॥ శ్రీకృష్ణోపనిషత్ ॥

॥ శ్రీ గురుభ్యో నమః హరిః ఓం ॥

యో రామః కృష్ణతామేత్య సార్వాత్మ్యం ప్రాప్య లీలయా ।

అతోషయద్దేవమౌనిపటలం తం నతోఽస్మ్యహమ్ ॥ ౧॥

ఓం భద్రం కర్ణేభిః శృణుయామ దేవా భద్రం పశ్యేమాక్షభిర్యజత్రాః ।

స్థిరైరఙ్గైస్తు ష్టు వాంసస్తనూభిర్వ్యశేమ దేవహితం యదాయుః ।

స్వస్తి న ఇన్ద్రో వృద్ధశ్రవాః స్వస్తి నః పూషా విశ్వవేదాః ।

స్వస్తి నస్తా ర్క్ష్యోఽరిష్టనేమిః స్వస్తి నో బృహస్పతిర్దధాతు ।

ఓం శాన్తిః శాన్తిః శాన్తిః ।

॥ అథ ప్రథమ ఖండః ॥

హరిః ఓం । శ్రీమహావిష్ణుం సచ్చిదానన్దలక్షణం రామచన్ద్రం

దృష్ట్వా సర్వాఙ్గసున్దరం మునయో వనవాసినో విస్మితా బభూవుః ।

తం హోచుర్నోఽవద్యమవతారాన్వై గణ్యన్తే ఆలిఙ్గామో భవన్తమితి ।

భవాన్తరే కృష్ణావతారే యూయం గోపికా భూత్వ మామాలిఙ్గథ

అన్యే యేఽవతారాస్తే హి గోపా న స్త్రీశ్చ నో కురు । అన్యోన్యవిగ్రహం

ధార్యం తవాఙ్గస్పర్శనాదిహ । శాశ్వతస్పర్శయితాస్మాకం

గృణ్హీమోఽవతారాన్వయమ్ రుద్రాదీనాం వచః శృత్వా ప్రోవాచ భగవాన్స్వయమ్ ।॥ ౧॥

అఙ్గసఙ్గం కరిష్యామి భవద్వాక్యం కరోమ్యహమ్ ॥ ౨॥

మోదితాస్తే సురా సర్వే కృతకృత్యాధునా వయమ్ ।

యో నన్దః పరమానన్దో యశోదో ముక్తిగేహినీ ॥ ౩॥

మాయా సా త్రివిధా ప్రోక్తా సత్త్వరాజసతామసీ ।

ప్రోక్తా చ సాత్త్వికీ రుద్రే భక్తే బ్రహ్మణి రాజసీ ॥ ౪॥

తామసీ దైత్యపక్షేషు మాయా త్రేధా హ్యుదాహృతా ।

అజేయా వైష్ణవీ మాయా జప్యేనసాఽజితా పురా ॥ ౫॥

దేవకీ బ్రహ్మపుత్ర సా యా వేదైరుపగీయతే ।

నిగమో వసుదేవో యో వేదార్థః కృష్ణరామయోః ॥ ౬॥

స్తు వంతి సతతం యస్తు సోఽవతీర్ణో మహీతలే ।

వనే బృన్దా వనే క్రీడఙ్గోపగోపీసురైః సహ ॥ ౭॥

గోప్యో గావ ఋచస్తస్య యష్టికా కమలాసనః ।

వంశస్తు భగవాన్ రుద్రః శృఙ్గమిన్ద్రః సఖాసురః ॥ ౮॥

గోకులవనం వైకుణ్ఠం తాపసాస్తత్ర తే ద్రు మాః ।

లోభక్రోధాభయా దైత్యాః కలికాలస్తిరస్కృతః ॥ ౯॥

గోపరూపో హరిః సాక్షాన్మాయావిగ్రహధారణః ।

దుర్బోధం కుహకం తస్య మాయయా మోహితం జగత్ ॥ ౧౦॥

దుర్జయా సా సురైః సర్వైర్యష్టిరూపో భవేద్విజః ।

రుద్రో యేన కృతో వంశస్తస్య మాయా జగత్కథమ్ ॥ ౧౧॥

