“Ang Pagwagayway sa Idalom sang Pandemya”

Bilang isa ka pilipino, indi mo mapunggan nga magpamangkot kon pila na ka

beses napukan ang aton bandera, kon pila na bala ka beses ginrumpag ang aton
bandera sang kinagubot kag pagribok. Kapila na naton ginsulit ini nga mga pakiana.
Sa kinaandan, tagsa ka bulan, tagsa ka tuig, aton nababatian ang paghaya sang mga
tawo halin sang una asta sa karon kag kung sa diin sa isa ka tum-ok lang sang
makabag-o nga kasangkapan para sa pagtawag madasig naton makita ang mga lain-
lain nga opinyon nga nahanungod sang pulitika, panguluhan kag pag-iro sang mga
tawo. Paliwat-liwat nga mga ginapalibugan, san-o pa ini matapos? May kalinong pa
ayhan kita nga matuga? Kada tion nga magbugtaw kita sa aga, nagadugang kag
nagadugang lang ang aton pagkanegatibo kag nalilipatan na naton ang mga maayo
nga tawo. Hindi dapat amuni sa Adlaw sang Kahilwayan. Mahapos palambuon ina
nga panimuot kon kalimtan naton ang pagkahilingagawon ukon malingaw kita sang
mga ganyat sang kalibutan. Halos tanan sa aton sa isa ka-tuig, kon-kaisa lang naton
madiparahan ang ila maayo nga binuhatan. Madumduman mo ayhan sila kung wala
ang Adlaw sang Kahilwayan?

Nagabarak ang pangutana naton kon pila na kita ka beses natumba, pero
napamangkot mo na bala kon pila kita ka beses nagtindog? Kon pila na kabeses
ginwagayway ang aton bandera sa mga pagtilaw nga gin-atubang naton?
Ginpamangkot mo bala ang imo kaugalingon bilang isa ka Pilipino nga sa tagsa ka
matam-is nga yuhom, ang hambal sang mga dumuluong “they are resilient kind of
people”. Gina-dúmdum naton ang pagwagayway sang watawat sa Adlaw sang
Kahilwayan pero bal-an bala naton nga ang una nga pagwagayway sang aton bandera
natabo sadtong Mayo 28, 1898 sa isa ka inaway nga natabo sa Cavite? Nadumduman
pa bala naton ang pagwagayway sang aton bandera sa tion sang mga Amerikano, sa
tion sang mga Hapon? Ang pagwagayway sa tion sang rebolusyon, sa tion sang
EDSA? Ang bandera nga nagatindog dyapon sadtong Yolanda?
 Makatilingala,di bala? Nga bisan nagakasandad kita sa madamong beses, may
gawagayway sa gihapon sang aton bandera? Pamangkuton naton ang aton
kaugalingon kung sa diin naghalin ang wagayway sa idalom sang pandemya.
Ginapahanumdom kita nga naghalin ang wagayway sa mga tawo nga nagapakigbato,
nga sa kada kabudlayan may nagawagayway sang aton bandera. Kilala mo bala sila?
Lantawon naton ang wagayway sang aton mga baganihan sa subong nga Adlaw sang
Kahilwayan, sa subong nga panag-on sang pandemya. Sila gabalikid sa aton. Sila ang
nagahuman sa ginatawag naton nga mga “frontliners”. Sila nga nagawagayway sang
ila mga kamot kag gapabilin sang yuhom nga nagakinahanglan sang mga pangamuyo
naton. Kita tanan palareho nga nalugpayan sa ila duguan nga kamot. Sa idalom man
sang aton Bandera nakatukod ang estatatwa ni Jose Rizal, isa ka baganihan nga doktor
nga nagalarawan man sa mga baganihan naton subong. Ini, hindi isa ka natabuan lang,
ini nagapahanumdom nga kita nagahuisa sa tunga sang pandemya. Madamong beses
na nga gintigib sang mga problema ang Adlaw sang Kahilwayan kag ini nga panag-on
mangin isa ka maragtason nga hitabo. Ini nga hitabo magagiya sa masunod nga
kaliwatan. Amo ini ang isa ka rason ngaa gadangop kita sa huwaran sang nagligad.
Kita nga ara sa moderno nga panag-on ang magapadayon sa pagwagayway para sa
masunod nga kaliwatan bangod kon indi naton ini paghimuon sa karon, sin-o pa ang
tan-awon sang mga kabataan sa masunod nga henerasyon? Ang kaundan sang
pagsaulog sang sining Adlaw sang Kahilwayan indi lamang para dumdumon sila,
apang agud ilugon ta sila nga wala nagapadaug sa kasubo kag kalisdanan. Ang
wagayway sa idalom sang pandemya ang gahatag sa aton sang pagbugna sa mga
pamatan-on subong. Kabay pa nga sila mangin maayo nga ehemplo sa masunond nga
panag-on.

Kaangay sang aton bandera, bisan daw ano ini kabudlay, ukon daw ano kadugay
ukon makapila ginliwat-liwat matumba, malig-on kita kag pat-od nga magpabilin nga
di-marumpag kag padayon nga magawagayway. Ang wagayway sang aton mga
baganihan sadto asta subong kag ang aton wagayway nga mga pilipino ang gahuman
sang aton bandera, kag ang aton bandera nagalaragway sang aton pagkatawo. Sa kada
pagbangon yara ang aton pagwagayway, sa kada pagwagayway yara ang pagbanaag
sang aton bandera. Ini ang sinuguran sang aton pagwagayway sa idalom sang
pandemya.