TAYKA QAMAQI

Mä kutinxa, mä tayka qamaqixa, jach’a qullu parkina mä jaqhi p’iya manqhana

kimsa wawapampiwa utjasiritayna, uka maya urunxa, wawanakaxa jilsusina
aycha manq’aña munapxatayna siwa, ukata tayka qamaqixa wali amuyt’asina,
akhama wawanakaparu satayna “walikiwa munata wawanaka, nayaxa
jumanakataki maya suma lik’i iwija aptiriwa saraja, ukhamaxa, jumanakaxa aka
utana suyapxitäta, k’atakiwa khaya pampanakata manq’aña apanija, janiwa
anqaru mistupxätati”, sasawa wawanakaparu iwxawiritayna siwa.
wawanakaxa iwija aycha manq’aña laykuxa, wali k’uchisiripxatayna, ukata
taykaxa laqawa sarawatayna iwija aptiri, ukchañkamaxa jisk’a wawanakapaxa
utata anqaru, lupiru mistupxatayna, ukana sarnaqasipkäna siwa, ukhamaruwa
jach’a pakanaka uñjiritayna ukata wawanaka achtasina yaqha qullu layaru
apasina ukana manq’antapxirityana siwa.
Ukata uka tayka qamaqixa wali qarita, wali k’uchiwa lankhu iwija q’ipt’ata
utaparu puritayana ukata satayna ” ayyy jichhawa wali suma wawanakajampi
suma aycha manq’t’asipxa sasawa satayna, ukata wawanakapa thaqtatayna
janiwa katjiritaynati, ukhama wali llakita uksaru aksaru sarnaqatayna ukata, uka
jach’a qalanakaru jichhunakaruwa jiskht’asiritayna, “wawanakaja
unjapxistacha” sasina.
Ukata jupanakaxa siritaynawa, “pakanakawa wawanakama apxixa, khaya qullu
layaru, ukana manq’antapxpachawa” siritaynawa, ukata uka qamaqixa
wawanakapa layku wali jachxiritayna, ukana usuntasina jiwxiritayna siwa.

Julián Mamani Condori