బలం జ్ఞానం సురాణాం వై తేషాం జ్ఞానం హృతం క్షణాత్ ।

శేశనాగో భవేద్రామః కృష్ణో బ్రహ్మైవ శాశ్వతమ్ ॥ ౧౨॥

అష్టా వష్టసహస్రే ద్వే శతాధిక్యః స్త్రియస్తథా ।

ఋచోపనిషదస్తా వై బ్రహ్మరూపా ఋచః స్త్రియాః ॥ ౧౩॥

ద్వేషాశ్చాణూరమల్లోఽయం మత్సరో ముష్టికో జయః ।

దర్పః కువలయాపీడో గర్వో రక్షః ఖగో బకః ॥ ౧౪॥

దయా సా రోహిణీ మాతా సత్యభామా ధరేతి వై ।

అఘాసురో మాహావ్యాధిః కలిః కంసః స భూపతిః ॥ ౧౫॥

శమో మిత్రః సుదామా చ సత్యాక్రోద్ధవో దమః ।

యః శఙ్ఖః స స్వయం విష్ణుర్లక్ష్మీరుపో వ్యవస్థితః ॥ ౧౬॥

దుగ్ధసిన్ధౌ సముత్పన్నో మేఘఘోషస్తు సంస్మృతః ।

దుగ్దోదధిః కృతస్తేన భగ్నభాణ్డో దధిగృహే ॥ ౧౭॥

క్రీడతే బాలకో భూత్వా పూర్వవత్సుమహోదధౌ ।

సంహారార్థం చ శత్రూణాం రక్షణాయ చ సంస్థితః ॥ ౧౮॥

కృపార్థే సర్వభూతానాం గోప్తా రం ధర్మమాత్మజమ్ ।

యత్స్ర ష్టు మీశ్వరేణాసీతచ్చక్రం బ్రహ్మరూపదృక్ ॥ ౧౯॥

జయన్తీసంభవో వాయుశ్చమరో ధర్మసంజ్ఞితః ।

యస్యాసౌ జ్వలనాభాసః ఖడ్గరూపో మహేశ్వరః ॥ ౨౦॥

కశ్యపోలూఖలః ఖ్యాతో రజ్జు ర్మాతాఽదితిస్తథా ।

చక్రం శఙ్ఖం చ సంసిద్ధిం బిన్దుం చ సర్వమూర్ధని ॥ ౨౧॥

యావన్తి దేవరూపాణి వదన్తి విభుధా జనాః ।

నమన్తి దేవరూపేభ్య ఏవమాది న సంశయః ॥ ౨౨॥

గదా చ కాళికా సాక్షాత్సర్వశత్రు నిబర్హిణీ ।

ధనుః శార్ఙ్గం స్వమాయాచ శరత్కాలః సుభోజనః ॥ ౨౩॥

అబ్జకాణ్డం జగత్బీజం ధృతం పాణౌ స్వలీలయా ।

గరుడో వటభాణ్డీరః సుదామా నారదో మునిః ॥ ౨౪॥

వృన్దా భక్తిః క్రియా బుద్ధీః సర్వజన్తు ప్రకాశినీ ।

తస్మాన్న భిన్నం నాభిన్నమాభిర్భిన్నో న వై విభుః ।

భూమావుత్తా రితం సర్వం వైకుణ్ఠం స్వర్గవాసినామ్ ॥ ౨౫॥

॥ ఇతి ప్రథమ ఖణ్డః ॥

॥ అథ ద్వితీయః ఖణ్డః ॥
శేషో హ వై వాసుదేవాత్ సంకర్షణో నామ జీవ ఆసీత్ ।

సోఽకామయత ప్రజాః సృజేయేతి ।

తతః ప్రద్యుమ్నసంజ్ఞక ఆసీత్ ।

తస్మాత్ అహంకారనామానిరుద్ధో హిరణ్యగర్భోఽజాయత ।

తస్మాత్ దశ ప్రజాపతయో మరీచ్యాద్యాః

స్థా ణుదక్షకర్దమప్రియవ్రతోత్తనపాదవాయవో వ్యజాయన్త ।

తేభ్యోః సర్వాణి భూతాని చ ।

