O N E P E A C E Y O U T H C H O I R HAN-AY SA PAG-AMPO ALANG SA MGA NANGAMATAY

Leader 1: Ang kahayag ni Cristo mudan-ag unta ngadto sa atong mga minahal nga mga
nangamatay. Karon, ato sugdan ang kasaulogan sa usa aka awit: Pahulay nga dayon
---Kantahon ang Pahulay nga dayon---
Leader 1: (Filipos 3:21) Ilisan ni Cristo ang atong mga lawas nga may kamatayon sama sa iyaha
pinaagi sa gahom nga gigamit niya sa pagmando sa tanan.
All: Sa ngalan sa Amahan ug sa Anak ug sa Espiritu Santo. Amen.
Leader 1: Ang Amahan sa kaluoy, ang Dios sa tanang kahupayan, maanaa unta kanatong tanan.
All: Amen
Leader 1: Mag-ampo kita.
Makagagahom ug walay kinutoban nga Dios, tinubdan sa kaluoy ug pasaylo, mipadala ikaw sa
imong Anak nganhi sa kalibutan, dili aron sa pagsilot kon dili aron sa pagluwas niini.
Pamatia ang among mga pag-ampo alang sa imong mga alagad, ang among katigulangan,
kaubanan, kahigalaan, ug ang mga nanaghimo kanamo ug kaayohan, ilabi na si ---Ngalan sa
Namatay--- nga karon nagpahulay na. Ipadangat kanila ang kahingpitan sa kinabuhi nga imong
gisaad ngadto sa mga magtuo kanimo. Kini among gipangayo pinaagi ni Cristo, among Ginoo.
All: Amen.
Leader 1: Maglingkod ang tanan.

MGA PAGBASA

Reader 1: Pagbasa kinutlo gikan sa Basahon ni Sirac:

Ang Ginoo naghatag sa mga amahan ug gahom ibabaw sa ilang mga anak ug gihatagan ang mga
anak sa katungdanan sa pagtahod sa ilang mga inahan. Kon tahuron ninyo ang inyong amahan,
makabayad kamo sa inyong mga sala, ug kon inyong pasidunggan ang inyong inahan, nagtigom
kamo ug dakong bahandi. Kon tahuron ninyo ang inyong amahan, usa ka adlaw niana ang
inyong kaugalingong mga anak maglipay kaninyo; ang Ginoo magpatalinghog sa inyong mga
pag-ampo. Kon tahuron ninyo ang Ginoo pinaagi sa pagpasidungog sa inyong amahan ug sa
paglipay sa inyong inahan, magpuyo kamo ug taas nga kinabuhi. 

Tahora ang inyong mga ginikanan ingon nga kamo ilang ulipon. Pasidunggi ang inyong amahan
diha sa tanan ninyong buhaton ug isulti, aron madawat ninyo ang iyang panalangin. Sa
paghatag sa mga ginikanan sa ilang panalangin, naghatag sila sa kusog sa panimalay sa ilang
mga anak.

Anak, atimana ang imong amahan inigkatigulang na niya; ayaw siya hatagig kaguol samtang
buhi pa siya. Kaloy-i siya bisan kon ango-angohon na siya; ayaw siya tamaya tungod lang kay
ikaw malig-on ug maayo pag lawas. Ang Ginoo dili malimot sa mga kaayo nga imong ipakita
ngadto sa imong amahan; magtabang kini kanimo aron hibayran ang imong mga kasal-anan. 

Reader 1: Ang pulong sa Ginoo. All: Salamat sa Dios.

O N E P E A C E Y O U T H C H O I R HAN-AY SA PAG-AMPO ALANG SA MGA NANGAMATAY

Reader 2: Salmo Responsorio, ang atong tubag

“Dayegon ta karon ang mga tawo nga Diosnon nga gipasidunggan sa Ginoo” (2x).

