GOZOS A LA INMACULADA
CONCEPCION
Sa kahayag nga walay pagkapalong
Ikaw ang kabugason sa kaadlawon.
Maria ikaw gipanamkon
Gawas sa sala nga panulundon.
Ginganlan ka'g Putli nga Langgam
Dili Eva nga may kasal-anan,
Ginatawag ka sa ngatanan
Nga sa grasya ikaw natingban
Mao kini kanimo ang pulong
Sa sinugo nga langitnon.
Ester nga mingkupot pag-una
Sa setro sa krus ikaw ra
Kay kanimo gitunol na
Ni Asuero O diosnong Señora
Aron dili ka mahaunong
Sa balaod nga harianon.
Kay ang sala nga mabudhion
Sa adlaw wala makasud-ong
Busa wala niya ug hulaton
Nga umabot nga kaadlawon
Kay mikagyo ang gahum
Ning mananap sa kagabhion.
Sa dakung pag-angay ug pag-uyon
Nakigbagay ang sa Dios nga pulong
Kanimo malanog nga tulonggon
Nga maglilipay sa mga ulipon
Busa malinaw ug malanog
Ang inyong mga panagduyog
Ikaw ang Putli nga harina
Buluhaton ka nga Hostia
Kay ang kang Kristo nga masa
Wala gayud ing tahup Señora
Ug karon takus kang higugmaon
Gihimo kang trigo nga bililhon.
Ikaw nga tibuok matahum
Matod sa kanta nga Diosnon
Kay'ng sala wala makalandong
Kanimo Señora nga maamgon
Busa kining kantang talahuron.
Kanimo among balikbalikon.
Ang mga Angheles sa gloria
Daan nga nagtubo sa grasya
Ug ikaw Rayna nila
Mao na ba ing wala himoa?
Sa bahandi kining malahalon
Nga sa Dios kinihanglanon.
Gitudlo sa Santa Iglesya
Gimantala ug gikanta
Nga ikaw natingban sa grasya
Kutub sa pagpanamkon pa
Putli uyamut ug nagkasiga
Ikaw nga halangdon nga Rayna
Sa pagpanlaban ni Escoto
Sa pari niining misteryo
Nangamuyo usa kanimo
Sa usa ka larawan mo
Gipakita mo gilayon
Sa milagro nga walay tupong
Sa santos nga Relihiyon
Ni San Francisco kitaon
ANg kaputli nga walay ingon
Kanimo sa pagpanamkon
Kay mao ang iyang giangkon
Ang pagpanlaban nga ingon.
Sa kahayag nga walay pagkapalong
Ikaw ang kabugason sa kaadlawon.
Maria ikaw gipanamkon
Gawas sa sala nga panulundon.