Binating mga kaigsoonan.

Karong adlawa usa ka mabulukon ug makahuluganon alang kanatong tanan tungod sa

daghang mga grasya nga angay natong saulogon.

Una, karong adlawa ang ika-229 nga kasaulogan sa atong piyesta sa Mahal nga
patrona ang Birhen Inmaculada Concepcion sukad kita nahimugso isip pormal nga
parokya sa tuig 1789 ubos sa unang Padre Kura Padre Julian de Nuestra Seniora del
Mayor Dolor, usa ka Rekoleto.

Apan kining maong debosyon sa Mahal nga Birhen Inmaculada Concepcion sa mga
Misamisnon nagsugod pa sayo pa niining mga katuigan sa dihang ang Una nga Pari
nga miabot dinhi sa atong dapit nga mao si Padre Jose Ducos, usa ka Heswita, sa tuig
1754 dihang iyang gipanguholhan ang pagtukod sa Cotta sa Misamis ug ang una nga
Christian settlement dinhi niining dapita, iya kitang gihalad na ubos sa pagpanalipod
sa atong patrona, diha sa iyang pagbilin dinhi kanato sa bililhon natong bahandi, ang
imahen sa Mahal nga Birhen Nuetra Seniora de la Inmaculada Concepcion y del
Triunfo de la Cruz de Migpangi, nga mas nailhan nato nga ang Mahal nga Birhen sa
Cotta, kansang imahen ania na uban kanato karon.

Ikaduha, Karong adlawa atong gisaulog ang labing una nga anibersaryo sa pagbalik sa
nakaplagan natong imahen sa Mahal nga Birhen sa Cotta. Tuig 1975 sa dihang nawala
kini sa iyang nahamutangan dinhi sulod sa katedral ug daw wala na gayuy paglaum
nga kini mapalgan pa ug mahibalik dinhi. Apan ang Diyos, pinaagi sa pangaliya sa
Mahal nga Inahan ug sa iyang Esposo, Senor San Jose, nagtugot nga mahikaplagan
siya diha sa mga kamot nga mga matuohon ug mahadlokon sa Dios, ug napasayon
ang pagpabalik kaniya. Sama nga mapasalamaton kita nga si Padre Jose Ducos nga
nagdala niining maong imahen, mapasalamaton usab kita nga si Sir Jose Victor
Esposo nga maoy naghatud-balik kaniya ug karon ato na kanunayng nasud-ongan
ang atong Inahan sa katawhang Misamisnon.

Ikatulo, karon usab ang unang anibersaryo sa pag-ila sa Gobyerno ug sa mga

Magbabalaud sa bililhon nga kabahin sa atong Mahal nga Inahan Birhen Inmaculada
Concepcion diha sa kasaysayan sa katawhang Pilipinhon kay siya giila man ang
Principal natong patrona sa Pilipinas gikan pa sa karaang panahon, sa dihang
gihimong balaud ang Republic Act 10966 o AN ACT DECLARING DECEMBER 8
OF EVERY YEAR A SPECIAL NONWORKING HOLIDAY IN THE ENTIRE
COUNTRY TO COMMEMORATE THE FEAST OF THE IMMACULATE
CONCEPTION OF MARY, THE PRINCIPAL PATRONESS OF THE
PHILIPPINES.
Mapasalamaton gayud ang mga katawhang Pilipinhon karon. Mapasalamaton ang
mga katawhang Misamisnon.

Ug karon, atong hiusahon ang kalipay diha sa pagduyog nato sa kasaulogan sa Santos
nga Yukaristiya nga pagapangulohan sa atong Magbalantay, Arsobispo Martin S.
Jumoad, DD (uban ni Arsobispo Emerito Jesus A. Dosado, CM, DD) ug sa mga
kaparian sa atong Artsidiosesis. Manindog kita alang sa atong pasiunang awit.