ANG HILIKUTON PARA SA DOMINGO DE RAMOS

Ang mga ministro kag mga sumilimba magatipon sa isa ka duog tuhay sang sa simbahan kon sa diin ang
pagpangbendita sang mga palma pagahimuon.

PANGBUKAS NGA AMBAHANON (Salmo 118:19-29)

Ang Pari magahambal sang masunod sa mga katawhan:

Pari: Mga hinigugma nga mga katawhan sang Dios: Sa sulod sang lima ka semana
sang kwaresma, ginhanda naton ang aton mga kaugalingon para saulogon ang
Semana Santa paagi sa aton paghinulsol sang aton mga sala, pagpenitensya, kag
pagpuasa. Sa sini nga adlaw yari kita nagtililipon sa pagsugod sa pagsaulog sini
nga balaan nga hilikuton kaupod sang tanan nga mga kasimbahanan.

Ang aton mahal nga Ginoo, sa sini nga adlaw madinalag-on nga nagsulod sa
balaan nga duog sang Jerusalem sa pagbug-os sang iya hilikuton bilang mesiyas:
ang mag-antos, mapatay, kag liwat nga mabanhaw.

Aton saulogon nga may kalipay kag pagtuo ining umpisa sang Semana Santa,
ang pagsulod ni Cristo sa Jerusalem, kag aton siya pagasundon nga may pagtuo
kag dayawon siya nga aton Hari kag Manlulowas.

Kabay nga sa sini nga tion maghiliusa kita sa iya pasyon kag kamatayon sa krus,
kag magpakig-ambit sa bag-o nga kabuhi sang iya gamhanan nga pagkabanhaw.

Katawhan: Hosana sa Anak ni David!

Bulahan siya nga nagakari sa ngalan sang Ginoo
O Hari sang Israel
Hosana sa kahitaasan

Pari: Ang Ginoo mangin yara sa inyo.

Katawhan: Kag mangin yara man sa imo.

Pari: Mangamuyo kita:

Tuytoyi kami, O Ginoo, kag buligi kami sa imo daku nga kalooy, O Dios sang
amon kaluwasan, agod makasulod kami nga may kalipay sa duog nga imo
ginhatag sa amon kon sa diin amon maangkon ang kabuhi nga walay
katubtoban; pinaagi kay Jesu-Cristo nga amon Ginoo.

Katawhan: Kabay pa.

Ang Balaan nga Ebanghelyo: Ang Madinalag-on nga Pagsulod (Marcos 11:1-11)

Ang Pagbendita sang Palma

Pari: Ang Ginoo mangin yara sa inyo.

Katawhan: Kag mangin yara man sa imo.

Pari: Maghatag kita sang pasalamat sa Ginoo nga aton Dios.

Katawhan: Matarong ini nga maghatag sa iya sang pasalamat kag pagdayaw.
Pari: Matarong gid ang pagdayaw sa imo, magakagagahom kag walay katubtoban
nga Dios, bangod sa imo paghigugma sa amon kon sa diin imo kami ginluwas
paagi sa imo Anak nga si Jesu-Cristo nga amon Ginoo. Sa sini nga adlaw
nagsulod siya sa balaan nga duog sang Jerusalem nga madinalag-on kag
ginpahayag nga Hari sang mga hari sadtong mga tawo nga nagladlad sang ila
mga panapton kag mga sanga sang palma kag sa mga dalanon. Amon gina-
ampo nga bendisyunan ining mga sanga sang palma kag oliba kag itugot nga
ang imo mga katawhan nga nagadayaw sa imo sa ila mga lawas, kabay nga
makapangalagad sa imo sa ila mga panghunahona. Itugot man nga ini sila
mangin tanda sang iya kadalag-an bilang Hari sang mga hari. Pakamaayuha
kami nga magagamit sini, magpadayon sa pagdayaw sa iya bilang amon Hari
kag magsunod sa iya dalan padulong sa kabuhi nga dayon; siya nga nagakabuhi
kag nagahari kaupod mo kag sang Balaan nga Espiritu, isa ka Dios, nian kag sa
walay katubtoban.

Katawhan: Kabay pa.

Diri sini nga bahin pagabenditahan sang Pari ang mga palma.

Ang Prusisyon

Pari: Maglakat kita sa paghidait sa Ngalan ni Cristo.

Katawhan: Kabay pa.

Bayawon sang mga tawo ang ila mga palma kag sambiton sang matunog ang mga masunod:

Tanan: Hosana sa kahitaasan!

Bulahan siya nga nagakari sa Ngalan sang Ginoo!
Hosana sa kahitaasan!

Ang pagprusisyon pabalik sa simbahan.

Sa pag-abot sang prusisyon sa simbahan, angtanan magatindog sa atubang sang sirado nga ganhaan samtang
magabayluhanay sang pagkanta ang mga tawo sa sulod kag sa gwa sang simbahan. Mahimo ambahon ang Gloria,
Laud et Honor.

