Tamu Atur Pambagyaharja Dhumateng Tamu Ing Pahargyan Temanten
Assalamualaikum Wr. Wb.
Kula nuwun Para Sesepuh, para Pinisepuh ingkang satuhu kula bekteni. Para Bapak, para ibu lan para sedherek sedaya ingkang minulya ing budhi. Para tamu lan adek adek sedaya ingkang kula kurmati. Kula nuwun ! Keparenga kula sedmela atur, ngempil kamardikan panjenengan sedaya rikalanipun nembe eca wawan pangandikan. Kula minangka wakil kaluwarga minangkani pamundhutipun ingkang hamengku gati. Sepisan ngaturaken syukur Alhamdulillah dhumateng ngarsa dalem Gusti Ingkang Maha Agung, dene hajatipun Bapa Darmawan sekaliyan anggenipun hamengku gati ndaupaken putranipun ingkang Rara Lina Setya Puspaningsih, S.sos sampun kalampahan dhaup kaliyan Bagus Rahmat Effendi, S.T rikala dinten Minggu Wage tanggal 16 wanci jam 9 wonten ing dalemipun Bapa Darmawan kanthi manggih rahayu kali sing sambekala. Kaping kalihipun Bapa Darmawan sakaluwarga ngaturaken panuwun ingkang sanget menawi para tamu sampun kersa ngrawuhi miwah paring donga pamuji dhumateng sri penganten sekaliyan. Sarehning Bapa Darmawan sakaluwarga mboten saged ngaturi punapa- punapa, sagedipun naming ngaturaken puji pangestuti mugi-mugi pikantuk sih kautaman panjenengan sedaya saking Gusti Ingkang Maha Agung. Kaping tiganipun Bapa Darmawan sakaluwarga nyuwun dedonga dhumateng para tamu sedaya supados sri penganten sekaliyan sageda nglaksanani kekudanganipun para pinisepuh sedaya. Tuwin enggal pinaringan momongan putra utawi putri ingkang bekti dhumateng Allah SWT, dhumateng rama ibunipun lan para pinisepuhipun, sageda mikul dhuwur mendem jero labuh labet dhateng nagri. Ingkang pungkasan mbok bilih wonten kekuranganipun trapsila anggenipun ngacarani, menawi dhaharanipun kirang eca ugi papanipun kirang sae Bapa Darmawan ngaturaken sih samodra pangaksami. Wassalamualaikum Wr. Wb. Atur Pasrah Temanten Assalamualaikum Wr. Wb. Kula nuwun, kanthi limbaran pepayung budi rahayu saha hangunjukaken suka syukur dhumateng Gusti, mugi rahayua sagung dumadi tansah kajiwa lan kasalira dhumateng kula lan panjenengan sedaya. Amit pasang aliman tabik, mugi tinebihna ing riyaduni myang tulak sarik, dene kawula cumanthaka marak mangarsa hanggempil kamardikan panjenengan ingkang katemben wawan pangandikan, inggih awratipun hamestuti jejebahan kula pinuji minangka duta saraya sulih sesira saking panjenengan Bapa/ibu Soetrisno, kula kadawuhan nglarapaken putra calon temanten putri, mugi katur panjenenganipun Bapa/ibu. Panjenenganipun Bapa Suripto ingkang jumeneng hangembani wuwus minangka sulih salira saking panjenenganipun Bapa/ibu Darmawan ingkang winatu agunging pakurmatan. Wondene menggah wigatosing sedya sowan kula wonten ngarsa panjenengan. Ingkang sepisan ngaturaken sewu agunging kelepatan dene panjenenganipun Bapa/ibu Soetrisno mboten saged hanindakaken piyambak masrahaken putranipun calon temanten kakung, kapeksa naming saged ngaturaken salam taklim mugi katura ing panjenengan Bapa/ibu Darmawan ingkang lumantar kawula. Sanget ing pamujinipun, bilih anggenipun mengku karya hanetepi dharmaning asepuh, hangrakit sekar cempaka mulya, hamiwaha putra mahargya siwi, tetepa winengku ing suka basuki. Jangkep kaping kalih, rehning