Ding Dayang Capampangan

“Quing pusu mu, payapa ing lub cu”,

Anting capayapan quing biye cu.

Icang santungan at ‘cang sicanan

Caring balang luban cung labanan

“Balang damdaman que siwala mu”,

Masaya yang lulucsu ing pusu,

Uling balu cu miyuli nacu,

Quing Capampangan a santungan cu.

Quing balang iscuelang luluban,

Ing lub cu mididinang sicanan,

Ustung ring abe cu capampangan,

At ustung ring tuturu, yanaman.

Quaring lugar a pupuntalan cu,

Ding capampangan a capatad cu,

Ila pu ring sasawup quanacu,

Quaring problema’t pamagobra cu.

 Anya ngeni, ecu pu tatacut,

Uling dacal lang macasalicut,

Dayang capampangan quing labuad,

Na nucarin cu man pu misadsad.