UHU: LINTAGU

Pisasawo no kaka i Bulontoi om i Bimbitai. Alaid no nokopisasawo yolo nga monorimo-

rimo mangawol i Bimbitai. Ongoi no i Bulontoi indahu kaka di. Diri nopo nga mogontian no kaka
I Bimbitai. Tikid tadau nga mangawol i Bimbitai daamot magandad di Bulontoi muli. Ontok
dangadau dii,
“Mogkuro ko, Imbitai?” ka di Lintagu.
“Mangawol oku,” ka di Bimbitai suminimbar.
“Mongoi oku daa pogkorumo diya,” ka di Lintagu minomisunud.
“Ba, suang nopo,”ka kawagu di Bimbitai.
Salakoi no kaka di i Lintagu nga monowoli daa dii kaka i Lintagu di Bimbitai do mangawol
nga au i uhang di Bimbitai. Sundung do ingkaa nga au no di kaka minononsog i Lintagu dii.
Louson no kaka di i Bimbitai dii. Daamot di bimbitai do minongoi akan nga ngoyo no kaka di
Lintagu rotu’ai i tapit di poingiliu.
“Odoi! Naratu ilo tapit nu oi Imbitai,” ka di Lintagu minomisunud.
“ Odoi gea diya tu nongoi nu rotu’ai. Ngoyo no doho ri,” ka daa di Bimbitai.
“Dui au oku i mongoi. Au oku i koongoi hilo puyut,” ka di Lintagu sinumimbar.
Ngoyo no kaka di Binbitai luungai nga hiri koio id puyut i tapit disido.
“Dui! Ngoyo dokoyu doho lo oi piak,” ka di Bimbitai. Songpanau-panau nogi kaka i piak
do mongoi daa nga pimboros no i Lintagu,
“Odoi! Kada kou ongoi. Mangan kou mot di Bimbitai odsuko.”
Somikokook no di kaka di i piak do minogidu.
“ Ngoyo dokoyu doho lo oi ogok, rinotuan di Lintagu lo tapit” ka kawagu di Bimbitai
kumaa di wogok. Ngok-ngok ka daa di wogok do mongoi hiri puyut nga,
“Hai! Kda kou ongoi,maan kou moti di Bimbitai tingkolosuai. Orudsuk kou moti,” ka di
Lintagu. Somilangak no kaka di i wogok minogidu.
“Kukuroyon ku nondo lo. Ongoiyo no doho lo,” ka kawagu di Bimbitai monuhu di Lintagu
nga au i di Lintagu uhang. Ngoyo no kaka di Bimbitai i tapi do hiri id puyut. Uhoto no kaka disido
i Lintagu do hombo i tapit tu au i disido okito i tapit do hiri puyut. Suhuo no kaka di Lintagu i
Bimbitai do tumingaha mooi do osonong do monuduk. Tingaha no kaka daa i Bimbitai nga
tuntugai nogi di Lintagu do rilo tahum. Kosuangai no di o mato di Bimbitai om kobolou no.
Ngoyo no di Lintagu poimpito’ i Bimbitai gisom i do koula isio. Labaso kaka disio ngawi i
rasuk om tudung di Bimbitai om soolio’ no dau. Panganu no kaka di tompurung do piasau om
posisipo no hiri rasuk dau do ponokosusu. Panganu no i Lintagu di tou’ om porusodo no hiri id
gonob om maai no agkasai mooi do okito isio miagal do songulun magontian.
Korikot no di i Bulontoi dii. I Bulontoi nopo nga au i kosorou kopio do turos di Bimbitai.
Songiak-iak no kaka i piak do hiri lian walai nga ponguhot no di isio do nokuro tu au pinokurung
i piak.
“Au ku nakabaya minongoi pongurung tu haro tulun minongoi do hiti, nga maai ku no
tuntugai di rilo tahum nga kobolou no dii. Ngoyon kito no ri pataamo,” ka di Lintagu
sinumimbar. Nokosuang no kaka di Lintagu i Bimbitai id suang do basung om ngoyon no dii
diolo pataamo hilo id kosondoton. Au i nintangan di Bulontoi nung nunu i pinataam om au nogi
isio kotutun do turos di Lintagu. Boboo’ no di Bulontoi i basung om pamanau no yolo minongoi
id kosondoton.
“Ulontoi, Ulontoi,sawo-sawo au oringgang, aragang-ragang” ka no daa di Bimbitai
miboros. Uhoto no kaka di Bulontoi i Lintagu do nunu komoyon dii.
“Siahai no oi Ulontoi tu haro no rasam hilo soborong. Okosupan tokou moti kaa bo dilo,”
ka di Lintagu sinumimbar. Intolu kaka i Nibitai di minimborod nsa au i Bulontoi karati. Oko nogi
kaka suhuon di Lintagu di mogusa. Korikot po dii id to kosondoton, poiliho no di Bulontoi i
basung om pogusa no yolo do minuli. Kapamanau kaka i bulontoi o kosusu no i Bimbitai. Hro di
o pampang di magal do sulap om au arasaman o hiri no i Bimbitai minogkosusu. Au i kaka alaid
om kagayo no i tanak disido. Tikid tadau podsuaon no kaka di Bimbitai i tanak.
“Susui podsuo’, posuon ku torobong, orogung o tuunion,” ka di Bimbitai momodsu di
tanak. Soira no nakgayo-gayo i tanak nga mooi kaka daa i tanak pogkorumo di tangaanak suai id
sokid ddo kinoyonon diolo. Tangaanak nopo ngawi dii nga popikutuk do tandaha. Sundung po
do ingkaa nga au kaka i Bimbitai kasaga do otingyaman kaka nung oilaan do ara’at o walai diolo.
Tumboyo no kaka i tanak di. [okiwonsoi no kakai tanak do gandang om wansayai no di Bimbitsi.
Tuni nopo kaka di gandang nga,
 “ Tood,tood logkugo, tid ku daa i Bimbitai, tapa ku daa i Lintagu,nga iri po kasalaan tu
sinaladan di Lintagu. Soira poo di naka’agung nga au di i tanak monognkuyaan do au mongoi
pogkorumi do tangaanak di mooi popikutuk. Ponguhot no kaka i tangaanak di tanak di Bimbitai
nung hombo o walai nga sunudan nopo kaka di tanak di Bimbitai do hiri id kosondoton kaa.
Monikid tadau mooi kaka i tanak di Bimbitai do mongkorumo di tangaanak dii.
Kouli po kaka i tangaanak ngawi dii nga ponguhot no dii molohing dioo nung isai otulun i
poingion id ksondoton. Posunudo kaka ngaei diolo o tuni di gandang nga au i molohing diolo
koilo. Korongou no kakah i Bulontoi do ahal diti. Tadau sumusuhut om ongoi no isio tanud di
tangaanak di do mooi pikutuk do tandaha. Soira nokorikot do hiri nga korongou no isio tuni di
gandana dii. Soira nokoruba isio di tanak di Bimbitai nga kotutun i kaka i tanak di Bimbitai do iri
nopo nga tapa dau.
Tanud no i Bulontoi di tanak minongoi do hiri walai di Bimbitai. Kopruba no i Bulontoi
om Bimbitai. Ponguhot no i bulontoi do nunu kopio i nadadi gisom nokoongoi i Bimbitai do hiri.
Posoritao’ no di kaka di Bimbitai om koilo nogi i Bulontoi do i nopo sawo disio id walai nga i
Lintagu. Kalapas dii, angatai no di Bulontoi i Bimbita om i tanak diolo do muli id walai di
Bulontoi. Au daa i Bimbitai muli tu orosian di Lintagu nga kalapas sinansagan di Bulontoi om
tumboyo’ no isido. Tadau di nga mino boros i Bulontoi kumaa di Bimbitai do patayon kaka disio
i Lintagu. Soira osomok no id walai di Bulontoi nga undorong po kaka i Bimbitai om i tanak
disido do magandad gisom do apatai di Bulontoi i Lintagu.
Korikot po id walai nga ponguhot no i Lintagu,
“ Hombo i pama nongoi nu di oi Ulontoi?”
Au kaka i Bulontoi sinumimbar. Suang no isio om pahatanai no dau minimobog tulu di Lintagu.
“Odoi! Sinurandayan oku di Bulontoi,” ka nogi kaka di Lintagu. Bobogo kaka di Bulontoi
id liou’.
“ Odoi! Sulungan oku di Bulontoi do kare,” ka di Lintagu. Bobogo kaka likud nga,
“Odoi! Rosukan oku di Bulontoi,” ka nogi kaka di Lintagu. Bobogo kaka id kangkab nga
angarak nopo kaka i tompurung do naratu.
“Odoi! Maan oku di Bulontoi riinai,” ka nogi kaka di Lintagu.
 ”Pogkuro diya dino. Nunu i pama kapatai diya?” ka di Bulontoi. Bobogo no kaka id taak
di Lintagu nga angarak i tou’ natatak om nangababak dii.
“Odoi! Agkasan oku di Bulontoi do ringgit,” ka di Lintagu. Bobogo kaka id poo.
“Odoi! Hadaman oku di Bulontoi,” ka nogi kaka di Lintagu. Bobogo kaka hiri id gakod.

