Godofredo Reyes

Adda sarsarita idi ugma

Nga agalla-allatiw ti dila

Sarsarita a makapakatawa

Mangparagsak iti rikna.

Nadamagyon ni Angalo?

Gigante dayta a baro,

Nataer, naarem, nakarayo,

Kadakkelna makigtotkayo.

No rukodem ti tugotna

Limapulo kadapan kaatiddogna

Duapulo kadapan ramramayna

Banbantay aska-askawenna.

Sadino ti naggapuanna

Daytoy a datdatlag a parsua?

Tagipuro iti Asia

Akin-abagatan a daya.

Nagdaliasat idiay Korea

Japon ken Formosa,

Ditoy Filipinas maikalima

A daga a nagsardenganna.

Simmanglad idiay Lima

(Limay itan) idiay Bataan,

Maikaem idiay Annam,

Maikasiam idiay Siam.

Ti maikapito ket maikawalo

Idiay Singapore ken Borneo

Maikasangapulo idiay Burma

Sa nagturong idiay Tsina.

Idi adda idiay Bataan

Limmabas agkankanta nga Aran

Gigante a nagpuniponan

Kinapintas a balasang.

Naglugan nangayed a barko

Kas bantay ti kangato

Kas ikan a burikburikan

Nangisit nabalidbidan

Iti kiaw a narangrang.

Napardas panaggaudna

Amianan naturongna,

Sinurot ni Angalo

Ti makaawis a banglo.

Idi makabatog kailokoan

Narba ti sasakayan

Ta ti angina Banaoang

Nasabetna dina nalisian.

Nagikkis ni Angalo

A kumamkamat likudan

Narba kan Aran!

Napataliaw balasang.

Timmapuak iti barko

Naglangoy a kas iyo

Ni Aran a di mapaamo

Nagpuniponan karayo.

Ti disso a nakarbaan

Napintas a sasakayan

Isut ili a Narvacan

Ilokos akin-abagatan.