CEREMONYAS SA PUERTAHAN SANG SIMBAHAN

Ang pari nga nakasuklob sang vestidura nga puti o morado kag upod ang mga ministro sang ciriales, agua bendita
(kag incensaryo), magakadto sa puertahan sang simbahan, kag dira magatamyaw sia sa mga tawo sing:

Pari: Ang grasya kag bendisyon sang Dios nga amo ang pagkabanhaw kag ang kabuhi yara sa
inyo.

Tanan: Kag yara man sa imo.

ANG PAGBENDITA KAG PAG-INCENSARYO SANG BANGKAY

Pari: Akon benditahan ining bangkay ni N sang agua bendita sa pagpahanumdom sa aton sang
iya bunyag suno sa ginsiling ni San Pablo, “Tanan kita nga nabunyagan kay Hesukristo
nahabunyagan sa Iya kamatayon. Tungod sang bunyag, paagi sa Iya kamatayon, nalubong man
kita upod sa Iya agod nga subong man si Kristo nabanhaw sa mga minatay sa kahimayaan sang
Amay, kita man magakabuhi sang bag-o nga kabuhi. Tungod kay kon nangin subong kita sa Iya
paagi sa kamatayon, kita man magaupod sa Iya paagi sa Pagkabanhaw.

ANG PAGBUTANG SA PUTI NGA PANAPTON SA IBABAW SANG LUNGON

Isa ka puti nga panapton ang sarang mabutang sa ibabaw sang lungon bilang handumanan sang panyal sang bunyag.

Pari: Sa adlaw sang iya bunyag, si N nagsuklob kay Kristo. Sa adlaw sang pag-abot ni Kristo,
kabay pa nga masukloban sia sang himaya.

Mangamuyo kita: Ginoo, pamatii ang amon mga pangamuyo kag kalooyi ang imo anak nga si N
nga Imo gintawag sa sining kinabuhi. Batuna sia sa katilingban sang Imo mga Santos, sa
ginharian sang kapawa kag paghidaet. Ginapangayo namon ini sa Imo paagi kay Kristo nga
amon Ginoo. Amen

Tanan: Amen.

ANG PROSESYON PASULOD SA SIMBAHAN

Ginapasulabi nga ang CIRIO PASCUAL pagadalhon sa sini nga prosesyon pasulod sa simbahan. Ang Leccionario,
ang Biblia o ang isa ka crucifijo sarang mabutang sa ibabaw sang lungon. Ang nasindihan nga mga kandila sarang
mabutang sa palibot sang lungon ukon pwede man nga ang CIRIO PASCUAL lamang amo ang ibutang sa ulohan o
sikwayan nayon sa lungon.

SAMTANG NAGAPROSESYON PASULOD SA SIMBAHAN (ang coro o ang mga

tawo naga-amba sang masunod:

Coro: O Ginoo, hatagi sila sing pahuway nga dayon.

Tawo: Kag pasidlaka sa ila ang kapawa nga wala sing katapusan

Coro: Sa Imo amon ginahalad ang mga ambahanon sang pagdayaw, O Dios sang Siyon.

1
Tawo: Sa Imo ang tanan nga mga panaad pagatumanon sa Jerusalem. Pamatii ang akon pag-
ampo; sa Imo ang tanan nga mga tinuga magapalapit.

Tanan: O Ginoo, hatagi sila sing pahuway nga dayon kag pasidlaka sa ila ang kapawa nga wala
sing katapusan.

CEREMONYAS SA PAGSUGOD SANG MISA (Pag-abot sa altar, magabisa ang

pari kag magapamalandong sia sa iya pulungkuan.)

Pari: Sa ngalan sang Amay, kag sang Anak, kag sang Espirito Santo

Tanan: Amen.

Pari: Ang grasya sang aton Ginoong Hesukristo, ang gugma sang Dios nga Amay kag ang
paghiupod sang Espirito Santo yara sa inyo.

Tanan: Kag yara man sa imo.

Pari: Mga utod, kilalahon naton ang aton mga sala agod mangin takos kita sa pagselebrar sing
Santos nga Misa.