putra calon temanten kakung pun Bagus Rahmat Effendi, S.sos atmaja kakung saking bapa/ibu Soetrisna ingkang pidalem ing Teba Kidul Rt. 3 Rw. 6 Candirengga Kec. Ayah, Kab. Kebumen sampun kalampahan ijab/dhaup suci kaliyan Rara Lina Setya Puspaningsih, S.sos. Kenya sisi saking panjenenganipun Bapa/ibu Darmawan kala wau dinten Minggu Wage surya kaping 16 Desember 2012 wanci tabuh 09.00 mapan ing dalemipun Bapa/ibu Darmawan mriki. Kula sapangombyong tansah jumurug ing karsa, sinartan puji donga Gusti tansah ngijabahi dhumatheng temanten sarimbit, anggen amangun brayat enggal, tansah manggih guyup rukun, atut runtut, ayem tentrem, rahayu ingkang tinuju, bagya mulya ingkang sinedya. Dene ingkang wekasan, sesampunipun paripurnaning pahargyan, kula sarombongan pangambyong temanten kakung, kaparenga nyuwun pamit saha nyuwun pangestu, mugi- mugi lampah kawula sarombongan manggih wilujeng kalis saking pringga bayaning marga. Semanten ugi, hambok bilih anggen kawula minangka talanging basa wonten gayak- guyuking wicara, kiranging subasita ingkang singular ing tata krami, kawula tansah nyuwun lumunturing sih samodra pangaksami. Wassalamualaikum Wr. Wb.
Atur Panampi Pasrah Temanten
Assalamualaikum Wr. Wb. Nuwun sagunging para rawuh sedaya ingkang satuhu kinabekten, Bapak/bapak, Ibu/ibu, sadherek-sadherek saha dutaning besan ingkang sahat kinurmatan, Saderengipun keparenga kula nyuwun agunging samodra pangaksami awit kawula kumantun ngejejer ngadeg wonten ing pangarsanipun panjenengan sedaya. Dhumateng panjenengan Bapa/ibu Sutrisno, kula minangka silih saliranipun Bapa/ibu Darmawan ngaturaken nyuwun gunging pangapunten amargi ing wekdal punika mboten kuwawi matur. Awit saking bombonging penggalih suka pari suka pikantuk sungsung talineng katresnan ingkang tanpa pepindhan. Ingkang kaping kalih, kula pribadi tuwin Bapa/ibu Soetrisno sekaliyan ngaturaken pambagyaharja rahayu wilujeng awit karawuh panjenengan sedaya ingkang sampun kanthi sugeng basuki nglarapaken sarana pasrahan temanten saking dalem dumugining wisma mriki. Kaping tiganipun, atur salam taklimipun sampun dipun tampi deneng Bapa/ibu Darmawan, ingkang lumantar Bapa/ibu Sutrisno kala wau. Semanten ugi Bapa/ibu Darmawan sekaliyan ngaturaken salam taklim mugi katur wonten ngarsanipun Bapa/ibu Soetrisno kanthi pepuji mugi-mugi tan saha pinaringan sih kanugrahaning pangeran, cinakno ing suka rahayu lan tinebihna ing godho rencana. Kaping sekawan, Bapa/ibu Darmawan sekaliyan neda narima ngaturaken matur nuwun ingkang tanpa pepindhan dene Bapa/ibu Soetrisno sekaliyan kersa anggenthenggaken bot karepotaning Bapa/ibu Darmawan. Pamila saking punika, pasrahan temanten kakung sampun dipun tampi kanthi suka renanning penggalih. Mawantu-wanyu panyuwunipun Bapa/ibu Darmawan sarimbit mugi panjenengan dalah para panggaraking penganten sedaya kasuwun kanthi sanget keparenga anglajengaken sura pari suka anggenipun lelenggahan kanthi miranggan ngantos dumugi paripurnaning pahargyan punika. Minangka pupating rembak, mbok bilih anggen kula ngaturaken atur panampi punika taksih kathah acir cewet kuciwaning atur, saha kirang mranani pnggalih, kula namung nyuwun gunging samodra pangaksami. Wassalamualaikum Wr. Wb