'Ntintiri 'ntontari

Haju accattatu lu 'ngannalarruni

'ntintiri 'ntontari vogghiu sunari
beddi c'aviti lu pettu di ciuri
fora nisciti viniti a ballari

Fazzu lu pattu ccu certi pirsuni

vinti vasuni cu voli ballari
tutti li brutti li mettu a 'nagnuni
tutti li beddi li vogghiu accucciari

Accattari vorria 'na virrinedda

di notti la to porta spurtusari
vidiri figghia mia quantu si bedda
quannu ti spogghi prima di curcari

Ma temu ca non fussi tantu bedda

ca l'occhi non m'avissi tu annurvari
lassa la porta misa a spaccazzedda
ad occhi chiusi ti vegnu a truvari

Comu putiti dormiri sulidda

ca di li surgi v'aviti a spagnari
sacciu ca siti tantu scantulina
ca l'umbra stissa vi fa appaurari

Cci vinissi di sira tarduliddu

e la matina ppi tempu svigghiari
ca si lu lettu vostru è strittuliddu
cca c'è lu pettu miu pp'arripusari