U xookil Biblia utiaʼal 7 tak 13 tiʼ noviembre
Proverbios 29:11—30:4
29:11 J-maʼ ojéelajeʼ ku chaʼik u jíiltaʼal
tumen u [tsʼíibolal],
baʼaleʼ aj ojéelajeʼ ku kóolkuba.
12 Aj méekʼtáan ku táan óoltik tuusoʼobeʼ,
ku kʼaskúuntik tuláakal u j-meyajoʼob.
13 Le máax ku yeʼetsʼel yéetel máax ku
yeetsʼeʼ yaan baʼax [tiʼ chíikaʼanoʼob]:
[Jéeobaeʼ] u tsʼaamaj paakat tiʼ tu
kaʼatúulal.
14 [Rey] ku méekʼtáantik óotsiloʼob yéetel
chukaʼan óolaleʼ,
mantatsʼ ku tʼilkúuntik u jalach kʼáancheʼ.
15 Jaatsʼ yéetel kʼeeyajoʼobeʼ ku yúuchul
kaanbal,
baʼaleʼ paal ku beetik baʼax u kʼáateʼ ku
pajik u suʼtal u maama.
16 Wa ku yaʼabtal aj loobil bejoʼobeʼ ku
yaʼabtal xan kʼeban,
baʼaleʼ utsil máakoʼobeʼ bíin u yiloʼob
kʼaas u xuʼulul.
17 Aʼal u nuʼukul tiʼ a paal beyoʼ bíin
kuxlakech x-maʼ sajakil,
bíin xan u tsʼáatech yaʼab utsil óolaloʼob.
18 Tuʼux minaʼan u nuʼuk tʼaan [Dioseʼ],
minaʼan baʼal tubeeliʼ,
¡kiʼ tu yóol le kaaj ku tsʼoʼokbesik u
yaʼalmaj tʼaanoʼob [Diosoʼ]!
19 [Chéen yéetel tʼaanoʼobeʼ] maʼ tu chʼaʼik
bej palitsil,
tumen ku naʼatik, baʼaleʼ maʼ u kʼáat u
táan óoltiʼ.
20 [Maas jeʼel u béeytal] baʼax ku yaʼalik
juntúul j-maʼ ojéelajeʼ
[ke] máax ku tʼaan j-maʼ tuukulil.
21 Máax ku chaʼik [tiʼ] u palitsil u beet
baʼax u kʼáat [desde] tu chichnileʼ,
tu pachalileʼ yaan u yokʼtik.
22 Máax séeb u meyaj loob yéetel ku
jíiltaʼal tumen u tuukuleʼ,
ku léeksik baʼateloʼob yéetel ku beetik
baʼaloʼob kʼeechel.
23 Máax j-kaʼanal icheʼ, ku paʼajal u suʼtal,
baʼaleʼ j-kabal óoleʼ ku tsiʼikil.
24 Le máax ku táakpajal yéetel máax ku
yookoleʼ [u] pʼektmuba,
tumen kex u yuʼub loolob tʼaanoʼobeʼ maʼ
tu [yaʼalik].
25 Sajakil tiʼ wíinikoʼobeʼ junpʼéel léech,
baʼaleʼ máax ku yoksik u yóol tiʼ
[Jéeobaeʼ] ku kanáantaʼal.
26 Yaʼab máaxoʼob ku kaxtikoʼob u
beetaʼal uts tiʼob tumen
j-méekʼtáanoʼob,
baʼaleʼ chéen [Jéeoba] ku beetik baʼax
[toj].
27 Utsil máakoʼobeʼ maʼ tu bisikubaʼob
[yéetel] j-loolob wíinikoʼob
j-loolob wíinikoʼob xaneʼ maʼ tu
bisikubaʼob yéetel utsil máakoʼob.
30:1 U kóomkom kaʼanbesajoʼob Agur u
paal Jaqué, u kajnáal Masa.
Ka tu yaʼalaj Agur tiʼ Etiel yéetel tiʼ Ukal:
2 Teneʼ mix baʼal in biilal ichil tuláakal le
máakoʼoboʼ,
minaʼan tiʼ teen u naʼat wíinik.
3 Maʼ yanak tiʼ teen ojéelajiʼ,
mix baʼal xan in wojel tu yoʼolal [le Sen
Kiliʼichoʼ].
4 ¿Máax naʼakaʼan [yéetel] emaʼan xan
kaʼan?
¿Máax ku páajtal u lapʼik iikʼ yéetel u
kʼab?
¿Máax toʼik kʼáaʼnáab yéetel [junpʼéel
nookʼ]?
¿Máax tsʼáa u xuul luʼum?
¡Maʼ a waʼalik tiʼ teen wa a wojel u
kʼaabaʼ,
bey xan u kʼaabaʼ u paal!
