Sa kasalukuyang panahon, kapansin-pansin ang pagbaba ng halaga ng ating Wikang Pambansa
kung ito’y ituring ng ating pamahalaan. Nanganganib na ang kalagayan ng ating wikang Filipino, bilang ating Wikang Pambansa sa kasalukuyan, nang ito’y tanggalin ng Commision on Higher Education (CHED) bilang isang mayor na asignatura sa kolehiyo sa pamamagitan ng CHED Memorandum Order (CMO) No. 20, Series of 2013. Dahil dito, nagkaroon ng grupong tinatawag na Tanggol Wika na layuning maibalik at maipaglaban ang Filipino bilang isang mayor na asignatura hindi lamang sa elementarya at sekundarya ngunit sa tersiyaryong antas din ng paaralan. Kanilang isinasabi na ang CMO na ito ay lumalabag sa Artikulo XIV, Seksyon 6 ng 1987 Konstitusyon na nagsasabing dapat simulan at ipagpatuloy ng ating pamahalaan ang paggamit sa wikang Filipino bilang wikang pang-komunikasyon at wikang panturo. Bagamat nilalayon ng CHED na mapabuti ang kalagayan ng ating edukasyon, nalalagay naman ang ating wika sa mga bagay na hindi napagtutuunan ng mabuting pansin. Bilang kaluluwa ng ating kultura, ang ating sariling wika ay kailangan nating mapaunlad kasabay ng paglinang ng ating sistema ng edukasyon. Maraming nagsasabi na mahirap gamitin ang wikang Filipino sa pagtuturo ng ilang mga asignatura, lalo na sa mataas na paaralan. Marahil ito ay dahil sa mga konseptong ating nakuha at nahiram lamang sa mga dayuhan, lalo na ang mga konseptong siyentipiko at matematika. Ngunit hindi ito nangangahulugan na imposibleng magamit ang ating wika sa pagtuturo ng mga asignaturang ito. Gamitin nating halimbawa ang pagtuturo ng agham. Sa ngayon, hindi pa gaanong kilala ang bokabularyong Filipino ng mga terminong pang-agham sa mga Pilipino, tulad ng initsigan (thermodynamics), kapnayan (chemistry), at sipnayan (mathematics). Isang paraan upang ito ay lubos na makilala ay ang pagbibigay pansin ng ating pamahalaan, paaralan, at ng ating mga sarili sa kahalagahan ng paggamit nito bilang wikang panturo. Ang pagpapatupad ng patakaran tungkol sa mandatoryong paggamit ng wikang Filipino bilang wikang panturo sa agham, matematika, at iba pa sa mataas na paaralan ay isang daan patungo sa intelektwalisasyon ng wikang Filipino. Ang hakbang na ito ay umaabot ng napakahabang oras at dumadaan sa maraming proseso upang magawa nang maayos, subalit isa itong epektibong paraan upang ating mapaunlad hindi lamang ang ating wika ngunit ang ating sistema ng edukasyon din. Ayon sa pagsaliksik ni Kocakulah et al. sa bansang Turkey, nalaman nilang mas malawak at mas angkop ang pagkakaintindi ng mga mag-aaral sa mga kahulugan ng mga konseptong siyentipiko kung ito ay ituturo gamit ang kanilang katutubong wika kumpara sa kung ito ay ituturo gamit ang dayuhang wika (21). Bagamat karamihan ng konseptong siyentipiko ay abstract, naipakita ng pag-aaral na ito na nakatutulong ang paggamit ng kinalakihang wika upang ang mga ito ay mas maunawaan. Dito natin makikita ang potensyal na kalamangan ng paggamit ng wikang Filipino sa pagtuturo kumpara sa wikang Ingles. Bukod dito, marami pang ibang modo ng pagtuturo ng isang konsepto o aral. Makatutulong ang paggamit ng mga aktibidad na ipinapadaan sa iba’t-ibang midyum (tunog, biswal, galaw ng katawan, at iba pa) upang mas lumawak ang pagkakaintindi ng bawat mag-aaral. Sa mga ganitong aktibidad, mas epektibo ang paggamit ng wikang Filipino bilang wikang pang-komunikasyon at wikang panturo dahil dito malilinaw ang pagkakaugnay ng konsepto ng asignatura sa tunay na buhay o pang araw-araw na buhay, lalo na’t ang wikang Filipino ang ating ginagamit sa ating pang araw-araw na buhay. Nakita natin na hindi kailangang masakripisyo o mapabayaan ang wikang Filipino sa pagpapaunlad ng ating sistema ng edukasyon. Sa halip, napatunayan natin na ang pagpapaunlad ng wikang Filipino ay makatutulong din sa pagpapaunlad nito. Dito makikita ang kahalagahan ng Filipino para sa ating mga buhay at sa ating edukasyon. Works Cited
Kocakülah, S. et al. “The effect of teaching in native and foreign language on students' conceptual
understanding in science courses.” Asia-Pacific Forum on Science Learning and Teaching, vol. 6, no.