VISITA DOMICILIARIA ITI MEDALIA MILAGROSA

A. Panagsanto Rosaryo
B.
KARARAG A PANGKABLAAW
Oh nasam-it ken natarnaw unay nga Inami! Dimteng toy nagasat unay a kanito a
pannakakita kenka itoy nanumo unay a balaymi. Nagasat kami ta ibilangdaka a maysa
kadagiti kameng ti familiami. Siraragsakkam unay nga umawat iti isasarungkar mo, Oh
Reyna dagiti Angeles ken Ina ti naimbag nga ayat ken nasantoan nga inanama. Dikam
maikari itoy a parabur, Oh Manangngaasi nga Inami. Siasino aya ti nanggutugot kenka oh
nailangitan nga Inami, iti panangipaaymo itoy a gracia iti maysa a familia a napanglaw,
nakakaasi, ken managbasol a kas kadakami? Oh ammomi unay dayta naindaklan nga
imbagmo, dayta ayatmo a mangbendision kadakami. Umayka a sinuunnat dagita
taktakkiagmo tapno awatennakami nakakaasi nga annakmo. Umayka a mamasam-it
kadagiti tuokmi ken bumiang kadagiti ladingitmi. Umayka nga makipagbiag kadakami a
kas idi isasarungkarmo ken kasinsinmo a Santa Isabel tapno iburaymo kadakami ti
nailangitan a paraburmo. Dios ti agngina, Oh Virgen Milagrosa, Dios ti agngina itoy
naindaklan nga imbagmo.
Daytoy familiami, dina ammo no kasanot panagyamanna kenka ngem itedna ti
napusoan a kablaaw iti isasangpetmo ket awatennaka met a sipupunno iti ayat. Manipud
itoy a kanito, sika ita ti Senora toy balaymi ket mapagasatankam unay nga agnaed ita, iti
sibaymo. Kitaennakami a kas kukuam, ket dimo koma ipalubos a suminakam iti tudio ken
ayatmo. Oh Maria, nabukel nga awan tulawmo, ikakaasinakami dakami a kumamang
kenka.

PANNAKAIDATON TI FAMILIA
Oh Virgen Milagrosa, sipapakurangkami iti sangoanan ti ladawan keet idatonmi
amin kenka ti panagserbimi. Idatonmi kenka ti bagimi, ayatmi, balaymi, pagsapulanmi,
ken amin nga adda kadakami.
Bendisionam kadi toy a familia nga isaadna ti kadakkelan a dayawna iti panagayatna
kenka. Bendisionam dagiti ubbing tapno mataginayonda ti kinadalusda. Bendisionam
dagiti nagannak tapno matungpalda a sikakanatad ti nasagradoan nga akemda. Bendisionan
nakam amin tapno magnakam a sililinteg iti dalan ti kinasingpet nga agturong sadi langit.
Dayta kad nasantoan a Medaliam ti kalasagmi a mangikanawa kadakami ken tulbek a
balitok a manglukatto kadakami ti ruangan ti langit. AMEN.

PANNAKAIDATON TI TUNGGAL MAYSA

Taliawennak a sipaparintumeng, Oh Virgen a nadalus unay, iti sangoanan ti napateg
a ladawam. Idatonko kenka toy nanumo a pusok. Kukuanak ket kayatko met ti patagikua
kenka manipud ita. Awan sabali a dawatek no di ti agbiag nga agayat kenka ti inggat
kabaelak. Negm ammom unay, oh nasam-it nga Inak, ti kinakakaasi ken kinarasik. Sika
ngarud ti tulong ken taklinko kadagiti pagpeggadan toy lubong. Dinak kad baybay-an
ingganat diak magun-od ti langit a pagtungpalan.
Oh Maria, nabukel nga awan tulawna! Ikakaasim toy anakmo a sikakammatalek
unay nga agkamang kenka. AMEN.

