以弗所書 1:1-14

我喺仔細睇以弗所書嘅內容之前想了解一下佢嘅歷史背景同埋以弗所基督徒嘅處境，
所以我睇咗使徙行傳 19 章。使徙行傳 19 章講到以弗所當時係一個宗教盛行嘅城市，
佢哋信奉嘅係希臘女神 Artemis。當地嘅商人覺得基督教嘅興起可能會阻礙民眾對
Artemis 嘅敬拜而搞到佢地做唔到生意，於是佢哋就煽動咗成個城市衝入坐滿坐倒成
24000 人嘅劇場嚟反抗啲基督徙，嗰 24000 人仲要之後兩個鐘頭不停咁大聲頌贊
Artemis。相比之下，以弗所嘅基督徙冇宏偉嘅教堂或者雕塑。跟隨耶蘇即係要逆流而
行，拒絕接受當地嘅信仰、生活方式同埋價值觀。當時喺以弗所做基督徒真係一啲都
唔容易。

雖然現代社會已經好少會成個城市走去反抗基督徙同埋信奉異教，但係其實每一個文
化入面都有自己嘅 Artemis。佢唔一定以宗教信仰嘅形式出現，佢可以係社會上普遍流
行嘅價值觀或者係啲大家都喺度追求嘅嘢。無論係香港定係倫敦、我哋嘅學校定係屋
企，我哋身邊嘅每一個人，佢哋做嘅每一件事，都係為咗追求成功嘅事業、健康、物
質享受、家庭、快樂等等。好多時候我地會覺得身為基督徒唔單止好似好傻，要逆流
而行去跟隨耶穌真係好難，甚至乎我地喺呢個世界住得太耐，其實已經唔記得咗我地
嘅生活應該同非基督徒有好大分別。以弗所書正係寫俾嗰啲因為受到環境嘅壓迫而想
放棄為耶穌而活、去追隨呢個世界嘅人。保羅希望以弗所書可以幫基督徒認識神嘅能
力同埋計畫，令佢哋保持對基督嘅忠心。

以弗所書 1:1-14 入面提到好多神喺以前、宜家或者以後為基督徒做嘅嘢，保羅喺第 3

節度話天父將天上各種屬靈嘅福分賜俾我地。例如第 4 至 5 節保羅講到神喺創立世界
以前已經揀選咗我地，預定我地可以有神嘅兒女嘅名份。第 7 節話基督徒因為耶穌喺
十字架上面背負咗我地所有罪而得到救贖同埋赦免。第 9 節話神仲要俾我地知道佢嘅
旨意嘅奧秘。神嘅旨意就係當時機成熟嘅時候，佢會將天地萬物都喺基督裏同歸於一 。
我地之所以可以擁有呢啲福分完全係因為耶穌喺十字架上面完成嘅工作。呢啲完全係
無形嘅屬靈現實。作為基督徒我地得到嘅福分是完全睇唔到嘅，雖然比起信奉 Artemis
嘅人嗰啲睇得到嘅好處好似好唔實際，但係保羅言語之間充滿住興奮同埋對神嘅讚美 。
我地有時候可能覺得神離我地好遠，耶穌同我地周圍嘅人同事都好冇關係。但係呢段
經文話俾我地知我地唔單止擁有各種屬靈嘅福份，我地仲係呢個世界上最有福嘅人，
因為神竟然將佢嘅大計畫話咗俾我地知。呢個世界上任何一個角落、由古至今發生嘅
每一件事都係為咗達成呢個大計畫，就係令耶穌成為世間萬物嘅統治者。

唔單止咁，經文入面第 11 節話基督徒喺基督裏得基業。基業係聖經裡面非常重要嘅一
個概念。喺舊約入面，神承諾俾佢嘅子民嘅基業係應許之地，喺嗰度佢哋可以得到神
嘅庇護同埋祝福。但係舊約嘅呢個基業只係用嚟預示真正、永恆嘅基業，即係新約入
面講到嘅將來喺神創造嘅新天新地入面我地可以永遠同神一齊。所以作為基督徒我地
所盼望嘅係喺永生中與神同在，永遠受佢嘅庇護同埋祝福。即使我地宜家睇唔到我地
呢個咁美妙嘅未來，我地仍然可以確信呢個福份的確屬於基督徒。第 11 節講到嗰位掌
控萬物嘅神預定咗所有基督徒將會得到呢份基業，而且第 13 到 14 節話喺時機未成熟
之前基督徒會受到聖靈作為印記。正如聖靈一開始令我地能夠相信福音，佢亦都會繼
續喺我地裡面不斷增強我地嘅信心，幫助我地繼續信靠耶穌。我地身邊好多人可能睇
起嚟好似比我地有福，可能佢哋身體比你健康，生活比你更加無憂無慮，仔女好成功
仲要結埋婚買埋樓。世人嘅偶像好似好靠得住咁，佢哋可以承諾將成個世界都俾咗你 ，
但係最終佢哋其實咩都保證唔到。相反，我地睇唔到神嘅力量，亦都睇唔到神嘅計畫 ，
但係神比我地可以想像嘅更加偉大。雖然我地暫時睇唔到我地嘅屬靈福份同埋未來嘅
基業，我地可以確信終有一日能夠親眼睇得到。如果我地全心全意咁依靠神、將我地
人生嘅每一分每一秒做嘅每一件事建喺佢呢塊基石上面、將我地嘅目光定睛喺將來嘅
基業上，我地可以比任何人都有信心、比任何人都企得穩。
以弗所書 1:15-23