Muklat

Magmata ka, magmarata Kita!

An pagturog sobra na baga,

Magmansay sa luwas suriaw sa Mata,

Saldang Kan aldaw na natural sana.

Igwa akong pangiturugan kas banggi,

May sarong kahimanwa soltero na lalaki,

Uminuli sa harong ninda nin daeng paisi,

Natakot ako ta nagkiling sako insulto an ngisi.

Kagurangnan na sa samo mahirakon,

An gabos na buhay saimo nagpuon,

Dae nilingawan saimong mga tugon,

An tawo sa kinab'an tabangan makaahon.

An sabi kan sakong amiga,

Dakol nag-uruli digdi sa samong probinsya,

Ini mga nagtrabaho sa ibang lugar daa,

Alagad nag-uli dahil sa pandemya.

Pakadangog ko kan mga uruistorya,

Garo sa boot-boot ko mayo man sana,

Siring sa mga aldaw na nakaagi daa,

An presenting oras normal man baga.

Naluwas sa natad nin mayong nerbyus,

Nakikingirit asin ulay man sa gabos,

Napakiling bigla sa langit dangan naisip Mahal na Diyos,

Kagurangnan an grasya samuya ibuhos.

Mga kaakikan dalagan digdi, dalagan duman

Iruistorya igdi dangan istorya duman

Tambayan digdi siring mam duman,

Anong problema? Bakong normal na aldaw man?

Sarong hapon ako nagimata ,

Pagmati malain sa pagturog nasobrahan baga,

Pagkiling sa luwas mayo nin tawo,

Tulos akong nagbuhat ta mala trangkilo.

Hain kamo? Hain ako?

Ano ta bigla akong nagsosolo?

Hain an pag-iriba? Hain an tawo?

Hain kamo? Hain na kamo?

Naglibot akong hanap,

Padiit-diit kong nahagilap,

Ano ta gabos kaipo ning agap?

Dae ko ini kayang matanggap.

Nagluluha akong dalagan,

Naghahanap tabang dangan,

Dangog an kaba sa daghan,

Ano an gibuhon? Ano an kaipuhan?

Dae ko na mahanap sain nagpuon,

Dae ko maintindihan ano an mga tugon,

Dae ko maaraman kusog sain mapunpon,

Dae ko aram anong nangyari sa pagturog ko maghapon?

Hala danguga an bareta sa luwas,

An porsyento kan pandemiko sobrang nagtaas,

Parani nin parani rikaskas, makaskas,

Daeng pili maski isay dae makatakas.

Namalisyahan mo bakong iyo?

Dakol madunong talagang tigtutuyo,

Maski guran'o kaingat kan ibang tawo,

Naglalakop an dae nahihiling na kalaban kan mundo.

Pinikit an mata nin hidali,

Nagprobrar na garo sumpa mabakli,

Su pagmati na dai na mapakali,

Miyentras ako sa paghibi hali.

An nakalihis sakong binaralikan,

Tawo sa pagiging alerto may kakulangan,

Naglakop an pandemya sa kagabasan,

Kaya ngunyan mayo akong naabutan.

Dae ko aram, Dae ko na aram,

Mayong maginibo,mayong maitaram,

Sain maduman? Sain mapaaram,

Sa Diyos na mahirakon ako nag andam.

Bigla an tapli sakong namati,

Hidaling kamangno binabangungot an sadiri,

Sarong pangiturog na nagpapaisi,

Magmarata kita sa posibilidad na sinasabi.

Malisyahan an natad asin kapalibutan,

Dae maaraman hain na an kalaban,

Sa gabos na tawo dapat tang tandaan,

Ingatan an buhay na satong sinublian.

Dakol na oras an naglihis,

Paghuna tsek bangan ekis,

Su dating ngirit na masid ang hamis,

Ngunyan tahob kan telang mahimpis.

An tahob baga sa dungo dangan nguso,

Dae man kabali mata sa mga itatago,

Dahilan para mahiling kan kagabsan na tawo,

Hala muklat na ta uya katotohanan sa mundo.

Gladys D. Tabuzo

Sabang, San Jose, Camarines Sur

09093352032

GladzTabuzo@gmail.com