Nganong si Ginoong Hesus ra ang angayan nga simbahon, alagaran, ug pasidunggan?

Nganong
Siya lang ang atong dalangpanan, tigpanalipod ug nangaliyupo( Intercessor) taliwala kanato ug sa Dios?
Nganong dili man ako o ikaw? Nganong dili man si Apostol Pedro, Pablo, Juan o si Bulaha’ng Maria?
Simply kaau ang tubag niini. Adunay duha lamang ka mga butang akong pagahisgotan aron matubag ang
atong mga pangutana mahitungod niini. Sa Roma 8:34, nag ingon ang Pulong sa Ginoo nga “si Hesus
mao ang NAGPAKAMATAY UG NABANHAW ug atua Siya sa tuo sa Dios ug NANGALIYUPO alang kanato”.
Atong makita sa maong bersikulo nga adunay duha ka importanteng Pulong nga atong mabasa, mao ang
pulong NAGPAKAMATAY UG NABANHAW. Busa,

Una, ang katuyoan sa Iyang KAMATAYON mao nga si Ginoong Hesus ang nagdugtong kanato sa
Dios. Sa Efeso 2:18, pinaagi kang Kristo, kitang tanan makaduol na sa Dios. Sa Juan 14:6 nagsulti si Hesus
nga “Siya lamang ang Dalan, Kamatuoran ug Kinabuhi, walay makaadto sa Amahan kung dili moagi
Kaniya”. Asa kuno moagi? Kaniya lang! wala nay lain pa! Nothing less Nothing more! Sayop ang pagtuo
sa uban nga adunay kunoy daghang Dalan apan usa ra ang sangpotanan, sayop kini nga prinsipyo ug
pagtuo, kay klaro kaau ang giingon sa Kasulatan nga si Hesus lamang ang Dalan ug wala nay lain pa.
Aduna akoy daku nga pagtahod ug pag ila kang Apostol Pedro, Pablo, Juan ug bisan pa kang Maria, kay
sa tinood usa sila ka maayong ehemplo kanato ug sa atong pagtuo ug pag alagad sa Ginoo. Sa 1 Corinto
11:1, nagsulti si Apostol Pablo, sunda ninyo ako sama nga gisunod ko si Kristo. Naghatag si Pablo sa
panag ingnan o example sa atong pagkinabuhi, mao kini ang rason nganong ato siya’ng gisunod, apan
wala kini nagpasabot nga ato siyang simbahon. Sa Buhat 5:29 misulti si Apostol Pedro ug ang ubang
apostoles ug nagkanayon, “kinahanglan sundon namo ang Dios ug dili ang mga tawo”. Ang Dios lang ang
angay nga sundon, alagaran ug yukboan o luhoran(Bow down). Sa Gipadayag 22:8-9, adunay nahitabo
nga sa dihang nagpakita ang usa ka anghel ngadto kang Apostol Juan, Mihapa o miluhod siya aron sa
pagsimba sa usa anghel, apan ang anghel miingon, “ayaw kana buhata kay sulugoon lamang ako sama
kanimo”. Kung adunay kitay pagpanabot, ato gayud nga masabtan nga nagkahulogan kini nga ang mga
sulugoon sa Dios, sama kanimo ug kanako, sama kang Apostol Pedro, Pablo, Juan, ug Maria, dili angay
nga yukboan ug Luhoran(Bow Down) kay bisan gali ang usa ka anghel, usa ka langitnon nga binuhat,
wala man magpayukbo ni Juan aron simbahon. Atong dapat mahibaloan nga ang pagyukbo o pagluhod
simbolo sa pagsimba. Sa Gipadayag 22:8, sa English nga pagkahubag mao kini,”…and when I heard and
saw, I FELL DOWN TO WORSHIP…” buot pasabot nga ang rason sa pagluhod mao gayud ang pagpakita sa
pagsimba. Sa Matteo 4, mao kini ang panahon nga si Hesus gisulayan pagtintal sa yawa sa makatulo ka
higayon, ug sa kataposang higayon, sa Mateo 4:9 ang yawa nagkanayon, “ihatag ko Kanimo kining
tanang gingharian kung MOLUHOD KA UG MOSIMBA kanako”. Ang yawa mismo nasayod unsa ang mga
pamaagi/ simbolo sa pagsimba, maoy rason nganong miingon siya nga LUHOD UG SIMBA KANAKO. Ang