Tanan: Nagakonpisar ako sa Dios nga makagagahom sang tanan, kag sa inyo mga utod, kay
nakasala ako sing matuod sa huna-huna, sa pulong, sa buhat, kag pagpatumbaya. Sa akon sala, sa
akon sala, sa akon dako matuod nga sala. Busa naga-ampo ako kay Santa Maria Birhen gihapon,
sa tanan nga angheles kag mga Santos. Kag sa inyo mga utod, ig-ampo ninyo ako sa aton
Ginoong Dios.

Pari: Kabay pa nga maluoy sa aton ang Dios nga makagagahom sang tanan, kag sa napatawad
na ang aton mga sala, tuytuyan kita Niya padulong sa kabuhi nga walay katapusan.

Tanan: Amen.

ANG KYRIE ELEISON

GINOO, MALUOY KA SA AMON, Ginoo, maluoy ka sa amon!

KRISTO, MALUOY KA SA AMON, Kristo, maluoy ka sa amon!

GINOO, MALUOY KA SA AMON, Ginoo, maluoy ka sa amon!

PANGAMUYO (Colecta)

Pari: Mangamuyo kita: O Ginoo, pamatii ang amon pangamuyo. Tungod sang pagkabanhaw
sang Imo anak gikan sa mga minatay, ginhatagan Mo kami sing pagtuo. Lig-ona ang amon

2
paglaum nga si N ang amon utod, makasambit man sang iya pagkabanhaw. Ikaw nga nagakabuhi
sa kaisahan sang Espirito Santo, sa tanan nga mga tuig sang mga katuigan.

Tanan: Amen.

LITURHIYA SANG PULONG

Nahauna nga Balasahon

Balasahon Gikan sa Libro sang Kaalam (Kaalam 3:1-9)

Ang mga kalag sang mga matarong yara sa kamot sang Dios, kag wala sing kapintas nga
makatandog sa ila. Matuod man ginabilang ang mga mata sang buang-buang nga daw patay,
ginaisip nga malaut nga kapalaran ang ila pagtaliwan, kag ginakabig nga pagkadula ang ila
paghamulag sa aton. Apang sila iya, ang mga matarong, nahamtang na sa paghidaet. Kay bisan,
sa banta sang mga tawo ginasakit sila, ang ila paglaum napun-an tapat sang pagkadimamalatyon.
Malip-ot kaayo ang panahon sang ila pagkasakit, dako gid ugaling ang mga kaayuhan nga ila
nabaton. Kay gintilawan sila sang Dios lamang agod nga masapwan Niya sila nga mga takos nga
mangin Iya. Kasubong sang bulawan sa dako nga horno, gintilawan sila sang Dios kag ginbaton
Niya sila subong isa ka himpit nga halad nga sinunog sing bug-os.

Sa pag-abot sang panahon nga inughukom, magasiga kag magalupad sila subong sang
alipalok sa katigbawan sa tunga sang mga makasasala sa pagkondenar sa ila. Pagahukman nila
ang mga katawhan kag pagagamhan ang mga kapungsoran, kag ang Ginoo magahari sa ila sa
gihapon. Ang mga tawo nga nagasalig sa Dios, makakilala sang kamatayon, kag ang mga
matutom magakabuhi upod sa Iya sa paghigugma; kay ang grasya kag ang kaluoy nagahulat sa
mga pinili Niya.

Ang Pulong sang Dios!

Tanan: Salamat sa Dios.

SALMO SA PAGSABAT (Salmo 26:1;4:7 kag 8b;9a;12-14)

(S): Nagatuo ako nga makita ko ang kaayo sang Ginoo sa duta sang nagakabuhi.

1. Ang Ginoo amo ang akon kapawa kag kaluwasan; sin-o bala ang akon kahadlukan? Ang
Ginoo naga-apin sa akon sa tanan nga katalagman; wala ako sing kahadlukan. (S)

2. Isa lamang ka butang ang akon ginapangayo sa Ginoo. Isa lamang ka butang ang akon
naluyagan. Ang pagpuyo sa balay sang Ginoo sa bug-os ko nga kabuhi, ang
pagpamalandong sang Iya kaayo, kag ang pagkalipay upod sa Iya sa sulod sang Iya
templo. (S)

3
 3. Pamatii ako, Ginoo, sa akon pagpanawag sa Imo! Kaluoyi kag sabta ako! O Ginoo,
nagapalapit ako sa Imo, indi ka magpanago sa akon! (S)

4. Nagatuo ako nga makita ko ang kaayo sang Ginoo sa duta sang mga nagakabuhi.
Magsalig sa Ginoo! Magtuo kag magkaisog! Magsalig sa Ginoo! (S)

