Ang Buwan ng Wika ay ginugunita tuwing sasapit ang buwan ng Agosto taon-taon. Layunin nang selebrasyong ito ay alalahanin ang kasaysayan, kilalanin, panatilihin at paunlarin ang wikang Filipino bilang isang mabisang instrumento sa pagkakakilanlan ng mga mamamayang Pilipino. Ginagawa rin ang pagdiriwang na ito bilang pagsaludo, paggalang, at pagmamahal sa bansang Pilipinas. Ngayong taong 2021, ang tema ng Buwan ng Wikang Filipino ay “Filipino at mga Katutubong Wika sa Dekolonisasyon ng Pag-iisip ng mga Pilipino.” Isang selebrasyon ang inihanda ng Kolehiyo ng Edukasyon sa Unibersidad ng Foundation upang ipagdiwang ang pampinid na palatuntunan ng Buwan ng Wika sa taong ito. Napakasayang tunghayan ang presentasyong ginawa nila sapagkat sa paraang nito naipapakita natin ang ating pagmamahal at pagpapahalaga sa ating Wika–ang wikang Filipino. Dahil sa wikang ito, tayo ay nagkakabuklod buklod bilang isang Pilipino. Kaya ay nararapat lamang na ipagdiwang ang buwan ng wika upang ito’y pagyamanin at panatiling buhay sa isip at puso ng bawat mga Pilipino nang sa ganon ay mananatili itong isang buong parte ng ating pagkatao at nang sa gayo’y ito ay mabigyan ng labis na kahalagahan n gating mga kapwa Pilipino ngayon hanggang sa susunod pang mg henerasyong Pilipino na pinagkaisa ng wikang ito.
Batay sa kasabihan ni Pilosopo Tasyo na ibinahagi din ng panauhing pandangal, “Nasa
ating mga kamay ang pagiging buhay o patay ng ating wika” dahil tayo ang gumagamit nito, nasa atin ang kapangyarihang makapagbubuhay dito. Nakasalalay sa atin kung magiging malaya o alipin ang ating wika. Kung ating tunghayan ngayon, parang hindi tayo malaya sapagkat ang mga kaisipan pa rin ng ibang tao ay nakakulong pa sa impluwensya ng mga banyagang sumakop sa ating bansa. Minsan ang iba, ay nakalimutan na ang paggamit ng ating pambansang wika. Ngunit, hindi dapat dahil ang ating wika ay siyang salamin ng ating pagkakakilanlan bilang mga Pilipino. Maganda rin naman ang pag-aralan natin ang ibang wika o kultura ng ibang tao, ngunit huwag lamang sana nating talikuran o kalimutan ang ating sariling wika, dahil kung wala ng gagamit nitong wika natin, tuluyan na itong mamamatay at kung ito’y patay na, hindi na ito maituturi pang wikang malaya. Lagi sana nating tandaan na ang wika natin at iba pang wika na ginagamit ay pantay-pantay at bigay sa atin ng may likha. Kung wala ito, hindi tayo magkakaisa, magkakaintindihan at hindi din tayo malaya. At dahil bigay lamang ito sa atin, sana’y bigyan ito ng importansya at nawa’y gamitin sa tama at maayos na paraan para sa pagtuturo at pagkatuto upang ang wika natin ay maging maunlad, mayaman at mapayabong sapagkat ito ay mananatiling sandata at salamin ng ating paglaya bilang isang bansa.