HIST 1 S1 Batas Militar Napakaraming dokumento, bidyo at iba’t-ibang materyales na ang nabasa, narinig at napanuod ang nagmulat sa akin kung ano ang ganap na nangyari noong panahon ng Batas Militar Sa paulit-ulit na pagsaksi ko sa mga bangungot ng rehimeng Marcos, paulit-ulit rin na galit, poot at awa ang nararamdaman ko. Sa muli kong paggunita noong nakaraang Setyembre sa pamamagitan ng panunuod ng isang dokumentasyong na pinamagatang “Batas Militar”, may tatlong bagay akong nais bigyang pansin. Ito ang liwanag, ang pag-aagaw ng dilim at liwanag, at ang dilim. Unang bagay ay ang liwanag, natamasa ni Marcos ang magandang edukasyon at nakitaan na siya ng kahusayan at katalinuhan bata pa lamang. Namulat siya sa karunungan, nakatapos ng Abogasya sa Unibersidad ng Pilipinas at naging topnotcher sa bar exam. Mababatid rito na may maliwanag na kinabukasan na masisilayan. Ikalawa ay ang dapitahapon na nagsimula noong pinagtanggol niya ang sarili sa kasong ibinintang sa kanya, naging sundalo, naging politiko at noong 1965 ay nanalo sa halalan bilang Presidente ng Pilipinas. Sa unang termino ay nagpatayo siya ng tulay, paaralan, gusali at istruktura sa pamamagitan ng pag-utang sa dayuhan. Nagsimula na sa panahong ito ang unti-unting paglamat ng korapsyon at pasismo sa gobyerno. Ang huling dako ay ang dilim. Walang ibang naging bunga ang rehimeng Marcos kundi ang pagbagsak ng ekonomiya, extra-judicial killings at opresyon. Tila, ang natanaw na liwanag na napulot niya gamit ang edukasyon ay huwad lamang, Ang sinag na ito ay hindi pag- asa kundi isang apoy na sumunog sa bawat pangarap at nag-iwan ng madilim na nakaraan. Tulad sa kwento ng apoy at gamugamo mula sa nanay ni Jose Rizal, ang pag-abot ng gamugamo sa liwanag ay pumatay sa kanya subalit sa kaso ni Marcos, ito ang ginamit niya upang pasuin ang kalagayan ng Pilipinas gamit ang kanyang administrasyon Hanggang sa ngayon ay patuloy pa ring pumapaltos ang apoy na ito at hindi natin maikakaila na mas pinaalab pa ito ng kasalukuyang administrasyon. Ang naganap na lagim na ito ay isang serye ng transisyon mula sa liwanag tungo sa dilim. Ang liwanag ay sumisimbolo sa magandang edukasyon na nakamit ni Marcos sa isa sa pinakamagandang paaralan sa bansa, ang Unibersidad ng Pilipinas. Ginamit niya ang karunungang ito upang makamit ang kapangyarihan na nagsadlak sa Pilipinas sa hirap at opresyon. Nawa ay wala na sanang susunod nang susunod na iskolar ng bayan ang tumulad sa kanya at manaig sa bawat Pilipino lalo na sa mga kabataan ang paglaban sa mga tulad niya. NEVER AGAIN TO MARTIAL LAW!