తస్మాచ్ఛేషాదేవ సర్వాణి చ భూతాని సముత్పద్యన్తే ।

తస్మిన్నేవ ప్రలీయన్తే ।

స ఏవ బహుధా జాయమానః సర్వాన్ పరిపాతి ।

స ఏవ కాద్రవేయో వ్యాకరణజ్యోతిషాదిశాస్త్రణి నిర్మిమాణో

బహుభిర్ముముక్షుభిరుపాస్యమానోఽఖిలాం భువమేకస్మిన్

శీర్ష్ణ సిద్ధా ర్థవదవధ్రియమాణః సర్వైర్మునిభిః

సమ్ప్రార్థ్యమానః సహస్రశిఖరాణి మేరోః

శిరోభిరావార్యమాణో మహావాయ్వహంకారం నిరాచకార ।

స ఏవ భగవాన్ భగవన్తం బహుధా విప్రీయమాణః అఖిలేన స్వేన

రుపేణ యుగే యుగే తేనైవ జయమానః స ఏవ సౌమిత్రిరైక్ష్వాకః

సర్వాణి ధానుషశాస్త్రా ణి సర్వాణ్యస్త్రశాస్త్రా ణి బహుధా

విప్రీయమానో రక్షాంసి సర్వాణి వినిఘ్నంశ్చాతుర్వర్ణ్యధర్మాన్

ప్రవర్తయామాస ।

స ఏవ భగవాన్ యుగసంధికాలే శారదాభ్రసంనికాశో

రౌహినేయో వాసుదేవః సర్వాణి గదాద్యాయుధశాస్త్రా ణి

వ్యాచక్షాణో నైకాన్ రాజన్యమణ్డలాన్నిరాచికీర్షుః

భుభారమఖిలం నిచఖాన ।

స ఏవ భగవాన్ యుగే తురియేఽపి బ్రహ్మకులే జాయమానః సర్వ

ఉపనిషదః ఉద్దిధీర్షుః సర్వాణి ధర్మశాస్త్రా ణి

విస్తా రయిష్ణుః సర్వానపి జనాన్ సంతారయిష్ణుః

సర్వానపి వైష్ణవాన్ ధర్మాన్ విజృమ్భయన్

సర్వానపి పాషణ్డా న్ నిచఖాన ।

స ఏష జగదన్తర్యామీ ।

స ఏష సర్వాత్మకః ।

స ఏవ ముముక్షుభిర్ధ్యేయః ।

స ఏవ మోక్షప్రదః ।

ఏతం స్మృత్వా సర్వేభ్యః పాపేభ్యో ముచ్యతే ।

తన్నామ సంకీర్తయన్ విష్ణుసాయుజ్యం గచ్ఛతి ।

తదేతద్ దివా అధీయానః రాత్రికృతం పాపం నాశయతి ।

నక్తమధీయానో దివసకృతం పాపం నాశయతి ।

తదేతద్వేదానాం రహస్యం తదేతదుపనిషదాం రహస్యమ్

ఏతదధీయానః సర్వత్రతుఫలం లభతే

శాన్తిమేతి మనఃశుద్ధిమేతి సర్వతీర్థఫలం లభతే

య ఏవం వేద దేహబన్ధా ద్విముచ్యతే ఇత్యుపనిషత్ ॥

॥ ఇతి ద్వితీయః ఖణ్డః ॥

హరిః ఓం తత్సత్

ఓం భద్రం కర్ణేభిః శృణుయామ దేవా భద్రం పశ్యేమాక్షభిర్యజత్రాః ।

స్థిరైరఙ్గైస్తు ష్టు వాంసస్తనూభిర్వ్యశేమ దేవహితం యదాయుః ।

స్వస్తి న ఇన్ద్రో వృద్ధశ్రవాః స్వస్తి నః పూషా విశ్వవేదాః ।

స్వస్తి నస్తా ర్క్ష్యోఽరిష్టనేమిః స్వస్తి నో బృహస్పతిర్దధాతు ।

ఓం శాన్తిః శాన్తిః శాన్తిః ।

॥ ఇతి కృష్ణోపనిషత్సమాప్తా ॥