Magbibigay leksyon ang edukasyon ng nagdaang ebolusyon.
Matatandaang sinang-ayunan at nilagdaan noon lamang Abril ng taong ito, sa House Committee on Basic Education and Culture ng Mababang Kapulungan, ang House Bill No. 1022 o ang ipinapanukalang "National Writing System Act" na naglalayong gamitin ang Baybayin bilang opisyal na pambansang sistema ng pagsulat sa bansa. Ayon sa National Commission for Culture and the Arts (NCCA), “Ang baybayin ang sinaunang alpabeto ng mga Pilipino bago pa man dumating ang mga Espanyol at bago pa man sa atin maituro ang alpabetong Romano. Mula ito sa salitang ‘baybay’ ng mga Tagalog na nangangahulugang ‘lupaing nasa gilid ng dagat’ at ‘pagbaybay’ na nangangahulugang ‘ispeling.’” Sa katunayan, sinasalamin nito ang kahalagahan ng nakaraang kulturang kinakailangang bigyan muli ng kulay at buhay upang makita sa kasalukuyang panahon ang makalumang pamumuhay ng isang tunay na mamamayang Pilipino. May mga iilang tumututol sa pagbabalik muli ng Baybayin sa sistema sapagkat mas mahalaga ‘di umano ang pagpapayabong sa mga bagay na pangkasalukuyan at pagpapaunlad sa panghinaharap na edukasyong pambansa. Samakatuwid, kung walang nakaraan ay wala ring kasalukuyan at walang kinabukasan. Maituturing nang isang matibay na haligi ng kasaysayang Pilipino ang pagkakabuo ng mga teoryang nagpapatunay sa paggamit ng 'Baybayin'. Ayon sa Teorya ng Pandarayuhan ni Dr. Henry Otley Beyer, ang mga sinaunang taong nanirahan sa ating bansa ay napatunayang marunong bumasa at sumulat. Napatunayan din na ang naturang sistema ng pagsulat ay kanilang ginamit at ang biyas ng kawayang matatagpuan sa Museo ng Aklatang Pambansa at Unibersidad ng Santo Tomas ang makapagsasabi ng mga bagay patungkol dito. Sa kabilang banda, kinakailangan ding maipaliwanag nang mabuti sa mga mamamayan ang panukalang pagbabalik sa paggamit ng 'Baybayin' sapagkat maaaring magdulot ito ng kalituhan sa nakararami. Kapag naisabatas na ang naturang plano, ang mga label at pakete ng lahat ng produktong pagkain sa loob ng bansa ay kailangan magkaroon ng translasyong Baybayin. Bukod dito, ang mga karatula ng mga pampublikong imprastraktura at peryodiko ay lalagyan na rin ng naturang translasyon. Mahalagang mabigyang pansin ang mga pangangailangang kultural at historikal na siyang magpupuno sa pambansang pagkakakilanlan ng bawat isa. Ang pagtuturo at paggamit ng 'Baybayin' ay pagpapakita ng pagpapahalaga sa kaisipan at paniniwalang isinabuhay ng mga ninuno natin. Sa pangkalahatan, ang pagtatalaga sa 'Baybayin' bilang opisyal na "National Writing System" ay makatutulong upang ang aral ng nakaraan ay matutuhan at makilala ng mas nakararaming Pilipino Saysayin ang diwa at palaganapin, Baybayin ng sariling atin!