KARARAG PAMMAKADA
Oh naayat unay nga Ina! Dimtengen ti ipapanawmo kadakami. Dagiti puspusomi
mapilitda a mangiruknoy ito naladingit a panagpakadami. Nagasat nga aldaw ti
panagbiagmi iti sakaanam! Amangan a liday ti pataudenna kadakami ti ipupusaymo iti
balaymi. Mariknami unay ti kurang nga ibatim iti familiami.
Adios, ay-ayatenmi unay nga Inami, adios, dinakam kad baybay-an no dinakam
bendisionan nga umuna. Laglagipem nga ay-ayatendaka iti amin a pusomi ket ur-urayenmi
a sisesegga ti kanito a panangsarungkarmo manen kadakami. Ket iti amin a disso a
papananyo, sumurot kadakayo dagiti puspusomi.
Agyamankam kenka iti pannakaikarimi a sinarungkaram ken kadagiti parabur nga
impaay dayta ayatmo. Kalubam kad kadagita kinamanangaasim dagiti babak a naaramidmi
kenka tangay mmom nga saan a nagtaud iti dakes a pakinakammi no di ket ti kuneng ken
ti kinarasimi. Italiawmo koma nga agdawdawat kenka iti grasia tapno ayatendaka ditoy a
biag ken iti kinaagnanayon. AMEN.
Oh Maria, nabukel nga awan tulawna. Ikakaasinakami dakami a kumamang kenka.
(Mamitlo a lualoem)

KARARAG A PAGDAWAT ITI KAPPIA

(Inurnos ni Papa Benedicto XV)
Sipupulpok gapu kadagiti nakaam-ames a gapuanan ti maysa a gubat a mangkiro-
kiro kadagiti tattao ken ili-ili, kumamangkami. Oh Jesus, ita naayat unay a Pusom, kas

VISITA DOMICILIARIA ITI MEDALIA MILAGROSA

maudi a pagkamanganmi. Kenka, O Dios ti kaasi, dawatenmi a siuunnoy ti panagtungpal
koman ti narungsot a saplit Kenka. Ari mamangkappia, kiddawenmi a madagdagus ken
sitatarigagay ti il-iliwenmi a kappia.
Manipud ita Nadiosan a pusom, pinagraniag mo ti ayat ditoy lubong tapno kalpasan
ti amin a panagbibinnusor, agari koma nga agmaymaysa kadagiti tao ti ayat. Idi nga add
aka pay laeng ditoy daga, impakitam dagiti pikapik ti nadarisay nga asim kadagiti
kinadaksanggasat ti tao. Matignay met ngarud koma ita dayta pusom iti daytoy a kanito, a
nadagsen kadakami gapu kadagiti guranggura a nakailunod unay ken kadagiti makaap-
aprang unay a panagpapatay.
Isnekmo ta asim kadagiti nagkaadu nga inna a masmasnaayan gapu iti
pagtagtagiaamoan a gasat dagiti annakda; kaasiam dagiti naruay a kaamaan a naulila
kadagiti ulo-uloda; kaasiam ti nakaay-ay-ay nga Europa nga agsagsagaba ti kasta unay a
pannakaarba.
Paltiingam dagiti agtuturay ken dagiti umili kadagiti pampanunot ti kinaemma,
urnosem dagiti riri a mangsayya-sayya kadagiti il-ili; aramidem a dagiti tao sublianda
manen ti agiinnagek ti agek ni kappia. Sika a mamagkakabsat kadakuada babaen ti gated
ta daram. Ket kas iti naminsan nga aldaw nga iti gumawgawawa nga ikkis ni Apostolmo a
Pedro: Apo, isalakannakami, mapukaw kamin, sinungbatam a siaasi iti inka
panamagtalna ti sidadawel a baybay, kasta met koma ita, kadagiti sitatalek a karkararagmi
sungbatam met koma a siaayat ti inka panangipulang itoy sikikibur a lubong ti talna ken
kappia.
Ket sika met, a nasantoan unay a Virgen, kas kadagiti sabali a panawen ti
nakabutbuteng a pannakagugur, tulongannakami, saluadannakami, isalakannakami. Sapay
koma ta kasta.

Bayat ti kaadda ti urna ti Virgen Milagrosa iti maysa a balay, ikalikaguman dagiti bumalay
ti agyaman kenkuana babaen dagiti sumaridat a naimbag nga aramid:
1. Ikagumaanda nga tungpalen a situtudio dagiti annongda a kas kristiano ket
liklikanda ti amin a pakabasolanda iti Virgen.
2. Nasayaat koma no adda agkumulgar uray maysa laeng kadagiti sangafamiliaan
3. Lualuenda a sangkabalayan iti Santo Rosaryo iti sangonan ti ladawan ti Virgen.
4. Dida koma liwayan ti ag-Santo Rosaryo.
5. Bumasada koma, no mabalinda, iti maipapan ti Medalia Milagrosa.
6. No labasan ti siled nga ayan ti urna ti Virgen, kablaawanda ket lalluenda a
sidedebosion toy sumaganad a kararag:

Oh Maria nabukel nga awan tulawna, ikakaasinakami dakami a

kumamang kenka.
VISITA DOMICILIARIA ITI MEDALIA MILAGROSA