BAHAN SERMON EPISTEL MINGGU XIX DUNG TRINITATIS

SARESORT HKBP IMANUEL HUTAGURGUR

2 Musa 4:10-17

Topik Minggu : Gabe Parbarita nauli

I. PATUJOLO

Debata manjou, mamilit, jala marsuru si Musa laho mangulahon bangso Israel haruar sian tano Misir tu
tano Kanaan. Di patuduhon Debata do diriNa tu siMusa uju marmahan birubiru ni simatuana ibana di dolok
Horeb, ndang pintor olo si Musa di parsuruon ni Debata i, di jua ibana do. Alai nang pe sai manjua si Musa,
marpanganju do Debata di si Musa, ndang sundat parsuruon jala pamilitonNa i. Sai dilehon Debata do alus
papos ni roha ni si Musa jala di ujungna unduk do si Musa di parsuruon ni Debata.

II. HATORANGAN NI TURPUK

Ayat 10, di sadari si Musa do hahurangan ni ibana jala di tanda dirina nahurang malo manghatai. Na diboto
si Musa do dang tau ibana di parsuruan ni Debata ai tung mansai balga jala badia do parsuruani. Molo laho
mangatai tu raja Mesir dohot tu raja Parau tontu ingkon na malo ma manghatai hape sadar si Musa dang
adong keahlian na manghatai.

Ayat 11-12 “Debata Mangalehon Na ringkot di parsuruonNa”

Dipapos Debata roha ni si Musa marhite na paingothon ibana di huaso dohot hagogoon Debata. Di paingot
Debata do si Musa paboa Debata do na manompa jolma dohot na mangalehon kemampuan tu jolma i,
termasuk ma tu si Musa. Di pasunggulhon Debata tu si Musa paboa pargogo so hatusosan do Ibana.

Nang pe ditanda si Musa dirina ima naso ahli marhata, alai ala naung di jou jala di suru Debata ibana tontu
lehonon ni Debata ma keahlian marhata tu ibana. Molo marsuru Debata di naposoNa pasti do di
perlengkapi Debata nasa naringkot di naposoNa i, lapattanna, dipapos Debata rohan ni si Musa, molo tung
pe dang malo ibana marhata, tuk do huaso ni Debata mangalehon kemampuan marhata tu si Musa.

Ayat 13 tong do manjua si Musa jala mandok ua na asing ma suru. Nang pe nunga marragam alus ni Debata
paposhon roha ni si Musa di parsuruonNa. Dang adong be alasan di bahen sandok unang ahu, na asing ma i
do didok si Musa.tung apala di pangkilalahon si Musa do dang talup ibana di parsuruan ni Debata i
namansai balga i.

Ayat 15-17 tarrimas do Debata umbege alus ni si Musa i, alai ndang gabe disundati Debata panjouon jala
parsuruon i. Dipillit Debata ma si Aron, hahana gae juru bicara ni si Musa. Na ro ma si Aron manjupangi
ibana jala disi ma dipabotohon ni si Musa sude panghataion dohot Debata tu si Aron. Saut do tutu ro si Aron
mandapothon si Musa di udut ni turpuk on (2 Musa 4:27-31). Laho manambai pos ni roha ni si Musa
dungkon di pabangkit Debata si Aron gabe juru bicarana di ayat 17 di pabotohon Debata ma na godang
tanda si patupaon ni si Musa marhite tungkot na pinasahat ni Debata tu ibana.

III. SIPAHUSORHUSORON

Ndada holan si Musa dijuo Debata gabe naposoNa. Sude do halak Kristen tarjou gabe naposoNa laho
mamboan barita haluaon sian Tuhan Jesus Kristus. Molo si Musa tarjou tarjou manguluhon bangso Isarel
haruar sian tano mesir, hita tarjou mamaritahon haluaon naung tajalo di bagasan Tuhan i. Ianggo sian
hadirionta ndang tau hita laho marbarita na uli, alai ndang pasombuan Debata halak na olo suruonNa.
Unang be manjua hita. Tapabotohon ma angka hahuranganta i tu Debata asa Ibana na pasinghophon.
lehononNa do gogo, habisuhon na ringkot di parbaritaon na uli i. Dipasahat Debata do tu hita tondi Parbadia
laho margogoihon, mandongani, manogunogu hita asa gabe parbarita na uli. Amen