Mangga urang sami-sami manjatkeun puji sareng syukur ka Hadirat Allah
SWT nu parantos ngutus hiji abdina nu nyandak risalah sareng pituduh kana jalan anu lempeng. Salajengna Shalawat sareng salam mugia tetep ka jungjunan urang sadaya kangjeng Nabi Muhammad SAW sareng ka kulawargana, ka para sahabatna, sareng ka sadaya anu tumut kana ajaran anjeunna. Salaku khotib pribados wasiat khusus ka diri pribadi umumna ka kaum muslimin, mangga urang sami-sami ningkatkeun katakwaan ka Allah SWT, nyaeta ngalaksanakeun saniskanten parentahna sareng nebihan saniskanten cegahannana, margi ku taqwa pisan urang sadaya bakal tiasa ngahontal kabagjaan dunia sareng akherat. Mangga urang perhatoskeun dawuhan Allah SWT dina surat Al-Ahzab ayat 21: Hartosna: Saestuna keur maraneh aya conto anu hade di diri Rasulullah pikeun jalma-jalma anu ngaharep karidhoan Allah jeung poe akhir tur anu loba ingetna ka Allah.
Para hadirin sidang jumah anu mulya..
Disarengan ku kawijaksanaan sareng kaluhungan Rasulullah, anjeunna parantos tiasa ngahontal hasil anu nyugemakeun dina ngawangun masyarakat dina leubet salami 23 taun. Anjeunna parantos tiasa ngarobih adat istiadat anu kawitna bedang basangkal, janten luhung budi sarta parantos tiasa ti alam jahiliyyah janten terang benderang, tina resep parasea janten rukun lalayeut, tina barodo janten palinter, tina ngaredul janten daraekan, tina kalotor janten bareusih, tina paredit janten berehan. Suri tauladan Rasulullah dina ngawangun umat dina sacara garis ageungna ngawengku tilu perkara nyaeta: kahiji ibadah, kadua kasejahteraan, katilu kaamanan. Dawuhan Allah SWT dina surat Al-Quraisy ayat 3-4:
Hartosna: Kukituna maraneh aribadah ka pangeran ieu ka’bah, anu
maparin dahareun ka maranehna keur ngaleungitkeun lapar tur ngaraksa maranehna tina kasieun.
Ayat di luhur ieu ngajelaskeun yen Rasulullah SAW dina ngawangun
umat masihan pola atawa conto dina tilu perkara sapertos anu kasebat di luhur: 1. Dina masalah ibadah: Rasulullah SAW ti kawit ngalaksanakeun tugasna teh nyaeta ngabina tauhid umatna. Ngalempengkeun kapercayaan masyarakat tina musyrik kana tauhid. Saparantosna tauhidna kiat, teras ngabina ibadah sareng akhlak, ti kawit ibadah anu khusus dugika ibadah anu umum, saniskanten padamelan masyarakat salamina ngandung ibadah ka Allah, sarengkak saparipolah tebih tina ngalakukeun maksiat. Tah ku cara kitu masyarakat jadi tentrem ayem aya dina ka sakinahan, margi gaduh kayakinan anu kiat ka Allah SWT anu nangtayungan kana dirina. 2. Dina masalah kasejahteraan: Rasulullah SAW merhatoskeun pisan kana pangwangunan ekonomi masyarakat. Ngawangun sandang pangan sareng kaperyogian hirup anu sanesna. Ngawangun kasejahteraan masyarakat ku sistim ekonomi kakeluargaan, ngamekarkeun rasa duduluran, ngawangun jiwa sosial, nyaah ka sasama tur mampuh ngajait nasib fakir sareng miskin. Rasulullah ngadangdosan adat istiadat masyarakat anu kawitna royal jadi rikrik. Jadi ku cara kitu masyarakat janten tentrem tumaninah, sejahtera lahir katut batinna. 3. Dina masalah kaamanan: Sagala rupa anu jadi bibit sareng cukang lantaran anu nimbulkeun kakacauan sareng kaonaran ku Rasulullah di bersihkeun, kaadilan ditanjerkeun, kasarakahan di tumpes, estuning jadi nagara anu “Baldatun Toyyibatun Warobun Gafur”, nagara anu aman, tentrem, sepi tina dogdog pangrewong, sahingga ibadah ka Allah SWT janten laluasa aya dina katertiban.
Para hadirin sidang jumah anu mulya...
Dupi anu janten taktik atawa siasat Rasulullah SAW dina ngawangun umat numawi tiasa hasil anu nyugemakeun teh nyaeta: 1. Sagala rupi anu disaurkeun sareng diajarkeun ka masyarakat teh, anjeunna parantos langkung tipayun ngalaksanakeun, anjeunna parantos ngalaksanakeun langkung tipayun di lebet rumah tanggana. 2. Saparontos anjeunna maparin conto nyaeta ku dilaksanakeun heula di lebet rumah tanggana nembe anjeunna nguwar ngajak ka balarea. Tah ieu pisan Rasulullah SAW maparin conto ka umatna dina ngawangun pribadi, rumah tangga sareng masyarakat atawa umatna.
Mudah-mudahan ieu khutbah ageung manfaatna kango urang sadaya
sareng mudah-mudahan urang sadaya salamina di paparin taofik sareng hidayah-Na, sahingga urang sadaya tiasa nyonto kana sagala rupi anu parantos dilakukeun ku jungjunan urang Rasulullah SAW, amin ya Rabbal Alamin.