Aaçlık- en zor vakıt gagauzların yaşamasında. Bu yıl olêr etmiş yıl, nicä bizim dedelerimiz aaçlıı geçirmişlär.Üürenmää deyni zorluklar için bu belalı vakıtta, bän danıştım küüdeki insannara, angıları aaçlıı geçirmişlär. Kalın Stefanida İvanovna.07.01.1937 yıl. Kazayak küüyü, Miçurin sokaa. - Bin dokuzüz kırk altıncı yılda büük bela insannarın başına geldi. O yılın bereket olmadıydı, neçin deyni kuraktı. Yoktu imeelik, ama nekadarcık da vardı, onnarı da askercilär, korkudup, alardılar. İnsannar baarışardılar, aalayardılar, bilmärdilär nesoy ötää dooru yaşamaa. -Stefana bulü, nelär geçirdiniz siz aaçlık vakıdında? -Aaçlıkta çok zorluklar geçirdim.Neyi sade bän imedim. Benim anam hardal tezää yımışadıp, zoruna bizä idirärdi, ölmeyelim deyni. Kışın da saçaklardan buz iyärdim. Kedı, köpek yaanısını iyärdik. Benim anam dokuyardı kenevirdän çukman, satardı insannara bir auççuk ekinä. O ekincii saklı kayada çekärdik, da te o uncaazdan mamaliga yapardık. Yazı nası-nicä geçirabildik, ama kış zamanı geldiynän, taa da çok insan başladıydı ölmää. İnsannar ölardilär diil sade aaçlıktan, ama suuktan da, neçin deyni yakacak ta, rubamız da yoktu. Kışın kaar üstündä yalnayak gezärdik. Aaçlık vakıdında bän taa uşaktım, ama pek islää tutêrım aklımda, ani en zor geldi benim bobama. O, bulup biza imää, birtürlü paylaştırardı, ama kendisi aaç durardı. Bän sanêrım, ani bobacıım kurtardı beni ölümdän. Aaçlık aldı aardına anamı, bobamı hem da kardaşımı – yaşlarını sileräk, annadêr ihtär karı. Bir parça vakıttan sora, küüyümüzdä kuruldu kolhozlar.Hepsi insannar gidärdilär orayı işlemää. Bän da gittim, neçin deyni kırda birär parçacık mamaliga verärdilär. Bän sanêrım, ani kolhozun yardımınnan insan dirildi, ayaa kalktı. - Sizin bakışınıza görä, lääzım mı Gagauziyanın yaşayannarı aaçlıkta kaybelennerin kurban yortusunu yapsınnar? Angı günü bu var nicä olsun? - Bän sanêrım, ani öla gün mutlak lääzım olsun. Benim bakışıma görä, en ii olacek bu gün Kasıma karşı, bir cümertesi, ani insannara yakışsın mezarlaa gitmää. Kasım Domnikiyä İvanovna.07.02.1929yıl.Kazayak küüyü. Frunze sokaa. - Dona bulü, ne var nicä söleyäsiniz aaçlık için? -Benim duuma erim Dimitrovka küüyündä. Aaçlık vakıtlarında bän orada bulunardım. Aaçlık, kızım, pek çirkin bir iştir. Aaçlıın bitki günnerdä öldü benim üç kızkardaşım, anam hem bobam. Biz batümnan ikimiz kaldıydık. Bindokuzüz kırk altıncı yılda, ekini topladıktan sora, postavka başladıydı insannarın mallarını, ekinnerini almaa başladılar. Tutêrım aklımda, nica bobam sakladıydı ekini patın içinä da suvadıydı üstünü, ani belli olmasın. O zamannar askercilär evdän evä gezärdilär, aarayardılar saklanmış ekini. İki gündän sora bizim da ekini bulduydular. Birda tenemiz kalmadıydı.Aaçlıkta insannar yollar boyunda ölardi. Zavalı uşacıklar anasız – bobasız kalardılar. Kazdıydılar bir kuyu, nereyi sıbıdardılar ölüleri. Adamnar taligalarlan gezärdilär maalelerdä, ölüleri toplayarak. Angı insan taa soluyardı, kıpırdanardı – onnarı da mezara götürärdilär. Bän pek zor geçirdim aaçlıı. Kendim