Huhuo Sebua Migu, 7 Maret 2021 nifa’anõ Pdt. Monaati Zebua, S.

Th
Bõrõ Huhuo : Heberai’o 5 : 7 - 10
Nitanõ ba dõdõ : Heberai’o 5 : 9

Tuho :
FAMAKAO KERISO BA WANGORIFI NIHA

Ba ngawalõ hadia zalua ba wa’aurida andre he ia famakao, folohi ba ba ngawalõ

zo’ambõ’ambõta ita ba hadia ia tanõ bõ’õnia si falukha wa’aurida itaria mangarõ ita, fatahi
ita ba tola manõ tekusi dõdõda ba aetu dõtõnafõda. Tawa’õ lõ sa’ae eluaha wa’auri da’e.
Ba hiza ba wangotahõgõ fefu da’õ no ibe’e Ia khõda dumaduma Yesu Keriso samosa si
tobali tulada ba wa’aurida he’iwisa Ia ba wanema’õ ba ba wanaõgõ fefu ngawalõ famako,
fa’afõkhõ si falukha wa’auri-Nia :

I. I’OHE WANGANDRÕ AWÕ WAKAOSA

Fangandrõ ba fakaosa si fao fangalulu da’e nifalua Yesu me ba mboto wa’aniha Ia ba
wanaõgõ ngawalõ wamakao ba fa’afõkhõ nirasoi fa’auri-Nia ba da’e ta’ila ba anehe
khõda me moi ia mangandrõ ba kabu gezemane (“Ba tobali fasõndra ia ba iforege
wangandrõ. Ba tobali hulõ mbõibõi ndro mbõbõi-Nia, atoru ba danõ” Luka 22:44).
Simanõ gõi ya’ita gofu hadia ia wa’abua noro si falukha ita ba ngawalõ wamakao ba
fa’afõkhõ da ta’otahõgõ si fao fangandrõ ba fakaosa tanõ fõna Lowalangi si fao
fangalulu.

II. YESU SO KHÕNIA FOLO’Õ

Folo’õ nifalua Yesu sambua fo’amuata ba wa mosumange Lowalangi si fao
fangide’ngide’õ, lõ khõnia famadaõ he wa’ae afõkhõ ba wanaõgõ fefu da’õ irugi
wa’amate yawa ba dõla rõfa, andrõ wa te’alawa’õ ia ibe’e Lowalangi si mane ni wa’õ ba
zura Wilifi 2 : 9 -11; 9 ndrõ gõi no ibali’õ salawa sebua ia Lowalangi, ba no ibe’e
bualania khõnia dõi andrõ, sebua moroi ba dõi bõ’õ fefu; 10 Ena’õ ba dõi Yesu andrõ
latuhi danõ dozi si so ba zorugo, awõ zi so ba guli danõ, awõ zi so barõ danõ; 11 ba
ena’õ dozi bewe manehe, wa no So’aja Yesu Keriso, ba wamolakhõmi Lowalangi ma.
 Ba da’e sambua famahaõ khõda lõ tobali fa’awuwuda ba wolo’õ hadia ia zomasi
Lowalangi ba wa’aurida na itaria falukha ita ngawalõ wamakao ba fa’afõkhõ bõrõ meno
ibe’e khõda duma’duma Yesu Keriso.

III. TOBALI ERE SEBUA IA KHÕDA

Ba wa’atobali Ere ba ndraono Gizara’eli nifili ba halõwõnia ya’ia ba wama’ema sumange
khõ Lowalangi sumange ba wangefa horõ ba he gõi ba wama’ema sumange si otarai
khõnia samosa. Fabõ’õ Yesu, tobali Ere Sebua Ia khõda no nihonogõi Lowalangi
samosa tenga ha sama’ema sumange ia hiza no tobali sumange ia samõsa ba
wangõhõli ita ba huku horõ ba ba wame’e khõda wangorifi ya’ia wa’auri si lõ aetu, si
mane zi tesura ba zura Heberai’o 4 : 14-16; 14 Ba me no so khõda gere sebua, salawa,
si no manõrõi sorugo andrõ, Yesu, Ono Lowalangi andrõ, ba bõi tabõhõli wamaduhu’õ
andrõ; 15 Tenga sa ere sebua si tebai ahakhõ tõdõ, ba wa’ambõ wa’abõlõda, zi so
khõda, no ere sebua si no mutandraigõ, ba ngawalõ hadia ia, fefu, hulõ si mane ya’ita;
ba lõ horõ; 16 Ba data’ondrasi daroma wa’ahakhõ dõdõ andrõ, bõi aiwõ ita, ena’õ
tatema wa’ahakhõ dõdõ, ba ena’õ falukha ita wa’ebua dõdõ, fanolo, na bawa moguna.

Nitanõ ba dõdõ : No mufo’ahonoa ia, ba no tobali bõrõ wangorifi ba mbanua furi ia, ba
zamondrongo li-Nia, fefu (Heberai’o 5 : 9).