Reader 2: Dayegon ta kining diosnon nga mga tawo/ kansang matarong nga mga binuhatan
wala gayod hikalimti./ Ang ilang kabantog magpadayon ngadto sa ilang mga kaliwat,/ ug mao
kini ang ilang sulundon. (Tubag)

Reader 2: Ang ilang mga kaliwat magpadayon sa pag-amping sa kasabotan,/ ug sa kanunay

maghimo niini,/ tungod sa gihimo sa ilang mga katigulangan./ Ang laray sa ilang banay
magpadayon hangtod sa hangtod,/ ug ang ilang kabantog dili gayod mapala. (Tubag)

Reader 2: Ang ilang mga lawas gibutang sa lubnganan,/ apan ang ilang kabantog magpadayon
hangtod sa kahangtoran./ Ang mga nasod mag-asoy mahitungod sa kaalam niining mga
tawhana/ug ang katawhan sa Dios magdayeg kanila./ (Tubag 2x)

Reader 3: Pagbasa kinutlo gikan sa Sulat ni San Pablo ngadto sa taga Colosas:

Kamo ang katawhan sa Dios; gihigugma kamo niya ug gipili aron maiyaha. Busa kinahanglan nga
magmaluluy-on kamo, magmahigugmaon, magmapaubsanon, magmaaghop ug
magmapailubon. Pagtinabangay ug pagpinasayloay kamo kon duna kamoy mulo batok kang
bisan kinsa kaninyo. Pagpinasayloay kamo ingon nga gipasaylo kamo sa Ginoo. Ug idugang
niining tanan ang paghigugma nga maoy magbugkos sa tanan ngadto sa hingpit nga panaghiusa.

Paharia sa inyong mga kasingkasing ang kalinaw nga gikan ni Cristo, kay alang niining kalinawa
gitawag kamo sa Dios aron mahiusa usab kamo diha sa usa ka lawas, ug magmapasalamaton
kamo. Papuy-a sa inyong kasingkasing ang mensahe ni Cristo, uban sa tanang kabahandianon
niini. 

Pagtinudloay ug pagpahimangnoay kamo uban sa tanang kaalam. Pag-awit kamog mga salmo
ug balaang mga alawiton; awiti ninyo ang Dios uban sa pasalamat diha sa inyong mga
kasingkasing. Busa bisag unsa ang inyong buhaton o isulti, himoa sa ngalan sa Ginoong Jesus,
uban sa pagpasalamat sa Dios nga Amahan pinaagi kaniya.

Mga asawa, sunda ug tahora ang inyong bana kay mao kini ang angay ninyong buhaton ingon
nga mga Cristohanon; Mga bana, higugmaa ang inyong asawa ug ayaw silag daugdaoga; Mga
anak, pagmasinugtanon kamo kanunay sa inyong mga ginikanan kay mao kini ang
makapahimuot sa Dios; Mga ginikanan, ayaw palagota ang inyong mga anak kay tingali unyag
mawad-an silag kadasig. 

Reader 3: Ang pulong sa Ginoo. All: Salamat sa Dios.

---Kantahon ang Aleluya, Lamdag Ka---

O N E P E A C E Y O U T H C H O I R HAN-AY SA PAG-AMPO ALANG SA MGA NANGAMATAY

Reader 4: Kinutlo gikan sa Ebanghelyo sumala ni San Mateo 7:24-27

Unya miingon si Jesus kanila, "Busa ang tanan nga nakadungog sa akong gisulti ug nagtuman
niini mahisama sa usa ka tawo nga maalamon nga nagtukod sa iyang balay diha sa bato. Sa
dihang mibundak ang ulan, ug mibaha ang mga suba, ug ang hangin mihapak ug mikusokuso
niadtong balaya, wala kini matumba kay natukod man diha sa bato.

Apan ang tanan nga nakadungog sa akong gisulti ug dili magtuman niini, mahisama sa usa ka
tawong buangbuang nga nagtukod sa iyang balay diha sa balas. Sa dihang mibundak ang ulan,
ug mibaha ang mga suba, ug ang hangin mihapak ug mikusokuso niadtong balaya, natumba kini
ug nagun-ob.”