 U xookil Biblia utiaʼal 14 tak 20 tiʼ noviembre
Eclesiastés 1:1-18
1:1-2 Leloʼobaʼ u kóomkom tseʼekil
u kaʼanbesajoʼob Salomón u paal David,
máax [reinarnaj] tu kaajil Jerusalén.
¡Kunel wayaʼas, kunel wayaʼas!
¡Tuláakal kunel wayaʼas!
3 ¿Baʼax utsil ku kʼamik wíinik ikil u sen
meyaj way yóokʼol kaabeʼ?
4 Tsʼeʼetsʼekeʼ ku síijiloʼob, tsʼeʼetsʼekeʼ ku
kíimiloʼob
baʼaleʼ le luʼumaʼ maʼatech u kʼexpajal.
5 Ku tíipʼil kʼiin, ku tʼúubul kʼiin,
séeb u suut tu kúuchil utiaʼal u kaʼa tíipʼil.
6 U tojil noojol ku yustaj iikʼ,
ku tsʼoʼokoleʼ ku sutikuba tu tojil xaman.
¡Ku sutulsuut le iikʼoʼ!
¡ku suut, ku suut tu kaʼatéen!
7 Tuláakal áalkab jaʼobeʼ ku binoʼob
kʼáaʼnáab,
baʼaleʼ kʼáaʼnáabeʼ maʼatech u tuul;
áalkab jaʼobeʼ ku suutoʼob tuʼux lukʼoʼob
utiaʼal u xíimbaltik láayliʼ le bejoʼ.
8 Minaʼan mix máak ku páajtal [u] yaʼalik
bukaʼaj náaksaj óolal yaan tiʼ tuláakal
baʼal;
mix máak ku yuʼubaj yaʼab wa ku yilaj
yaʼab
utiaʼal ka pʼáatak jach uts tu yóol.
9 Mix baʼal bíin anak wa maʼ yanak
kaʼachiʼ;
mix baʼal bíin beetaʼak wa maʼ beetaʼan
kaʼachiʼ.
¡Mix baʼal túumben way yóokʼol kaabeʼ!
10 Maʼ bíin páatak u yantal máax aʼalik:
¡Le baʼalaʼ jach yáax u beetaʼal!
Tu jaajileʼ leloʼ jach úuch beetaʼak,
beetaʼab maʼiliʼ síijikoʼoniʼ.
11 Le úuchben baʼaloʼoboʼ tsʼoʼok u láaj
tuʼubsaʼaloʼob, bíin láaj tuʼubsaʼakoʼob
xan tumen le bíin taalakoʼoboʼ.
12 Teen, aj tseʼekoʼ, [reinarnajen]
kaʼach Israel tu kaajil Jerusalén, 13 ka tin
jach kʼubajimba in xakʼalt kaxant yéetel in
kanik u nuʼuktajil tuláakal baʼax ku
yúuchul way yóokʼol kaabeʼ. ¡Sen nojoch
meyaj tu pʼataj [Dios] tiʼ wíinikoʼob utiaʼal
u paj u suʼtal yéeteloʼob! 14 Ka tin wilajeʼ
tuláakal baʼax ku beetaʼal way luʼumeʼ
kunel wayaʼas, bey ka a wóolt a lapʼ iikʼeʼ.
15 ¡Maʼ tu páajtal u tojkíintaʼal baʼax
kʼeechel, mix tu páajtal u xoʼokol jaypʼéel
baʼaloʼob yaan tiʼ baʼaxoʼob maʼ
tsʼakaʼaniʼ!
16-17 Ka tin waʼalaj tin bail: Jeʼelenaʼ,
nojoch baʼalen, u [maas] aj ojéelaj tiʼ
tuláakal le [reinarnajoʼob] Jerusalén táanil
tiʼ ten[oʼ]; tin jach kʼubajinba chéen utiaʼal
in tiaʼaltik ojéelajil yéetel kʼaj óolaj, bey
xan le baʼax mix baʼal u biilal yéetel j-maʼ
ojéelajil, chéen utiaʼal ka kʼuchuken in
naʼat bey xan lelaʼ, bey ka [u yóot] wíinik
u lapʼ le iikʼoʼ. 18 Jach tu jaajileʼ wa
nojoch ojéelajeʼ, nukuch xan chiʼibal
poolil; wa yaʼab baʼax a wojeleʼ, yaʼab
xan u mukʼyajil.
 U xookil Biblia utiaʼal 21 tak 27 tiʼ noviembre
Eclesiastés 10:12—11:10
10:12 U tʼaan aj ojéelajeʼ ku beetik u
lúubul utsil, baʼaleʼ u tʼaan
j-maʼ ojéelajeʼ [ku beetik] u bin kʼaasil tiʼ:
13 Ku chúunul u yaʼalik chéen choko pool
baʼaloʼob, ku tsʼoʼokol yéetel satal óol
tʼaanoʼob.
