*ORDINANCE*

Tunlai hrileng (Covid19) kaihhnawiha Mizoram State Sawrkarin dan thar a tihchhuah, “The Mizoram
(Containment and Prevention of Covid-19) Ordinance, 2020” hi kan hmelhriat tawh hlawmin a rinawm.
Social media lama mi tamtak titi ah Local/Village Task Force te thuneih chinah inhnialna tamtak a awm a,
Covid19 vanga sawrkar thuchhuah hrang hrangte zawmlo hremna chu Section 188 IPC a ni deuh mai kha
a ni a. Chumi avang chuan Task Force Duty te che vel chuan mit a tih kham chang a awm fo a, thuneihna
insiam chawp leh tihtur bak ti angte, “Lal ngailo lal a na, an lal a kha” tihte chu tlangkam titi tlanglawn a
ni chho a. Dan hremi leh ziakmi tamtakin an thuneihna leh tihtur chinte an insawifiah siak mek lain
Aizawl veng pakhata chet pelhe na vangin Task Force hming chu a chhe leh zual a. High Court beng hial
thlengin, Mizoram sawrkar pawh Task Force te chet vel dan chungchangah a kamkhat hial a nih kha.

Chutianga thaikawi biahthu thiam nazawngin archuk tuilo khawpa Task Force te an dem a, thiat mai se ti
hial an awm lai leh Mizoram sawrkar meuh pawh demtu an tam em em laiin Mizoram Sawrkar chuan
Governor thuneihna hmangin Dan thar (Ordinance) a ti chhuak leh ta hmiah mai a, he danah hian sawi
hlawh Task Force te a rawn dah sang hle nghe nghe a nih hi. The Mizoram (Containment and Prevention
of Covid-19) Ordinance, 2020 Section 3 chuan State, District leh Local level a Task Force Chairman leh
Member Secretary-te chu he danin zawm tura a sawite kengkawh leh dan zawmlote pawisa chawitir
turin thuneihna a rawn pe a. Dan hnuaiah a hma aia thuneihna sang zawk nen a rawn dintir ti ila kan
sawisual awmlove.

Kan sawi tak angin he dan(Ordinance) hi Governor thuneihna hmanga siam a ni kan tih tawh kha. Indian
Constitution Article 123 (1) chuan India President chu Parliament rorel inkhawm neihloh laia tul bik thila
dan hman tur siam thei turin thuneihna a pe a, State Governor te pawh Article 213 in State Legislature-
te Session neihloh laia tul bik thila dan hman tur siam thei turin thuneihna a pe ve bawk a. Mahse he dan
hi President-in ama thuneihna hmansualna leh duh duh dana dan siam theihna a ni lova, Prime Minister
kaihhruai Council of Minister-te thurawn anga dan siam a ni tur a ni. President chuan he dan hi eng
hunah pawh a ti tawp thei a, he dan hian Parliament in dan a siam (act of Parliament) ang thoin
thuneihna a nei a, mahse chutiang thupek reng reng chu House of the People ah putluh tur a ni a,
Parliament thutkhawm leh hmasak ber atanga kar ruk(6) chhung chauh a hman theih a ni. Ni 8
November 2016 a BJP kaihhruai sawrkarin India Pawisa note lian a tih thih hnu, ni 28 December 2016 ah
pawh khan pawisa thi kaihhnawih The Specified Bank Notes (Cessation of Liabilities) Ordinance, 2016
chu India President-in a lo tichhuak tawh a nih kha, he dan hi Parliament Act ah a chantir a ni zui ta kha a
ni a.
President/Governor-in Ordinace siam thei tura thuneihna an neih chungchangah hian dan hi a fimkhur
khawp mai a, Article 74 ah chuan Prime Minister kaihhruaina hnuaiah Council of Minister an awm tur a
ni a, Council of Minister chuan President thurawn an pe thin anga, chu an thurawn pek dungzui chuan
President chuan a thawk ang tih kan hmu a. Ordinance siam chungchangah pawh Council of Minister-te
thurawn angin President/Governor chuan dan a siam thin a ni. Dr. BR Ambedkar kaihhruaina hnuaia
India Constitution Draft anih lai khan, President Power chungchangah hian Pu Ambedakar-a chuan ti
hian a sawi a, “President of Indian Union chuan a Minister the thurawn angin hna thawk tur a ni a, an
mahni kalh engmah a ti tur a ni lova, an thurawn telloin engmah a ti theilo ang”. A nihna takah chuan
President hi chu “Formal Constitutional head a ni mai a, thuneihna tak tak chu Cabinet Minster-te kutah
a awm zawk a ni.

Judicial review chungchangah pawh 38 th Ammendment of Indian Constitution ah chuan Article 123 in
thuneihna a pek angin President in ngun taka angaihtuah hnuah Ordinance chu siam a nih tawh chuan
engvang mahin eng Court mahin a Question tur a nilo tiin Clause 4 an siam thar a. Mah se 44 th
Ammendment chuan Clause 4 hi paihin President in Ordinance a siam chungchangah Judicial review
neih theih a ni ang a rawn ti leh ta thung a. Ordinance chungchangah hian Fundamental Right kalh a dan
siam te a awm theih avangin Judicial Review theihloh tura siam ngawt kha a himlo reng a.

He Article 123 leh 213-te hian India danpui khauh tak anga lang, “Flexible” viau lawi si an tih lanna
pakhat a ni a. Dan hi nei kimchangin hausa viau angin lang mah ila, upain ‘nau chin leh khawchin hriat
theih a nilo’ an lo tih ang deuhin engnge kan tawn anga, eng buaina nge kan hmachhawn dawn a
hriatlawk silo a. Kan huntawng a zira thuneitu tur te, mipui kaihhruaina te, thupek zawmlo hremdan tur
bikte a danglam theih avangin he Article hi dan tha mi a tihloh theihloh. Tuna hrileng mek chungchangah
pawh dan zawmlote hremna dan hman mek hi a tha tawkloin duhthu a samlo a, dan thar siam turin ram
hruaitute tan dan siam tura rorel theih zu ni hek suh. Chutiang huna hri laka kan inhmumhimna tur dan
siam thei tura President leh Governor-te’n thuneihna an lo nei leh zel hian India dan ropuina a tilang
chiang hle a ni. _(5.5.2020 : Ziaktu – Lawmsangpuia)_