-John Psalmuel Velarde Chan
Halina kayo sa bayan namin,
Nang kayo’y aming payamanin,
Lahat ay maari ninyong linangin,
Kami lamang ay inyong pakainin.
Halina kayo sa bayan namin,
Kung saan matutupad inyong mga pantasya,
Laman mabibili sa napakamurang halaga,
Maaaring iuwi nang kayo’s pasayahin.
Halina kayo sa bayan namin,
Na naglilingkod ng lubos sa inyong bayan,
Lakas paggawa dito’y mumurahin,
Dumito na kayo at magpakagahaman,
Halina kayo sa bayan namin,
Kung saan pipi ang madla’t sambayanan,
Laging nakalulusot ang mga salarin,
Ng mga kalunuslunos na patayan.
Halina kayo sa bayan namin,
Kung saan interes niyo laging pinupuno,
Aming kalikasan maaari niyong sirain,
Basta’t kaibiganin n’yo, aming mga pinuno.
Halina kayo sa bayan namin,
Isang bayan ng butihing mga alipin,
Handang ibigay ang lahat ng nasa amin,
Mabigyan nyo lamang ng kapirasong kikitain.
Aming paraiso’y inyong linangin,
Bilhin na ninyo aming mga lupain,
Lahat ng likas-yaman maari ninyong kunin,
Kaya halina kayo sa bayan namin.