoli. Obobusuku
abuzange buphele kamnandi kwaphela kwelityendyana lakwaGobidolo.
Wathi xa kanye ezama ukuziphakamisa emva kwezoobhitile ziliqela,
watyibilika ukusuka kumgangatho wesibini ukuya kongezantsi. Ngelishwa
lakhe uBongani wawa wophuka imbhande yasekunene, wakruneka
nengqoshe yasekunene kananjalo. Wasitsho esofelweyo sona isikhalo,
kucaca ukuba iintlungu zimongamele nangona wayeshushu. Kowu! isikhalo
sendoda! Bizani inqwelo yezigulana, watsho uManegala walondawo
yokozonwabisa. Amaxhalanga eentatheli kwakungathi kudala elilindile
elithuba. Yathi ifika lonqwelo yezigulana zabe iintatheli ziwukhuphe
kumakhasi ezonxibelelwano umfanekiso wokophuka kwalomdlali
uyindumasi epotsoyini. Zanwenwa iindaba zafika nalapho kwaNtonga.
Kowu, uBongani uyasazi ukuba sithini isivumelwano sakhe malunga
nesihelegu esinje? Lonto wayeka nokuthumela imali ekhaya sekusihla
obubutyadidi nje watsho ezibuza loomibizo ingenempendulo
uMamTshawe. Kaloku wayesazi ukuba iindaba ezinje azintlanga kwaphela
kuba zihlaza igama leqela lombhoxo elikhulu, kwaye naye ebeka igama
lakhe nemplilo yakhe ebungciphekweni. UMamTshawe wakhumbula

19
kananjalo ukuba, ngokwesivumelwano, umonzakalo onjengalo uyakutya
kuye epokokhweni uBongani, iqela lakhe lalingasoze lizifake.

Ngethamsanqa utyando lwasemlenzi nakwingqoshe lahamba kakuhle

kwisibhedlele iChristiaan Barnard Memorial kanye kwesositalato sodumo
iLong Street. Wachacha kuhle unkabi, kodwa oogqirha bamxelela ukuba
akasayi kudlala iinyanga ezilithoba. Noko ezindaba azizange zimphathe
kakuhle urheme kuba wayesazi ukuba ithuba lokuqaqamba kwitumente
yeSuper 18 lalitshabalele, kwaye wayezakuphoswa nalithuba lokumela
uMzantsi Afrika njengeBhoko-bhoko elincinane kulomidlalo yendebe
yehlabathi. Wahlala esibhedlele enezoongcinga mihla le. Nomhlobo wakhe
uBhesengile engamtyeleli nokumtyelela, engambhaleli nakweleswekile.

Lwafika usuku lokukhululwa kwakhe esibhedle. Uxholovane lo

wayesimelela ngeentonga, kunzima ukuya phambili. Kanye ngalomhla
wokuphuma esibhedlele, wafika ummeli wenkampani yakwaRange-Rover.
Nto kaGobidolo, uyazi ukuba isivumelwano sengqesho owasityikityayo
asikuvumeli ubeke amagama eenkampani ezikuxhasayo esichengeni.
Ngesisihelegu ulihlazile igama lakwaRange-Rover, ngoko ke siyasiqhawula
esethu isivumelwano. Kuyakunyanzeleka siyixuthe nayo imoto, utshilo
ummeli. Kuthe kungekadluli nemizuzu engamashumi amathathu,
esakhwanqisiwe uBongani, wangena umnxeba ovela kumzi
wabakwaBritish Airways, nawo lomnxeba uqhawula isivumelwano
nalomdlali esixabisa izigidi ezine zeerandi ngonyaka. Ngenxa yokuziphatha
kwakhe kakubi uBongani wazibona ephulukana nazo zonke iinkampani
ezingabaxhasi njee ngephanyazo.
20
Wabuyela eqeleni lakhe lomfo kaGobidolo emva kokuphuma esibhedlele.
Nalapho akuzange kubekuhle. Wamkelwa ngencwadi embiza kwiqumrhu
lezoluleko, nalapho wafunyaniswa enetyala lokuhlaza iqela lakhe.
Yaphuma kwakuloontlanganiso nengxelo yokufika eqhuba amatakane
ngethuba lokuzilolonga. Urheme wakhanyela walala ngombele, ezikhaba
ngawo omane ezozityholo, kodwa ubungqina bamagazi bafumanisa
utywala obungaaphaya komlinganiselo olindelekileyo. Nalapho
wafunyaniswa enetyala lokuziphatha gwenxa. Isigwebo yabasisiqingatha
somvuzo wakhe iinyanga ezintathu zilandelelana, futhi enikwa nesilumkiso
sokugqibela leliqela. Ukufunyaniswa kwakhe enetyala kwakho
wayezakuwukhomba umnyango kweloqela. Yaqukunjelwa loontlanganiso
ngusihlalo ngokunika uBongani inkqubo awayezakuyilandela ukuze
abuyele kwisimo sangaphambili sokubangumdlali obalaseleyo. Wayesitho
kubani? Akazange alandelo kwaloomigaqo uBongani, wayebonwa ephuma
engena kwizirhoxo zaseKhayelitsha, apho wayecinga ukuba ufihlakele
emehlweni eentatheli. Ngokwenza njalo ke kwabakanti uqhwayela ngemva
okwenkukhu. Zaphela ezonyanga zilithoba esajingxela umfana omdala.
Wathi ezama ukubuyela eqeleni lakhe kwabe kubonakala ukuba akasokuze
aphinde abengulaaGobidolo wamhla mnene. Ngenxa yokungabuyeli
kwisimo sakhe sangaphambili, kwanyanzeleka isivumelwano sakhe
sengqesho sophulwe. Ngolohlobo labe kanti ikamva likaBongani lithanda
ukubamfiliba.

21
Zaphuma iingxelo zamaphephandaba angeCawa zipapasha ukuwa
kwelityendyana ngenxa yokuziphatha. Yayingundaba mlonyeni
nakoonomathotho into yokubonwa kwakhe kwizirhoxo zaseKhayelitsha.
Tywala ndini umngumlahlekisi, wavakala esitsho uBraBhara
kwezemidlalo, kunomathotholo. Kanti, akukho kwanto inotywala wena
BraBhara, ngabantu nje noxinzelelo olusuka kubahlobo abangendawo,
zaqhuba njalo iingxoxo mpikiswano zixovula lomba. Kuqhubeka
ezoongxoxo ke, naye unyana kaGobidolo uphulaphule. Wathi akuba
nokuziqonda wakhumbula laaZintle wambhebhethayo. Ngalemini amcinga
ngayo wayesele ezibona ukuba uyaphalala, futhi igenge nooBhesengile
babephele emehlweni. Wathumela umyalezo ngomnxeba othi:

Ndiyazisola Zintle, ukuba ndandikuphulaphule ngekungenje. Abahlobo

bandilahlekisa, ngoku ndisemacabangeni obomi. Kwathi kuba liphandlwa
kabini lobone, uZitle waphendula ngamafutshane athi Hayska, phuma
kum.

Iimpukane eziluhlaza zithi, nanko umfo kaGobidolo ebonwa apho

kweloQonce, exelenga kuloomzi wolonwabo wodumo njengomgcini
cwangco.

Unathi Septembe

22