“Odoi! Lumpokian oku di Bulontoi,” ka kawagu di Lintagu. Bobogo di Bulontoi o longon

di Lintagu nga,
“Odoi! Galangan oku di Bulontoi,” ka nogi kaka di Lintagu.
“ Nunu i pama o kapatai diya?” ka di Bulontoi minonguhot.
“Maan oku nopo kopio diya patayo oi Ulontoi nga au i bo agayo o kapatai doho.mongoi
nopo di hobut do paka om posisipon no id sondulu ku om apatai oku no. Soira mooi ko
pomolobong doho nga kada oku diya lobongo id lituk-lituk, nga lobongon oku id lambagan tu
haro nopo i ongorikot di tulun nga kakahu oku,” ka di Lintagu minomisunud.
Ongoi no di kaka i Bulontoi pokihobut do paka om ngoyo no sisipai hiri id sondulu di
Lintagu nag kapatai kopio no dii. Umboyoo’ no di Bulontoi do mooi pomolobong hiri id toning
do dalan. Suni no dii nga i Lintagu. Haro nopo di o tumalib do tulun, sokiro do akahu nopo nga
ongohurak no i sokot-sokot tu otoidan di Lintagu. Soira kapatai i Lintagu di, ongoyo no di
Bulontoi i Bimbitai om i tanak diolo do minuli.