Ang pag-ibig sa sarili ay isang aksyon at hindi isang estado ng
mabuting pakiramdam. Ang self-love o pag-ibig sa sarili ay popular na salita ngayon na sikat sa mga pakikipag-usap: ”Kailangan mong mas mahalin ang sarili mo.” “Bakit hindi mo mahalin ang iyong sarili?” “Kung mas minahal mo ang iyong sarili, hindi ito mangyayari sayo.” “Hindi ka maaaring magmahal ng ibang tao hangga’t hindi mo natututunang mahalin ang sarili mo.” Ito ay ilan lamang sa mga panuto ng pagmamahal sa sarili na nagbibigay o nagmumungkahi ng paghihikayat sa magandang buhay.
Mahalaga ang pagmamahal sa sarili upang mabuhay nang maayos. Ito
ay nagtuturo sayo kung sino ang dapat mong mahalin, kung paano ka makikisalamuha, at kung paano mo pangangasiwaan ang iyong mga problema. Napakahalaga nito sa kapakanan natin at nais kong malaman natin kung paano ito nakakabuti sa ating mga sarili. Ang pag-ibig sa sarili ay pabagu-bago; lumalago ito sa pamamagitan ng mga aksyon na nagpapagulang ng ating isipan. Kapag kumikilos tayo sa mga paraan na nagpapalawak ng pagmamahal sa ating sarili, nagsisimula tayong mas tanggapin ang ating kahinaan pati na rin sa kung saan tayo malakas. Hindi na natin kailangan ipaliwanag sa iba ang ating mga pagkukulang. Hindi na natin kailangan pilitin ang tao na manatili sa atin. Tayo ay mas nakasentro na sa ating layunin at halaga sa buhay, at inaasahan ang katuparan ng pamumuhay sa pamamagitan ng ating sariling pagsisikap. Ang pagmamahal sa sarili ay kailangan talaga nating matutunan. Napakahalaga nito sa ating buhay. Kung mayroon ka nito, hindi mo kailangan ng ibang tao para sumaya ka. Hindi mo rin kailangang dumepende sa ibang tao dahil mas mahalaga ang iyong sarili. Mas mamahalin mo ang iyong sarili kapag natuto kang maglagay ng limitasyon at marunong kang humindi para sa iyong sariling kapakanan. Ito ay nagpoprotekta sa iyo upang ika’y hindi saktan ng ibang tao at ikaw ay kanilang respetuhin. Huwag kang magpa-abuso sa ibang tao dahil sarili mo lang ang makakatulong sayo.
Sa halip na parusahan ang iyong sarili ng mga negatibong kaisipan,
marahang gabayan ang iyong sarili sa isang positibong direksyon. Maaaring tinatanong mo ang iyong sarili kung ano ang humantong sa mapanirang pag-uugali, kung ano ba talaga ang nais mong gawin, at kung ano ang mga kahihinatnan. Sabihin sa iyong sarili na mayroon kang iba pang mga pagpipilian, at hindi pa huli para magbago. Pagkatapos ay mag-isip ka ng isang konkretong hakbang na maaari mong gawin kaagad upang maging daan ito sa isang mas positibong direksyon o bumangon at subukan muli.