14 ¡Tiʼ j-maʼ ojéelajeʼ maʼ tu xuʼupul u
tʼaan! ¿Máax ku páajtal u yaʼalik baʼax
bíin úuchukeʼ, wa mix máak u yojel
baʼax ku taal u kʼiin?
15 Tu yoʼolal u sen meyaj le j-maʼ
ojéelajeʼ,
ku tuʼubul tak u beel u yotoch tiʼ.
16 ¡Óotsil le kaaj ku [reinartaʼal] tumen
juntúul paal, tuʼux xan ku sáastal
tiʼ u paalal [rey] tiʼ nonoj janaloʼob!
17 ¡Kiʼ yóol le kaaj yaan juntúul tsikbeʼen
[rey] tiʼ, yéetel u méekʼtáanoʼobeʼ,
maʼ tu chúunkʼintal u janaloʼob,
utiaʼal u kaʼa antal u muukʼoʼob, maʼ
utiaʼal u káaltaloʼobiʼ!
18 Tiʼ maʼakʼóoleʼ ku lúubul u yook najil u
yotoch: máax maʼ tu beetik
mix baʼaleʼ, ku lúubul tuláakal u yotoch.
19 Waajeʼ utiaʼal kiʼ jaantbil,
vinoeʼ utiaʼal u chʼujukkintaʼal kuxtal;
baʼaleʼ utiaʼal leloʼ kʼaʼabéet taakʼin.
20 Maʼ a waʼalik baʼal tiʼ [rey], mix yéetel
a tuukul. Maʼ tʼaan kʼaas tu yoʼolal ayikʼal
kex chéen ta juunal yanech,
tumen chʼíichʼoʼob ku xikʼnaloʼobeʼ jeʼel u
binoʼob u tsikbatoʼobeʼ.
11:1 Pul a woʼoch waaj ich jaʼ;
ku máanbal tsʼeʼetsʼek kʼiineʼ bíin a kaʼa
naktáante.
2 Jeʼel bukaʼaj ku páajtaleʼ tʼox baʼax
yaantech,
tumen maʼ a wojel baʼax loob bíin [taalak]
yóokʼol le kaajoʼoboʼ.
3 Wa chuup yéetel jaʼ le múuyaloʼoboʼ,
yaan u kʼáaxal cháak yóoʼ luʼum.
Ka lúubuk cheʼ xaman, wa ka lúubuk
cheʼ noojol,
jeʼel tuʼux ka lúubukeʼ tiʼ bíin pʼáatakiʼ.
4 Máax táan óoltik bix u yustaj iikʼeʼ maʼ
bíin pakʼalnakiʼ, máax xan paktik
múuyaleʼ maʼ bíin joochnakiʼ.
5 Jeʼel bix maʼ a wojel tuʼux bíin xiʼik
iikʼeʼ, mix bix u wíiniktal chaan pal ichil u
jobnel u maamaeʼ, mix baʼal a wojel [tiʼ]
baʼax ku beetik [Dios], máax beet tuláakal
baʼal. 6 Pakʼ a wiʼinaj tu jaʼatskabil, pakʼ
xan tu yoknaj kʼiin, tumen mix bikʼin bíin
ojéeltaʼak máakalmáak bíin maʼalob
jóokʼokiʼ, wa le ta yáax pakʼajoʼ, wa le ta
pachal pakʼajoʼ, wa tu kaʼapʼéelal bíin
maʼalobchajak. 7 Sáasileʼ junpʼéel baʼal
uts, maʼalob xan u sáasilil kʼiin utiaʼal
ichoʼob; 8 baʼaleʼ kex ka kuxlak wíinik
yaʼabkach jaʼaboʼobeʼ yéetel ka xiʼik utsil
tu kuxtal yéetel tuláakaleʼ, maʼ u najmal u
tuʼubultiʼeʼ u kʼiiniloʼob éekʼjocheʼenileʼ
yaʼaboʼob, tuláakal baʼax bíin taalakeʼ
chéen wayaʼas. 9 Táankelem, náays a
wóol kaʼalikil tʼaʼajech; tsʼáa uts ta kuxtal
kaʼalikil ka páajtal. Chaʼa u jíiltikech u
tsʼíibolal a puksiʼikʼal yéetel tuláakal baʼax
ka wilik, baʼaleʼ kʼaʼajak tiʼ techeʼ tu
yoʼolal tuláakal leloʼ [Dioseʼ] bíin u kʼáat tiʼ
teech baʼax ta beetaj. 10 Náachkunt tiʼ
teech tuukuloʼob ku bisikoʼob a wenel,
jóokʼes xan tiʼ teech yaj óolal, tumen tak
u [maas] maʼalobil u kʼiiniloʼob
táankelemileʼ chéen wayaʼas.