da bilmeerim, nesoy diri kaldım. Batümnan pinärdik tavana, alardık büüceräk bir enser da çatlaklardan birär birär çıkarardık tenecikleri. Sora da birtürlü paylaştırardık. Anamın pek çok rubası vardı. Bir günü batüm deer bana: «Hadi alalım bu rubacıkları da satalım, ani olsun ne iyelim.»Bän kayıl oldum. Rubaları sattıktan sora, o paraya bir bukacık ekmek aldık, angısını payettik ölä, ani birkaç günä etsin. Ötää dooru ne bulardık, onu da iyärdik: kuşçaaz, ot, kaar. Sora ilkyaz geldi. Küüyümüzdä kolhoz kurulduydu. Hepsi insannar orada işlärdilär. Benim sa batüm istämedi kolhozda işlemää, da gittik biz Donbasa. Orada şahtada işledik. İki yıldan sora, açan geldik geeri ana topraamıza, burada yaşamak biraz başlamıştı doorulmaa. -Sizin bakışınıza görä, lääzım mı Gagauziyanın yaşayannarı aaçlıkta kaybelennerin kurban yortusunu yapsınnar?Angı günü bu var nicä olsun? -Bän, sayêrım, ani o gün lääzım olsun ölülerin paskellesinin aardına. Topal Stefanida İvanovna.29.09.1929yıl. Kazayak küüyü. Frunze sokaa -Var mı nicä annadasınız, nesoy zorluklar siz geçirdiniz aaçlık vakıdında? -Pek çirkin işlär gördüm aaçlık vakıdında.Aaçlıktan öldü benim kardaşım, iki da kızkardaşım. O zaman pek çok insan hastalanardı, onuştan mezara götürärdilär te onnarı, angıları şişmiştilär. Benim da bitki kardaşçıım şiştiydi. Bir günü geldiydi o benimnän ekin kabletmää. Açan attım gözümü bir tarafa da gördüm taligayı, dayadım bän kardaşçıımı duvara, sakladım üzünü, deyni pek benizsizdi, ani almasınnar onu bendän. İki gün durduyduk orada. Aaç dura-dura, benim ellerimdä öldü bitki kardaşçıım da. -Onbir gün bän ne su içtim, ne da ekmek idim. Anacıım bulmuştu bir parça koyun derisi, kaynadıp onu, paça yaptıydık da tatlı-tatlı idiydik. Kış o yılın derin olduydu. Pek suuktu. Yoktu ne giiyelim. Bir günü gelardim bän bulülardan da gördüm, ani önümdä bir tepecik kaar durêr. Açan islää baktım - ölü insan yatêr. Çıkardım bän kaar altından onu, soyundurdum da kendi sırtıma giidim o rubacıkları. Unutmayacam, nicä bir avşam komuşuların bacası pek çirkin tütärdi. Açan anamnan gidtik, gördük, ani o uşaanı fırına atmış. Brakmadık biz Ana bulüyu oolunu isin, çaardık adamnarı, da mezara götürdülär zavalı uşacıı. -Var taa bir oluş, angısını Stefana bulü annattı aalayarak. -Bir günü anamnan gittiydik Kortenä ekmek almaa. Geeri dooru gelärkana, oturduk biz dinnenmää bir pınarın yanına. Açan uzattım kafamı da baktım o pınarın içina,orası insannan doluydu. Dirilär ölüleri doz - dolay dizmiştilär da savaşardılar yukarı tırmanmaa. O insannar beni gördüynän, çekettilär baarmaa:«Yardımcı ol, kurtar bizi!» Bu insannarı gördüktän sora, benim içim sansın aktarlandıydı. Onnarın arasında biyaz keptarlan bir uşacık vardı. Bän büünnän-büün unudamêêrım onun bakışını da iyerim kendi içimi, ani yaardımcı olamadım onnara. « Zor inanmaa, ama aslı, Küülerimiz kaldı yaslı...» Te bu sıracıklar uyer aaçlık vakıtlarına.Stefana bulü düşüner, ani halkımız olacek diveç yaslı, zerä bu çirkin, büük belalı vakıt unudulmaz evlat boylarında taa çok üzlärlän yıl.