Ang ikaapat na kwento ay tungkol sa masalimuot na pagmamahalan ni Ester at
Sara. Parehong babae, kapwa bisekwal , umiibig sa isa’t isa ngunit may sari- sariling pamilya. Nagsimula ang storya sa katatapos pa lamang na kasalan nina Ester at ng kanyang asawa na si Lucio. Isang Driver ng kargamento sa Egypt kaya laging wala ngunit taun-taong umuuwi sa Pilipinas. Mabibilang ang naging bakasyon nito sa bilang ng mga anak nila. Lima. Kapag nasa Egypt si Lucio, ang kasambahay ni Ester na si Sara ang tumutulong sa kanya sa pag-aasikaso ng bahay at ng kanyang mga anak. Mula pa sa lola hanggang ina at mga kapatid, si Sara ay pamilya ng mga katulong. Anong kinabukasan ang naghihintay sa isang di nakatapos ng high school at walang ibang skills kundi magsilbi sa iba? Noong bata pa si Ester ay isang mapagbirong lasenggong tiyo ang nagsabi, gusto mong malaman kung sinong mamahalin mo habang buhay? Hintayin mong bilog ang buwan at tulog na ang lahat, magdala ka ng salamin sa bubong at sa repleksyon ng buwan sa salamin ay makikita mo kung sino siya. Sa kung anong ihip ng hangin ay naniwala si Ester at ginawa niya ito. Doon sa bubong na iyon ninakaw ang puso niya. Matapos magkwento ang tiyo niya, dala-dala ang isang maliit na salamin ay nagpunta siya sa bubong ngunit walang nakitang repleksyon mula buwan hanggang sa lumipas ang maraming taon.