Sa tapos ang ambahanon, pagatultogon sang Pari sang makatlo ka beses ang ganhaan sang simbahan. Pagabuksan
ang ganhaan kag magsulod ang katawhan kag mga ministro. Magapadayon ang hilikuton sa pagbasa sang
pangamuyo sa amo nga adlaw.

Ang Pangamuyo

Pari: Ang Ginoo mangin yara sa inyo.

Katawhan: Kag mangin yara man sa imo.

Pari: Mangamuyo kita:

Makagagahom kag walay katubtoban nga Dios, bangod sang imo walay tupong
nga paghigugma sang katawhan, imo ginpadala ang imo anak kag amon
malulowas nga si Jesu-Cristo nga magsul-ob sang amon kinaugali sa iya
kaugalingon kag mag-antos sang kamatayon sa krus, kag maghatag sa amon
sang halimbawa sang iya walay tupong nga pagkamapainuboson; Maluloy-on
nga itugot sa amon nga amon man mausoy ang dalan padulong sa iya kasakitan,
 kag makapakig-ambit sang iya pagkabanhaw; paagi kay Jesu-Cristo nga amon
Ginoo, siya nga nagakabuhi kag naga hari buylog sa imo kag sang Balaan nga
Espiritu, isa ka Dios, nian kag sa walay katubtoban.

Katawhan: Kabay pa.

Nahauna nga Balasahon:

Ikaduha nga Balasahon:

Ang Pasyon:

Ang Pangamuyo sang Katawhan:

Pari: Mga hinigugma nga mga kautoran: Sa aton pagsaulog sang mga pag-antos,
kamatayon kag pagkabanhaw sang aton Ginoo, mangamuyo kita agod kita nga
ginbunyagan sa iya ngalan, kaupod sang bug-os nga kalibutan, makaambit sang
kabuhi nga iya ginhalad para sa aton. Ang aton sabat: GINOO, MALOOY KA.

Pangulo: Para sa balaan nga Simbahan sang Dios diri kag sa bug-os nga kalibutan, agod
magmanginmatinlo sang dugo ni Cristo, kag mangin bag-o paagi sa iya
pagkabanhaw, mangamuyo kita sa Ginoo.

Katawhan: Ginoo, malooy ka.

Pangulo: Para kay ________ nga aton Obispo Maximo, kay ________ nga aton Obispo, kag
sa tanan nga mga pari kag ministro sang Dios agod maghimud-os sila sa
pagsunod sang mapainuboson nga kabuhi ni Cristo, mangamuyo kita sa Ginoo.

Katawhan: Ginoo, malooy ka.

Pangulo: Para sa mga pagabunyagan kag magabaton sang selyo sang Espiritu sang
pagkabanhaw, agod sila magtubo sa pagtuo kag paghangop, mangamuyo kita sa
Ginoo.

Katawhan: Ginoo, malooy ka.

Pangulo: Para sa aton pungsod kag sa tanan nga kapungsoran sa kalibutan, agod , paagi
sa dugo sang krus, ang matuod nga paghidait kag pag-ulolutod mapasad,
mangamuyo kita sa Ginoo.

Katawhan: Ginoo, malooy ka.

Pangulo: Para sa mga masakiton kag magaantos, mga makalulooy kag ginpabayaan, mga
nagakinahanglan kag mga ginapigos, agod ang pagpakasakit ni Cristo magpa-
isog kag magsakdag sa ila, kag ang ila kasubo pagabayluhan sang kalipay,
mangamuyo kita sa Ginoo.

Katawhan: Ginoo, malooy ka.

Pangulo: Para sa tanan nga nagtililipon diri, agod sa aton pagpakigbahin sa pagpakasakit
ni Cristo, makaambit man sang kalipay sang iya pagkabanhaw, mangamuyo kita
sa Ginoo.
Katawhan: Ginoo, malooy ka.

Pangulo: Para sa mga nagtalaliwan, agod sila man makaambit sang kadalag-an sang iya
pagpakasakit kag maangkon ang grasya sang pagsunod sa mga bulahan nga
santos sa dalan sang krus, mangamuyo kita sa Ginoo.

Katawhan: Ginoo, malooy ka.

Pangulo: Manunobos sang kalibutan, paagi sa imo krus kag bilidhon nga dugo, imo kami
ginluwas.

Katawhan: Luwasa kami, kag buligi kami, mapainuboson nga nagapangamuyo kami, O
Ginoo.

Pari: Makagagahom nga Dios, ang imo pinalangga nga Anak wala naglakat padulong
sa kalipay apang una nga nag-antos sang kasakit; kag wala nagsulod sa
kahimayaan sa wala pa siya ginlansang sa krus; Itugot sa amon nga
nagapanglakaton sa dalan sang pagpakasakit, makalab-ot padulong sa dalan
sang kabuhi nga walay katubtoban; paagi kay Jesu-Cristo nga amon Ginoo.

Katawhan: Kabay pa.

Magapadayon ang pagsaulog sa bahin sang Paghidait.