Ikaduha nga Balasahon

Balasahon Gikan sa Libro ni San Pablo sa mga taga Roma (Roma 6:3-9)

Mga utod! Paagi sa pagbunyag tanan kita ginpahiusa kay Hesukristo. Wala bala kamo
makahibalo kon ano ang kahulugan sini? Ang pagbunyag nagapahiusa sa aton sa Iya kamatayon.
Sang ginbunyagan kita ginlubong kita kaupod kay Kristo, kag gani naghiambit kita sang Iya
kamatayon. Kag subong nga ang makatilingala nga gahom sang Dios nga Amay nga nagbanhaw
sa Iya, amo man kita magakabuhi sa bag-o nga pagkabuhi. Subong nga kita nahiusa kay Kristo sa
Iya kamatayon, subong man magakabuhi kita kaupod niya.

Nakahibalo kita nga ang aton daan nga pagkatawo ginlansang sa Krus upod Niya kag
napatay. Gani ang aton kinaugali nga makasasala patay na kag indi na magpaulipon sa sala. Kag
ang napatay nahilway sa sala. Apang kon napatay kita kaupod ni Kristo, magakabuhi man kita
kaupod Niya; nagatuo kita sini sing malig-on. Kay nakahibalo kita nga si Kristo nga nabanhaw
indi gid mapatay liwat; ang kamatayon wala na sang gahom sa Iya.

Ang Pulong sang Dios!

ALELUYA!

Pari: Aleluya!

Tanan: Aleluya!

Pari: “Ako amo ang pagkabanhaw kag ang kabuhi,” siling sang Ginoo; “kon sin-o ang nagatuo
sa Akon indi na mapatay sing dayon.”

Tanan: Aleluya!

Tanan: Pagdayaw sa Imo, O Ginoong Hesukristo, Hari sang walay katapusan nga Himaya!

EBANGHELYO
Balasahon Gikan sa Ebanghelyo Suno kay San Juan (Juan 11:17-27)

Sang pag-abot ni Hesus sa Betania, apat na ka adlaw nga nalubong si Lazaro. Ang
Betania mga tatlo ka kilometro halin sa Jerusalem. Madamo nga mga Hudiyo ang nag-abot sa
paglipay kay Marta tungod sang kamatayon sang ila utod. Sang pagkabati ni Marta nga manug-

4
abot si Hesus, naguwa sia sa pagsugata sa Iya. Si Maria nagpabilin sa balay. Nagsiling si Marta
kay Hesus, “Ginoo, kon yari ka diri, wala kuntani mapatay ang akon utod! Apang nahibaluan ko
nga bisan subong, ang Dios magahatag sa Imo sang bisan ano nga Imo pangayuon sa iya.” Si
Hesus nagsiling kay Marta, “Mabanhaw ang imo utod!” Nagsabat si Marta, “Nahibaluan ko nga
mabanhaw sia sa katapusan nga adlaw.” Si Hesus nagsiling sa iya, “Ako amo ang pagkabanhaw
kag ang kabuhi. Ang nagatuo sa Akon bisan mapatay sia, magakabuhi. Kag nagakabuhi kag
nagatuo sa Akon, indi na gid mapatay. Nagatuo ka bala sini? Nagsabat si Marta, “Huo, nagatuo
ako Ginoo nga Ikaw amo ang Kristo nga Anak sang Dios nga magakari diri sa kalibutan.

Ang Ebanghelyo sang Ginoo!

Tanan: Pagdayaw sa Imo, O Kristo!

MALIP-OT NGA HOMILIYA

PANGAMUYO SANG MGA TUMULUO

Pari: Ang Dios Amay nga makagagahom sang tanan, nagbanhaw kay Kristo nga Iyang Anak,
gikan sang mga minatay; sa dako nga paglaum mangamuyo kita sa Iya, nga Iya luwason ang
tanan nga mga tumuluo nga nagakabuhi pa kag patay na. Ang aton utod nga si N ginhatagan sang
saad sang kabuhi nga wala sing katapusan paagi sa bunyag; Ginoo paambita sia sang
paghiliugyon sang Imo mga Santos. Ang aton sabat:

Tanan: O Ginoo, pamatian Mo kami.

