LASAPIN ANG TRADISYONAL na pagkaing inihahain ng Bedista na si Enrico Dee
sa kanyang restawran, Mesa. Ang Mesa ay isang kilalang restawran na naghahain ng iba’ibang putahe ng Pilipino na binigyan ng konting twist upang mai-angkop ang lasa nito sa makabagong panahon. Si Enrico “Rikki” Dee ay isang gradweyt ng San Beda University at isang restaurateur na nagmamay-ari ng iba’t ibang establisyimento kabilang ang Mesa. Bagamat hindi kursong culinary arts ang kanyang natapos sa nasabing unibersidad, ang kanyang personal na interes sa negosyo ang nag udyok sakanya upang magtayo ng restawran. Sa tulong ng kaniyang asawa na si Elizabeth “Beng”, naitayo nila ang kauna-unahan nilang restawran na “Chin Chin Restaurant” sa Makati noong 1980’s. Ang kanilang unang restawran ay nagbigay ng atensyon kay Henry Sy Sr., ang nagtayo ng SM Mall sa Pilipinas, na siyang tumulong sakaniya upang bigyan ng pwesto sa loob ng isa sa kanyang mga mall. Ang Mesa ay matatagpuan sa iba’t ibang bahagi ng kalakhang Maynila. Hindi maikukubli ang loob ng bawat restawran na ang kanilang pangunahing putahe ay mga bersyon ng mga Pilipino bagkus ito’y kanilang hinaluan ng makabagong timpla na papatok sa kasalukuyan. Ilan sa mga ipinagmamalaki nilang mga putahe ay ang Crispy Short Ribs Kare-Kare na sinahugan ng prinitong ribs ng baka na pinalinamnam ng mantekilyang mani at binalanse ng alat ng masarap na bagoong. At ilang mga masasarap na pampagana naman ay ang Baked Scallops with Garlic Butter, baked lukan na binudburan ng bawang at keso at Sisig in a pouch, masarap na sisig na binalot sa crunchy wrapper. Masarap din ang kanilang Crispy Boneless Pata at Sinigang in Guava and Pineapple, na pinaasim gamit ang bayabas at pinya na sinahugan ng iba’t-ibang gulay gaya ng labanos, kang-kong, siling labuyo, talong at kamatis. Chicken BBQ in Honey Patis, inihaw na manok na ibinabad sa patis at pulot. Laing 2 ways, na may dahon ng gabi na pinasarap ng bagoong, gata ng niyog at pinaibabawan ng adobo flakes na hinaluan ng sapat na anghang. Hindi rin mawawala sa kanilang putahe ang pampagana gaya ng Tinapa roll wrapped with lettuce na binalot ang pinagsama-samang sangkap gaya ng tinapa, kamatis, sibuyas at itlog na maalat. At hindi papahuli ang pinakamasarap nilang dessert. Ang Crispy Leche Flan, na binalot ng lumpia wrapper ang leche flan saka ito pinatuluan ng caramel. Ang bawat putaheng ito ay patunay na ang galing at tatak ng bedista ay hindi mapapantayan.