Reader 4: Ang Ebanghelyo sa Ginoo. All: Daygon Ikaw, O Cristo.

Reader 4: Karon, maminaw ta og mamalandong sa istorya kabahin sa namatay, gikan sa usa ka

membro sa pamilya.
---Pamalandungon na Istorya---

---Kantahon ang Sinong Makapaghihiwalay---

Reader 5: Manindog ang tanan.

Reader 5: Nagatuo kita nga si Cristo mao ang Pagkabanhaw ug ang Kinabuhi. Uban sa pagsalig
modangop kita kaniya, diha sa atong tubag: Ginoo nga nabanhaw, pamati-a kami. (2x)

Reader 5: Cristo, Anak sa Dios nga buhi, banhawa ang among minahal nga nangamatay na ug
agaka sila ngadto sa kahiusahan sa mga santos, kami nag-ampo (Tubag)

Reader 5: Cristo, among Manunubos, tungod sa imong gugma ug kaluoy dawata nganha sa
imong himaya ang among mga nangamatay nga katigulangan, kaubanan, kahigalaan, ug ang
mga nagtabang kanamo, kami nag-ampo:

Reader 5: Cristo, among Manunubos, namatay ikaw sa Krus alang kanamo, dad-a ang tanan nga
nanghikatulog uban sa timaan sa pagtuo nganha sa gingharian sa kahayag ug kalinaw, kami nag-
ampo:

Reader 5: Cristo, maghuhopay niadtong nanagbangotan, hatagi kami sa paglaum nga usa ka
adlaw niana, mahiusa kami pag-usab uban niadtong among mga gimahal, kami nag-ampo

---Ang pipila ka gutling nga kahilom aron paghandom---

O N E P E A C E Y O U T H C H O I R HAN-AY SA PAG-AMPO ALANG SA MGA NANGAMATAY

Reader 5: Ginoong Jesucristo, sa Imong kabubut-on Imong gitugyan ang Imong kaugalingon
ngadto sa kamatayon, aron ang tanan maluwas ug makalabang gikan sa kamatayon ngadto sa
kinabuhi.
Ipadangat kanamo nga ang among katigulangan, kaubanan, kahigalaan, ug ang mga nagtabang
kanamo, maglipay dinha sa pagtan-aw sa Imong himaya, Ikaw nga nagapuyo ug nagahari
hangtod sa kahangtoran.

All: Amen

Reader 5: Ug karon, atong awiton ang gitudlo sa atong Ginoong Jesucristo.

---Kantahon ang Amahan Namo---

PAGTAPOS

Leader 2: Mahigugmaon nga Amahan, Imo kaming gilowas pinaagi sa kamatyon ug

pagkabanhaw sa Imong Anak. Pamatia kining among mga pag-ampo alang sa among
katigolangan, kaubanan, kahigalaan, ug sa mga nagtabang kanamo.

Sa Imong gugma ug kaluoy, i-apil sila sa talaan sa Imong mga santos. Sa among kabahin himoa
nga magmatinud-anon kami sa mga maayong hiyas ug mithi nga ilang gitudlo kanamo. Kini
among gipangayo pinaagi ni Cristo, among Ginoo.

All: Amen.

Leader 2: Pahulay nga dayon ihatag ni ---Ngalan sa Namatay---, O Ginoo.

All: Ug ang kahayag nga walay pagkapalong magdan-ag kaniya.

Leader 2: Mo pahulay unta siya sa kalinaw.

All: Amen

Leader 2: Nga ang iyang kalag ug ang mga kalag sa tanan nga mga matuuhon, tungod sa kaluoy
sa Dios, mamahulay unta sa kalinaw.

All: Amen

Leader 2: Ug manalangin unta kanato ang Dios nga makagagahom sa tanan, ang Amahan, ang
Anak, ug ang Espiritu Santo.

All: Amen.

---Kantahon ang “Be not afraid”---