yawa nasayod nga ang pagluhod usa ka timailhan sa pagsabamitar ug pagsimba, apan si Hesus mitubag
kaniya diha sa Mateo 4:10, “simbaha ang Ginoo nga imong Dios ug Siya lamang ang alagari”. Ako nagtuo
nga bisan ang mga Apostoles ug labaw na ang Bulaha’ng Maria, dili sila motugot nga sila simbahon, kay
nasayod sila sa kamatuoran nga ang Dios lamang ang angayan nga simbahon. Pangutan on ka nako, ikaw
ba kung mamatay ka, gustohon ba nimo nga ikaw yukboan ug simbahon sa mga katawhan? Gustohon ba
nimo nga kuhaon ang pagsimba nga para lang unta sa Dios? Dili ba daku kaau nga pagpanamastamas sa
Dios nga ang himaya nga para kaniya atong gikuha? Sa Isaias 42:8 nag ingon ang Dios, “Ako mao si
Yahweh ug mao kana ang akong ngalan, dili ko gayod ihatag kang bisan kinsa ang akong himaya o ang
akong dungog ngadto sa mga larawan nga dios dios”. Mao kini ang rason nga ang atong mga
katigulangan nga mga kaigsoonan sama sa mga Apostoles ug sa Bulaha’ng Maria, dili gayod mosugot nga
ato silang yukboan ug simbahon tungod kay daku kaayo ang ilang pagtahod, pag ila ug pagyukbo sa Dios.
Ang pagkabulahan ni maria, nagpaila nga daku kaau siya ug pagtuo sa Dios. Apan dili siya mahimong
bulahan kung iyang gikuha/ kuhaon ang himaya sa Dios nga para lang gayod sa Dios.

Ikaduha, ang Pulong NABANHAW, unsa man ang kahimoan niini sa atong pag alagad sa Dios?
Ang PAGKABANAHAW ni Ginoong Hesus usa ka impotante nga panghitabo sa tibook kalibotan tungod
kay diri Niya napamatug an nga adunay Kamatuoran ang tanan niyang mga gisulti ug iyang mga Pulong.
Tinood gayud nga Siya ang Dalan, Kamatuoran ug ang KINABUHI. Sa Juan 11:25, nagsaad Siya nga Siya
ang pagkabanhaw ug ang kinabuhi. Wala ba kamo mahibulong o nakapangutana, nganong human sa
kamatayon ni Ginoong Hesus ug pagkabanhaw, nganong nagpakita pa man Siya sa mga disipolo? Dili ba
diay pwede nga modaretso na Siya pag uli ngadto sa langit? Ako nagtuo nga ang rason niini, mao ang
pagpakita sa kamatuoran sa iyang pagkabanhaw. Ngano man? Aron si kinsa kadtong motuo mo ug
modawat Kaniya, dili mahimong pakyas o sayang ang iyang pagtuo kang Hesus. Unsaon man nato
pagsalig sa atong kinabuhi sa usa ka tawo(person), kung siya mismo walay kinabuhi? Unsaon nato
pagsalig sa atong kaluwasan sa usa ka tawo kung siya mismo wala makaluwas sa iyang kaugalingon?
Unsaon nato pagka-banhaw kung ang atong gisaligan o gisimba, wala mabanhaw? Unsaon nato
pagsiguro nga ang atong mga pag ampo madungog kung walay ebedinsya nga kana nga tawo buhi? Mao
kana ang rason nganong si Hesus nagpakita sa makatulo(3 times) kahigayon ngadto sa iyang mga
disipolo, ayha Siya mipauli ngadto sa langit, aron paghatag kanila ug kanato sa kasigurohan, nga buhi
Siya nga maminaw sa atong mga pagsimba ug pag ampo. Sa kalibutan adunay daghang mga “RELIGIOUS
ICON”, sama sa mga religious gods, prophets or leaders, sama ni Buddha, brahma, mohammad, ug
daghan pa, aduna lamang silay usa ka saad, nga si kinsa kadto motuo kanila makabaton ug kinabuhing
walay kataposan, pero ni bisan isa kanila wala gayuy ebidensya nga sila nabanhaw. Walay kamatuoran
sa ilang mga saad kay sila mismo patay. Busa wala kitay pagsalig ug pagsimba kanila, ngano man?
