Jamita Tu Minggu 3 D Trinitatis, 07 Juli 2019

Ev. Ul Ap 17:22-30; Ep. Jes 50: 7-10 (10); Patik I-X

Hasatiaon tu Debata Sipanopa, Nampuna dohot Namarhuaso tu Saluhut

1. Patujolo
Kota Aten ima sada luat natinuju ni Ap.Paulus dibagasan rute pardalananna uju marbarita nauli, diluat
Aten adong sada dolok namargoar Aeropagus, dolok na metmet na pinakke ni halak Aten gabe inganan
parsombaon dohot pamelean tu dewa Mars. Diinganan na nirajuman nasida, sada inganan na badia dison ma
marojahan mahkamah ni kota Aten na tong digoari Aeropagus namangurus persoalan parugamaon dohot
tatanan kenegaraan ni Aten. Mahkamah Aeropagus on ima sada lembaga natumua di Aten, namangihuthon
tradisi pinajongjong ni dewi pelindung kota, ima dewi Aten.
Di Aeropagus on ma Ap.Paulus marjamita tu halak Aten, nionjar ni lungun ni roha (kesedihan) siala
marnida ganaganaan sombaon pinatupa nasida namansai godang. Tung marsitutu so Ap.Paulus maringkon
manariashon barita nauli jala tanggap do halak Aten diparbaritaon i, ala memang naringgas do halak Aten
tumangihon angka barita naimbaru, dibahen i dijou nasida do si Paulus rot u Aeropagus lao patoranghon
pangajaran nabinoanna i.

2. Hatorangan
Andorang somarjamita di Aeropagus, nunga dimulai si Paulus manghatahatai dohot halak Jahudi di
inganan peribadatan dohot halak Aten di Onan Agora (pusat keramaian Atena). Marmula sian ima panjouon tusi
Paulus tu Aeropagus lao patoranghon poda naimbaru nabinoannai. Dipatolhas apostel ido rasa salutna tu halak
Aten, namarsitutu marsomba tu angka pinardebata nasida. Laos dipabotohon naniida na taringot tu langgatan
pamelean tu “Debata naso tinanda”, lapatanna selain angka dewa dewi Aten naung binoto nasida, diongkuhon
do adong debata naasing sotinanda nasida. On ma dipangke si Paulus dalan patoranghon barita nauli i tu nasida.
Debata nasinomba nasida naso tangkas tinanda nasida ima Jesus Kristus Tuhan Sitompa langit dohot tano naso
olo maringanan di angka joro pinauli ni tangan (kuil kuil). Debata namarhuaso do Ibana naso
mangharingkothon hinobasan ni tangan ni jolma, alai Debata haroroan ni ngolu saluhut ni manisia do Ibana.
Sipanopa saluhut jala marmula sian jadijadianNa do angka bangso na diportibion. Naboi luluan jala dumonok tu
jolma na mangalului Ibana, Debata nasa bangso dohot manusia songon panindangion ni ende ni halak Aten.
Penariason ni Ap.Paulus pasintonghon syair ni ende nasida i, jala ido sintongna sian mulana pe Debata
tumompa si Adam tumiruhon rupaNa dohot tumudoshon pangalahoNa (Tselem dan Demuth).
Pangajaran on dipertegas si Paulus lao mangarahon nasida manulak haporseaon tu debata ganaganaan
sian sere, perak, batu pinandean dohot piningkiran ni jolma. Laos dipatorang si Paulus do ia panorangionnai
silehonlehon ni Debata namanalpuhon haotoon jala gabe parmulaan ni habibinsar ni parbinotoan taringot tu
Debata namangolu naingkon sijangkonon songon tanda ni hamubaon ni roha.
3. Siauhononhon
1. Debata namangolu jala namarhuaso do Jahowa. Debata nasoboi binatasan ni ruang, partingkian dohot inganan,
Debata naboi manjonok jala saor tu jolma manisia namangalului Ibana, manjonok marhite Jesus Kristus lao
patupa haluaonta sian hamagoan alani dosa, jala saor marhite Tondi Parbadia laho mangaramoti jala manogu-
nogu hita. Dibahen i talului ma Jahowa sian nanidok ni si Jesaya: “Sai lului hamu ma Jahowa binsan tarbaen
jumpang dope Ibana, jou hamu ma Ibana binsan jonok dope Ibana (Jes 55:6). Antong talului ma Tuhanta i
dibagasan unduk serep ni roha dungi papataronNa ma hadirionNa tu hita.
2. Partingkianta nuaeng digoari zaman milenial, zaman na maju jala diperlengkapi alat alat teknologi (digital),
dihorhon partingkian namajuon do jolma marsomba tu na ragam, ndada be tu Debata Jahowa. Sinombana ima
angka mammon, sere, jabatan, huaso (otoritas), teknologi, hapistaran dohot hadirion ni jolma i sandiri. Asa
mansai ombuk do turpuk on paingothon nang hita saluhutna asa marsomba holan tu Debata sipanopa jala
parnampuna huaso tu saluhut. Ai tinopaNa do hita, jala sibasabasaNa do di hita portibion, hapistaran,
perkembangan zaman, habisuhon dln. Alani tapangke mai lam pasolhothon hita tu Debata Tuhantai.
3. Dihaporseaonta didok do ia Debata ima Allah yang transenden dan Allah yang imanen lapatanna Allah jauh
tidak berantara dengan manusia, dekat tetapi tidak bersentuhan. Sian hatimulon nang hatimboonNai jumonok
do Ibana tu hita dibagasan Jesus laho manghilalaon ragam sitaonon na porsuk nasonson di hita,
dihajonohonNa i saor do Ibana tu bagasan hita dirohanta marhite TondiNa laho manogu, mandongani jala
manuturi hita. Antong tama manongtong Ibana pujionta ai dang adong Debata ditanoon nasongon Ibana gok
holong, asi ni roha tu angka na tinompaNa namangolu dibagasan hasatiaon. Amen