L: Si N nag-ambit sang tinapay sang kabuhi nga dayon nga amo ang lawas ni Kristo; O Ginoo
banhawa sia sa katapusan nga adlaw. (S)

L: Nagapangamuyo kami para sa amon mga kautoran, mga paryente, para sa tanan nga malapit
sa amon kag nagbulig sa amon; Ginoo, tagai sila sang padya sang tanan nila nga kaayuhan. (S)

L: Nagapangamuyo kami para sa tanan nga nagkalamatay nga may paglaum nga mabanhaw
liwat; batuna sila, O Ginoo, dira sa kapawa sang Imo mahal nga atubangan. (S)

L: Nagapangamuyo kami para sa tanan nga nagtambong diri karon sa paghalad sa Imo sining
sakripisyo, tungod sang amon pagtuo; Ginoo, himua nga mangin isa kami sa Imo ginharian. (S)

Pari: O Ginoo, pamatii ang amon mga pangamuyo para sa amon nagkalamatay nga mga
kautoran; patawara ang ila mga kasal-anan kag dalha sila sa kabug-usan sang Imo kaluwasan.
Ginapangayo namon ini sa Imo paagi kay Kristo nga amon Ginoo.

Tanan: Amen.

5
PROSESYON SANG OFERTORYO
Kinahanglan nga ipaathag sa mga tawo ang kahulugan sang prosesyon sang Ofertoryo.

OFERTORYO (Talamdan sang Misa)

PANGAMUYO SA PAGHALAD

Pari: O Ginoo, kaluoyi ang kalag ni N nga imo alagad, nga amon man karon ginapatungdan
sining sakripisyo sa Imo kadayawan. Nagapangamuyo kami sa Diosnon nga Pagkahalangdon nga
Imo ihatag sa iya ang pahuway nga walay katapusan paagi sa sining amon halad bilang tumbas
sang mga sala. Tungod kay Kristo nga amon Ginoo.

Tanan: Amen.

PREPASYO

Pari: Takus nga tuod kay angay gid, igo kag mapuslanon sa kaluwasan, nga sa gihapon kag sa
tanan nga duog magpasalamat kami sa Imo: O Ginoo, Santos nga Amay, Makagagahom sang
tanan kag walay katapusan nga Dios, paagi kay Kristo nga amon Ginoo.

Kay sa Iya nagsanag sa amon ang paglaum sa bulahan nga pagkabanhaw, agod yadtong mga
nagakasubo tungod sa dili malikawan nga kamatayon, malipay man sila sang panaad sang
palaabuton nga kinabuhi nga walay katapusan; kay ang kabuhi sang Imo mga tumuluo, O Ginoo,
ginabaylohan lamang, wala ginakuhaa; kag sa ubos nga maguba ining dutan-on nga puluy-an nga
umalagi ila maagom ang walay katapusan nga puluy-an sa langit.

Gani upod sa mga angheles kag mga Arcangheles, upod sa mga Trono kag mga Dominasyones,
kag upod sa tanan nga nagadayaw sa Imo sa langit, naga-amba kami sing walay untat sang imo
himaya nga nagasiling:

Tanan: Santo, Santo, Santo ang Ginoong Dios sang mga ehersito. Puno ang langit kag ang duta
sang Imo himaya. Hosanna sa kahitaasan. Dayawon ang nagakari sa ngalan sang Ginoo. Hosanna
sa kahitaasan.

CANON I, II, III (Talamdan sa Misa)

ANTIFONA SA COMUNYON

Pari: Magsidlak sa ila ang kapawa nga walay katapusan, O Ginoo, upod sa Imo mga Santos sa
gihapon, kay Ikaw maluloy-on gid. Ginoo, hatagi sila sing kapahuwayan nga dayon, kag

6
magsidlak sa ila ang kapawa nga walay katapusan upod sa Imo mga Santos sa gihapon kay ikaw
maluloy-on gid.

PANGAMUYO SA TAPOS ANG PAGKALAWAT

Pari: Mangamuyo kita: O Makagagahom nga Dios, kabay pa nga ining sakripisyo magtinlo sang
kalag sang Imo alagad nga si N nga nagtaliwan sa sining kalibutan karon. Itugot nga sa ubos na
sia matinloan sang iya kasal-anan, iya madangat ang kapatawaran kag ang kapahuwayan nga
dayon. Tungod kay Kristo nga amon Ginoo.

