Zvicra ka votuar sot për të vendosur nëse do të përshpejtohet procesi për heqjen e centraleve

bërthamore të vendit ose jo. Nëse votuesit zgjedhin "po" në referendum, atëherë kjo do të detyrojë
mbylljen e tre prej pesë reaktorëve gjatë vitit të ardhshëm, ndërkohë që dy të tjerët, do të mbyllen deri
në vitin 2029. Të pesta impiantet aktualisht gjenerojnë 40% të elektricitetit në Zvicër. Qendrat e votimit
u mbyllën në orën 11:00 me orën lokale dhe rezultatet pritet të bëhen të ditura në orët në vazhdim. Të
Gjelbërit Zviceranë dhe Social Demokratët e kanë kërkuar këtë referendum që prej vitit 2011, pas
katastrofës në Fukushima, duke argumentuar se impiantet po vjetërohen dhe janë jo të sigurta. Pas këtij
incidenti, autoritetet zvicerane lajmëruan planet e tyre për një heqje graduale të energjisë nukleare.
Sidoqoftë, qeveria dhe të dhënat e industrisë tregojnë se një aksion i shpejtë lidhur me energjinë
bërthamore mund të çojë në në mungesa të energjisë elektrike dhe rritjen e varësisë ndaj lëndëve
djegëse në vend të energjisë së rinovueshme. Edhe pse qeveria zvicerane tashmë ka një plan për të
çmontuar të pestë centralet bërthamore të vendit "në fund të jetës së tyre natyrore", kundërshtarët e
energjisë nukleare thonë se kjo strategji është shumë e paqartë dhe mund të lejojë që impiantet të
vazhdojnë punën për një kohë të pacaktuar. Propozimi i sjellë nga Partia e Gjelbër kërkon që të ndalohet
ndërtimi i centraleve të reja dhe ato ekzistuese të mbyllen nëse kanë përmbushur 45 vite punë. Kjo do
të thotë se tre nga pesë duhen mbyllur vitin e ardhshëm, i katërti do të duhet të mbyllet në 2024 dhe i
pesti në 2029. Zvicra është një vend me popullsi të dendur dhe asnjë prej pesë impianteve nuk është më
larg se 70 km nga qendrat e banuara. Qeveria jep tableta jodi për komunitete të cilat jetojnë brenda një
rrezeje të caktuar, të cilat duhen marrë në rastin e çlirimit të lëndëve radioaktive. Për shkak të
shqetësimit masiv lidhur me këtë çështje, në vend nuk është ndërtuar asnjë stacion i ri bërthamor që
prej vitit 1984. /Ora News/