Professional Documents
Culture Documents
Da Angalo Ken Aran
Da Angalo Ken Aran
Ni Godofredo Reyes
Napardas panaggaudna
Amianan naturongna,
Sinurot ni Angalo
Ti makaawis a banglo.
Nagikkis ni Angalo
A kumamkamat likudan
“Narba kan Aran!”
Napataliaw balasang.
Ti disso a nakarbaan
Napintas a sasakayan
Isut’ ili a Narvacan
Ilokos akin-abagatan.
Nalbo a naipanagan
Barrio Santa Maria
Ta isut’ naudi a limnedan
Ipus ti barko a narba.
Apaman a timmakdang
Nasipukel nga Aran
Nagturong kabanbantayan
Iti barrio Balballasiwan;
Nagballasiw karayan
Ket inna naimatangan
Pintas a pagsidsiddaawan
Bantay a pagtaptapuakan
Danum a kasin-awan.
Immisem ni Angalo
Inur-urayna daydi kanito
Tapno inna makamatan
Kas ugsat’ pardasna nga Aran.
Gusing—pakalaglagipan
Ket ti barrio napanaganan
Iti baro a kadakkelan
Ditoy purpuro nagparang.
Nagtugaw a silalailo
Ni maragsakan nga Angalo
Sinakruyna ni Aran
Iti inna nakaitikleban.
Agsipud kadagsenna
Napatugaw iti abayna
Adda nabati nalnekan
Abay sinan-sabong ni Aran.
Ab-abut a nagkutkutanda
“Sangagasut a danaw” nagbalinanda
Iti tuktok naipattopattokda
Kas sangagasut a sarming ti agsapa.
Nagsapul ni Aran
Ppagdiram-osna a dinadang
Nangkutkot ni Angalo iti abut
Ginginammolna inna inlaok.
“Dalumpinas ni Karayo”
Ti naipanagan ammoyo?
Pagtartaraokan ni abuyo
Nga ay-ayam ni Kupido.
Bimmatok ni Angalo
Nakarawana ti barko
Singin a perlas karimatan
Insang-atna maragsakan.
Naglulumbada a nangsurot
Makapurar a kasla bandos,
Kas batombalani a nasudi
Makaawis uray no rabii.
Ti puyupoy naglamiis
Dalluyon nagulimek
Bunga’t niog napusek
Bagasna makapnek
Nagbalin a makapuno
Pagay-ayat ni Angalo.
Nailabeg di nakagaraw
Nakatangad, situtungraraw
Timmangken iti yanna
Nagbalin a bato inggat ita.
Sinaludsod ni Angalo
Ken aran a silalailo
“Ania aya ti napukawmo
Idi limned ti baro?”
“Singn a perlas
Kas baton-sileng narimat
Kas itoy innak buklen
Iti ungto ti balangen.”
Ket tinubay ni Aran
Brillante a natikapan
“Diamond head” buniagnan
Naibati a pakalaglagipan.
Nagtungpal ni Angalo
Kas kumikitikit lumaladawan
Tinubayna ti sinan-arko
A naipakleb iti kadaratan.
Suso a nakaskasdaaw
Ipusna labsanna pay
Niog a nalayog
Iti igid ti baybay.
Nalukneng ti balayna
Mapikon-pikonna ti bagina
No agkarayam agbabasa
Ti tugot a pagnaanna.
Tinurongna ti nakaidulinan
Dua a perlas kapapatgan
Puon sinansuso a bantay
Simbrek a siaalumanay.
Inkarinat kaayan-ayatna
A no maalana dagitoy a dua
Isagutnanto ti maysa
A pangsukat rikep balayna
Ta rumangrang no agandapda.
Kinaykayatna ti timmapuak
Ngem ti agsubli nga awan perlas
Ta napudno ti inna panagayat
Ken balasang Suso a nadayag.
Dakkel a sasakayan
A naaramid idiay Bataan
Ket nagturongdan idiay Annam
Maikanem inda nagsardengan.