SUPERBALITA CEBU 1

NITAHAN nga samdan sa Abellana Police station si Vincent Navales, igsuon ni Vanzant, kinsa usa sa
mga nangamatay sa pinusilay sa may J. Alcantara st., Barangay Sambag 1 nga nikalas og tulo ka mga
kinabuhi niadtong Lunes, Enero 21, sa buntag.

Matod ni Chief Insp. Eduardo Sanchez, hepe sa Abellana police station, nga naigo sa tuong paa dihang
gipusil ni Edwin Bacaltos.

Didto midangop sa balay sa iyang ig-agaw nga pulis sa syudad sa Naga si Vincent nga si PO3 Rommel
Patalinghug, nadestino sa 2nd Provincial Mobile Force Company aron mo-surrender.

Gidala una si Vincent sa South General Hospital sa syudad sa Naga tungod kay ang bala nag-ungot pa sa
tuong paa niini.

Tungod sa hangyo sa pamilya nga dalhon sa ospital si Vincent aron ma operahan ug makuha ang bala
gidala dayon kini sa Chong Hua hospital.

“Didto siya dagan kay naa man siyay ig-agaw nga pulis nga si PO3 Rommel Patalinghug nga na-assign
pud didto sa 2nd Provincial Mobile Force Company. Didto siya mi surrender. Naglisod nig sulti kay
samdan sa tuong bahin sa paa,” matod ni Sanchez.

Wa, matod pa, moangkon si Vincent nga siya ang nakapusil sa amahan ug anak nga silang Edwin ug
Shaun Bacaltos.

Apan giklaro ni Sanchez nga apil siya nga mapasakaan og kaso sanglit sila ang ningsulong sa balay sa
mga Bacaltos.

Nailhan na nila ang laing tulo nga padayon pang gipangita sa kapulisan apan wala lang una nganli ni
Sanchez.

Nakig alayon na si Sanchez sa kapulisan sa probinsya sa Sugbo alang sa pagpalapad sa ilang manhunt
operation batok sa tulo pa ka mga suspek. (AYB)