Kumapit Ka Sa Gabi

By Charles Aames M. Bautista

Kalalagpas lang ng takipsilim,

At nakadungaw sa bintana,
Nakikinig sa musika ng siyudad na kahit nababalot sa dilim ay buhay sa ingay ng samu't saring
kwento ng pag-ibig;
Sa taas ng toreng kinalawang ng panahon,
Iba ang nawawaring hiwaga,
Sa halip na malunod sa ingay ng mga asong ulol na naghahabulan ay nangibabaw ang halina ng usapan
ng kuliglig;
Sa malayong dako ng inaakalang impyerno,
Kumikislap pa rin ang bituin sa mga mata,
Nakatagong ligaya, katahimikan at kapayapaan na hindi nakikita sa nakabubulag na silaw ng araw kung
saan walang makatitig;
Kaya't kumapit ka sa gabi,
Tuluyan mong linlangin at libangin ang iyong sarili,
Dahil balang araw, pasasalamatan mo ang pagsuko mo sa 'di karaniwang sandali.