Tanan: Amen.

KATAPUSAN NGA KOMENDASYON KAG PAALAM

Ang pari upod sa mga ministro nga nagadala sang agua bendita (kag incensaryo) magatindog sa luyo sang lungon.

Pari: Kita nga mga Kristiyano nagatuo kag nagalaum kay Hesukristo. Karon aton pagadal-on
sang may pagtahod ang bangkay sang aton utod nga si N sa lulubngan sang iya tawhanon nga
kahimtangan nga dili pa himpit. Gani, sa dako nga pagsalig mangamuyo kita sa Dios nga
nagahatag sing kabuhi sa tanan nga Iya banhawon ining mamalatyon nga lawas sa himpit nga
kahimtangan sang tawo kag sa pag-ambit sa katilingban sang mga santos. Magpakiluoy kita sa
Dios nga Iya nga hukman si N sing maloloy-on kag patawaron sang tanan niya nga mga sala.
Kabay pa nga si Kristo ang maayo nga manugbantay, magdul-ong sa walay sablag kay N sa iya
matuod nga puluy-an sa pag-agom sang paghidaet upod sa Dios nga aton Amay kag kabay pa
nga sia mag-isip sa mga bulahan sa gihapon sa atubang sang Hari nga walay katapusan.

Malip-ot nga pagpamalandong, pagkatapos sini sarang mapahanugutan nga ang isa sang mga himata sang
nagtaliwan maghambal sing pila ka tinaga sa pagpasalamat sa tanan nga nagabuylog sa ila kalisud.

ANG PAGBENDITA KAG PAG-INCENSO SA BANGKAY SAMTANG GINAAMBA

ANG MADASON NGA RESPONSORIO

Pari: Mga Santos sang Dios, tabangi ninyo si N, mga Angheles sang Ginoo, kari kamo sa
pagsugat sa Iya.

Tanan: Batuna ninyo ang iya kalag kag ipaatubang ninyo sia sa Dios nga labing mataas.

Pari: Batunon ka unta ni Kristo nga nagtawag sa imo kag ang mga angheles magdul-ong sa imo
sa luyo ni Abraham.

Tanan: Batuna ninyo ang iya kalag kag ipaatubang ninyo sia sa Dios nga labing mataas.

Pari: Ginoo, hatagi sia sang kapahuwayan nga dayon, kag sidlakan sia sing kapawa sa gihapon.

Tanan: Batuna ninyo ang iya kalag kag ipaatubang ninyo sia sa Dios nga labing mataas.

7
PANGAMUYO
Kon indi maamba ang responsorio ginapasulabi nga ang madason nga pangamuyo pagapangadion sang tanan upod
sa pari

Pari: O Amay, sa Imo mga kamot amon ginatugyan ang amon utod nga si N. Nagasalig kami
nga upod sa tanan nga namatay kay Kristo, pagabanhawon sia sa katapusan nga adlaw, agod
magkabuhi upod kay Kristo sa gihapon. Nagapasalamat kami sa Imo tungod sang tanan nga mga
kaayuhan nga Imo ginhatag sa iya sa sining kinabuhi subong tanda sang Imo Amaynon nga
kaayo sa amon tanan kag timaan sang paghiupod sa mga Santos dira kay Hesukristo. O Ginoo,
pamatii ang amon pangamuyo. Batuna sa paraiso ang amon utod nga si N kag buligi kami sa
pagpakig-unong sa isa kag isa paagi sa pagtuo nga Kristiyano nga nagapalig-on sa tawo tubtob
nga kami tanan magkilita-ay dira kay Kristo sa pag-upod sa Imo, O Amay sa langit, kag sa amon
utod sa gihapon. Ginapangayo namon ini paagi kay Kristo nga amon Ginoo.

Tanan: Amen.

HILIKUTON SA PAGTAPOS

Pari: Ang Ginoo yara sa inyo.

Tanan: Kag yara man sa imo.

Pari: Bendisyonan kamo sang Dios nga makakagahom sang tanan, Amay, Anak, kag Espirito
Santo.

Tanan: Amen

Pari:
A. Lakat kamo sa paghidaet tapos na ang Misa
B. Lakat kamo sa paghidaet ni Kristo
C. Lakat kamo sa paghidaet sa paghigugma kag pag-alagad sa Ginoo

Tanan: Salamat sa Dios.