Timenna n Uɣdim

Ay anda qqnen ay bran

Ugellid d terbaɛt-is
La tezzin deg yiwen umkan
La ttbeddilen i wass isem-is
Ckunetḍen deg yifurkan
Summen i tejra adif-is
Ay anda qqnen ay bran
Isem-nnsen ad d-yini
Isnuraf1 anda ma llan
Teẓẓun deg uɣref tugdi
S yis-s kan i la ttgallan
Imi akken niḍen d awezɣi
Ay anda qqnen ay bran
Mačči ad beddlen tikti
Lemmer ufin akk ayen illan
Ad asen-yanez i nutni
Ad d-kken nnig iɣerfan2
Ɣef tmurt ad uɣalen d Ṛebbi
Ay anda qqnen ay bran
Si zik n zik akkagi
Aɣref , i uɛebbi kan
Ulayɣer ad yesɛu tikti
D nutni kan i yeẓran
Kra i d-qqaren d tamussni
Ay anda qqnen ay bran
Akka i as-ufan ixef-is
Aɣref-nni akken yelhan
D win issadren i wallen-is
Imi nutni ččan ṛwan
Ma d wayeḍ laẓ d arfiq-is
Ay anda qqnen ay bran
Ad rnun yir azmumeg
Kkaten s wayen i d-ufan
Mi teḥma ad iɣiwel ad yedreg
Mi teksa tṛebba iffan
Ad d-iger afus ad tt-yeẓẓeg

Ay anda qqnen ay bran

Di lekdeb i ttleqqimen
Tidet werǧin i tt-id-nnan
Yal mi d-tban ad tt-kksen
M’ulac ad d-tessker iẓuran
Nutni s ufella ay rsen
Ay anda qqnen ay bran
D ilexxaxen zgan umsen
Deg-sen ala ilefḍan
Tiwekwin d ikeččawen
Akken ma llan d imeɛfan
Tezdeg werǧin i tt-ssinen

1
Imesbaṭliyen
2
Iɣerfan , aɣref = agdud
 Ay anda qqnen ay bran
D adebbuz kan ay ssnen
Deg wallaɣ d ilem i yellan
D zzur kan ssi bedden
Di tmurt snejlan laman
Mi texsi tmes ad tt-ceɛlen
Ay anda qqnen ay bran
Nekkni nɣill beddlen tikli
Nenwa yak beddlen wussan
Neṛǧa abeḥri n tlelli
Mi d-isuḍ waḍu arɣayan
Nezlef s tmes i d-yewwi
Ay anda qqnen ay bran
Aḥlil-nneɣ ziɣ neṭṭes
Mi nerǧa liser ad d-iban
Tagnit simmal tkerres
Nedha deg wayen i d-snulfan
Tafat fell-aɣ tessulles3
Akka akka i tettezzi
Agellid ma ad yerr aḍar
Ɣef wakka i tt-id-yewwi
Wissen azekka ma ad aɣ-yeṣṣer
Asirem simmal ittnegzi4
Mi nqerreb netta iwexxer

3
ssulles, tillas = ṭṭlam
4
nnegzi = nqes(qqarent ladɣa deg uzeṭṭa)