Ruel H. Subito, mga kagalang-galang ng Punong-Guro at Ulong-Guro, mga mahuhusay na tagapagdaloy, mga kapwa ko masigasig na guro magandang hapon po sa inyong lahat. Kumusta po tayo ngayon? tayo ba ay puno na? punong- puno na? batid ko po na punong-puno na tayo ng kaalaman sa makabagong pagtuturo ng asignaturang Filipino. Ang ilan sa atin ay may alam na subalit hindi pa buo at sapat, kung kaya sa unang araw pa lang ng Palihan ay ating nang inihanda ang ating sarili sa pagtanggap ng bagong kaalaman, karunungan at positibong pananaw tungo sa matagumpay na paghubog ng matatag at maunlad na kabataang Pilipino. Ang Palihang ito ay nagsilbing gabay at lakas nating mga guro na linangin at buhayin ang pagnanais ng ating mga mag-aaral hindi lang sa masining na pagbasa, pagsulat at pagbigkas kundi pati na rin sa pagmamahal sa kahalagahan ng wikang Filipino. Sa ating pag-uwi naway bitbit natin ang kawili-wili, kapanapanabik at kagiliw-giliw na pagsisimula ng pagbabago sa ating sinumpaang tungkulin. Bilang isang guro na nagtapos ng Batsilyer ng Edukasyong Pangsekundarya-Medyor sa Englis, 7 taong nagturo sa asignaturang Englis at ngayon ay magdadalawang taon nang nagtuturo sa Filipino, ang hamon na ito ay napapanahon sa wari ko…kaya’t walang pag-aalinlangan at buong puso ko itong tinatanggap. Maraming salamat at mabuhay tayong lahat!