Tungod kay unsaon man nila pagluwas kanato, kung wala nila maluwas ang ilang kaugalingon? Sama ra
usab kini sa atong mga kaigsoonan nga mga Apostoles ug ni Maria nga hangtod karon patay gihapon.
Ang 1 Tesalonica 4:13-18 nag ingon, nga ang tanang nangamatay daw sama sa mga nangatulog hangtod
karon, nga inig balik ni Ginoong Hesus, aron pagkuha kanato, ang kasulatan nag ingon sa 1 Tesalonica
4:16, “ang mga PATAY NGA NAGTUO KANG KRISTO, maoy unang banhawon”. Kinsa man ng mga patay
nga nagtuo kang Kristo? Apil niana ang mga apostoles ug si maria, bout pasabot, nga ang mga Apostoles
ug si Maria, hangtod karon, patay ra gihapon. So ngano man nga mag ampo ta diha kanila? Ngano man
nga himoon nato sila nga dalan paingon ngadto sa Dios, nga wala may ebendensya sa ilang
pagkabanhaw? Ang pagkabanhaw ni Ginoong Hesus nagpamatuod nga Siya lang ang atong simbahon,
alagaran, ug ampoan. Siya lang ang makadungog sa atong mga pag ampo, ug wala nay lain pa! nakasulay
naba kita ug tawag ug tawo nga wala diha? O imong gitawag ang tawo nga wala maminaw sa imong
gisulti? Dili ba sayang lang ang atong gisulti? Sayang lang ang atong panahon, luha o paghilak ug pag
ampo sa tawo nga wala makapaminaw kanato. Kung buhi pa ang mga Apostoles ug si Maria, ila gyud ta
nga giyahan sa sakto nga dalan sa kaluwasan ug kamatuoran. Giyahan kita nila ngadto sa saktong mga
pag ampo ug pagsimba nga alang lamang gayud sa Dios pinaagi kang Hesus Kristo. Ang Buhat 4:12 si
Apostol Pedro mismo nag ingon nga “WALA NAY LAING NGALAN DINHI SA KALIBOTAN NGA GIHATAG SA
DIOS NGADTO SA KATAWHAN NGA MAOY MAKALUWAS KANATO”. Kinsa nga ngalan? Ang Ngalan ni
GINOONG HESUS! Dili ngalan ni Pedro, kay si Pedro mismo ang nagsulti nga ngalan ni Hesus lamang! Dili
ngalan ni Juan, dili si Pablo, ug labaw sa tanan dili si Maria.

Busa sa kataposan, ako kang gidasig nga pasidunggan ang ngalan lamang sa Dios nga si Ginoong
Hesus. Kay Siya lamang ang NAMATAY UG NABANHAW tungod ug alang sa atong mga sala ug kaluwasan.
Ilha Siya ug dawata sa imong kinabuhi, pasudla Siya karon sa imong kasing kasing, Siya ang himoa nga
Hari sa imong kinabuhi ug dili ang mga tawo nga wala nagpakamatay kanimo. Kung gusto mo dawata sa
Ginoo, ako kang hatagan ug kahigayoan pagdawat Kaniya, sunda lang kini nga pag ampo… Ginoong
Hesus Ikaw akong giila nga Manluluwas ug Ginoo sa akong kinabuhi, ako kang gitugutan nga mohari
kanako karon ug sa walay katapusan. Ako kang gihatagan ug katungod nga Ikaw na ang magbout sa
akong kinabuhi. Pasayloa ako sa akong mga sala nga nabuhat sukad pa sa akong pagkahimugso hangtod
karon. Pasayloa ako sa pagsimba ug pag ila sa lain nga dios o tawo gawas Kanimo. Sukad karon Imo
lamang nga Pangalan GINOONG HESUS ang akong pagadaygon. Kini akong mga pag ampo, pinaagi sa
Pangalan ni Ginoong Hesus. Amen!