Pedro Ernesto Escurra Franco Rembihai

SÓCRATES. (470-399) Arandupykuaatyjára heko peteĩva. Ha’e oheja umi porandu

pe ñande rekove rehegua, ha ojetypeka yvypóra ñe’ãme, yvypóra ãngaryepýpe,
oheka apytu’ũ poty pa’ũme mba’ekuaa omohendaporã hag̃ua upéi pe hembiapo
rupive. Ñanderekovepýgui yvúicha osẽmba’ekuaa osyryry ñe’ẽre, ha umi
ñe’ẽ oikotevẽ tape porã, jajapóva mbeguekatúpe, ñamyatyrõ va’erã katupyrýpe.
Umi iporandu opo’ẽ pypuku pe apytu’ũkuápe ha oñembohovái rupi oguenohẽ heta
mba’ekuaa. Ambuépe jaikuaa porãsérõ tekotevẽ jajekuaa porã ñande, ha’e he’i
¨Aikuaa ndaikuahái mba’eve¨ Pyhare ha ára ha’e oñeporandu ha oñeha’ã ombohovái
porã ijupe.
Mba’e he’ise py’aguasu. Py’aguasu he’ise katupyry ñorairõ hag̃ua. Ñorairõ apohára
ha’e py’aguasu. Ha ma’erã ñorairõ. Jejuka hag̃ua. Py’aguasu he’ise jukahára.
Nahániri Py’aguasu rembiapo ome’ẽ chupe mba’épa ha’e, ha’e, ha’e pe ojapóva.
Heta porandu ojapo peteĩ mba’ére. Mayma mbohovái katuete ojojavy. Jejavy pa’ũme
jahechakuaa mba’eve ndojekuaaporãiha. Porandúpe ha’e opichãi mayma ãngape
ikatuhag̃uaicha ikatuháicha osẽ mbohovái rupive umi ojekuaaséva ojekuaa porã
hag̃ua.
Sócrates he’i mayma ñe’ẽ oguereko he’iséva ha amo ijapýpe he’i avei pe ndaha’éiva
térã he’ise’ỹva Peteĩ mba’e réra ha’e va’erã avei opa hendápe ko yvy ape ári. Péicha
ikatu héra tee.
Mayma kuaapy ha’e ohesa’ỹijo. Kuaapy jarekóva temiandúre ipererĩ. Kuaapyete ha’e
ñamindu’upyréva. Yva aju jahechakuaa ñande resa rupive, avei mba’ére hi’aju térã
hesa’yju pe yva jaikuaakuaa ñamindu’u rupive.
Arandu rapereko. Ha’e oñembotavývaicha, oiko ku oikuaa’ỹvaicha oporandu ha
oporandu opa mba’e. Mayma mbohovái ipererĩva ha’e oipepi ha ojeporekave iguýpe
mba’ekuaavére.
Tavy rupínte ojejavy, oĩ japu, oĩ monda, oĩ tekovai, oĩ ñe’ẽrei, oĩ ñaña, oĩ ate’ỹ,
ñembotavy ha mba’apo’ỹ. Tavyñoite ikatu omboyke tekoporã, tekojoja, tekopotĩ, ha
tekomarangatu.