 U xookil Biblia utiaʼal 28 tiʼ noviembre tak 4 tiʼ diciembre
Cantares 2:1-17
2:1 Teneʼ u sak nikteʼilen u kabal
luʼumiloʼob Sarón, teneʼ u chak
nikteʼilen le táax luʼumiloʼoboʼ.
2 Ichil u láakʼ koʼoleloʼobeʼ, in x-yaabilajeʼ
bey chak nikteʼ ich kʼiʼixoʼobeʼ.
3 Ichil u láakʼ xiiboʼobeʼ in aj yaabilajeʼ
bey junkúul manzana yanil ichil u
cheʼiloʼob kʼáaxeʼ.
¡Bukaʼaj síis óol kin wuʼuyik in kutal
yaanal u boʼoy!
¡Bukaʼaj kiʼ chʼujukil u yich tin chiʼ!
4 Tu najil noj janaloʼob tu bisajen, u
paakat in tiaʼaleʼ chuup yéetel
yaakunaj
5 ¡Tsʼáaʼex in jaant pakʼachbil u kʼulimil
uvas utiaʼal in chʼaʼik in wóol,
tséenteneʼex yéetel manzanaʼob,
tumen táan in kíimil tu yoʼolal
yaakunaj!
6 ¡Ka u lóochen yéetel x-tsíik kʼab,
yéetel u x-noʼojeʼ ka u méekʼen!
7 U koʼolelileʼex Jerusalén,
séeb chiʼiteʼex tiʼ teen, tu kʼaabaʼ u
x-kéejiloʼob yéetel u x-yuukiloʼob
kʼáax,
maʼ a wajsikeʼex in x-yaabilaj,
¡chaʼex u wenel, chéen tu juunal ku bin
ajal!
8 ¡Táan u taal in aj yaabilaj!
¡Táan in wuʼuyik u tʼaan!
sitʼlankil u taal tu yóokʼol le puʼukoʼoboʼ,
sitʼlankil u taal tu yóokʼol le puʼukoʼ.
9 In aj yaakuntmajeʼ bey juntúul kéejeʼ:
bey juntúul chan kéejeʼ.
¡Tsʼoʼok u kóojol, tiʼ yaan tu paach le jool
najoʼ,
táan u chʼeeneb tiʼ le [ventanaoʼ],
táan u chʼúuk tu yáam le [rejaoʼ]!
10 In yaabilajeʼ tu yaʼalaj tiʼ teen:
Líikʼen, in yaabilaj; in yaabilaj líikʼen,
koʼox.
11 ¡Il a wil! Tsʼoʼok u máan [...] keʼel,
tsʼoʼok xan u máan u kʼiiniloʼob jaʼajaʼal.
12 Tsʼoʼok u xíitil le looloʼob teʼ kʼáaxoʼ,
Tsʼoʼok u kʼuchul u kʼiinil u yúuchul
kʼaay,
táan u yuʼubaʼal tiʼ le k-luʼumaʼ u kʼaay
mukuyoʼob.
13 Yaan u yich u cheʼiloʼob higo, ku
kʼiʼitpajal u kiʼibokil u lool pakʼal uva.
Líikʼen in aj yaabilaj; in aj yaabilaj
líikʼen, koʼox.
14 In x-sakpakal, ka taʼakbesikaba tu
yáam le nukuch tuunichoʼoboʼ,
ichil u kaʼanaliloʼob yéetel ichil u
kʼokʼlemakil le nukuch tuunichiloʼob
witsoʼ,
chaʼa in wilik a wich, chaʼa in wuʼuyik a
tʼaan.
¡Ku tsʼáaik kiʼimak óolal a wilaʼal!
¡Sen chʼujuk u yuʼubaʼal a tʼaan!
15 Chukeʼex le mejen chʼomakoʼoboʼ,
ku kʼaskúuntikoʼob u x-péet paachil
pakʼal uva,
le k-uva táan u [loolankiloʼoboʼ].
16 In aj yaakunajeʼ in tiaʼal, teneʼ u
tiaʼalen.
Letiʼeʼ ku tséentik u tamanoʼob ichil le
nukuch tuunichoʼoboʼ.
17 Kaʼalikil u kʼuchul le kʼiin yéetel u bin
le éeʼjochʼeʼeniloʼ, suunen in aj
yaakunaj;
béeychajkech jeʼel bix juntúul kéejeʼ,
jeʼel bix juntúul chan kéej
ku yáalkab ichil u kʼokʼlemakil u
tuunichiloʼob le puʼukoʼ.