Ang Among mga Binuhing Hayop

May mga binuhi kaming hayop. Kugihan kayo si Tatay ug si Nanay

mamuhi. Gitudluan usab kami nila nga importante ang pagpamuhi.
Makatabang sa pagkaon ang pagpamuhi, ug makadugang pa sa kita sa
pamilya. May buhi kaming mga manok. May usa ka sunoy ug upat ka
himungaan, ug may daghang mga piso. May gagmay ug may dagko nga
piso. May bag-ong tali, ug may dumaga ug bayong-bayong na nga manok.
Tahop sa humay ug tahop sa mais ang among ipakaon sa among mga
manok. Usahay amo pud kining hatagan ug mais o humay. May mga itik
usab kami. May lima ka baje nga itik, may usa ka laki ug may daghang
piso. Tahop pud ang among ipakaon sa among mga itik. Tagaan usab kini
namo ug salin-salin o bahaw nga pagkaon ug bukog sa isda. Among pud
kining pakan-on ug inad-ad nga tangkog o ganas. Itlog ug karne ang
makuha namo sa manok ug sa itik. Duna poy bibi sa amo. May usa ka laki
ug upat ka baje nga bibi. Kusog moitlog ang bibi labi na kun busog pirmi.
Apan ang bibi dili molomlom sa ilang itlog. Kun mangitlog ang bibi, amo
lang kan-on ang itlog. May kausa nga nagpa-piso si Tatay ug bibi. Iyang
gipalumluman sa itik ang itlog sa bibi, hangtud nga migawas ang piso.
Pareho sa pagkaon sa itik ang among ipakaon sa bibi. Usahay tagaan pud
kini namo ug kuhol kun kami makada ug kuhol gikan sa humayan.

May buhi usab kaming duha ka baboy. Tua kini mahimutang sa alad
sa luyo sa among balay. Among ibaligya ang mga baboy inig dako niini.

May iro usab kami. Ang iro ang magbantay sa among balay. Duna
pud kami iring. Kinahanglan kuno ang iring aron dili puy-an ug daghang
ilaga ang among balay. Kabang ang ngalan sa among iro ug Miming ang
ngalan sa among iring. Pabakunahan namo ang among iro kada tuig.