17/10/2021 Aizawl 18:30 Hrs

REGIONAL NEWS

HEADLINES:-

1. Party hrang hrang ten Tuirial assembly bial by-election a campaign an kalpui danah
Election Commission of India (ECI) inkaihhruaina siam bawhchhiatna awm ni a sawi chu
MPF-in ECI hnenah thlen a tum.
2. Myanmar ram, a bikin Mizoram dep Chin state-ah Myanmar sipaite leh tualchhung
mi ralthuam kengte an inkah deuhreng avangin Mizoramah raltlan an lo luhbelh leh mek.
3. Pawn chhuak theilo te hnenah hridanna pek mek a ni a, kokim taka pek tum a ni.
4. India ramah Covid-19 hridanna dose vaibelchhe 97 leh nuai 65 chuang pek chhuah a
ni tawh.
<><><>
QUIZ

Hei hi All India Radio, Aizawl a ni. Chanchin Thar kan ngaihthlak hmain
Amrit Mahotsav Quiz result kan puang leh dawn a. Nizanah khan kan zawhna
chu ‘Lalnu Ropuiliani kha British sipaite khan khawi jail-ah nge an tan tir?”
tih a ni a, an tan tirna chu Chittagong Jail-ah a ni. Mi engemawzat atangin
chhanna kan dawng a, chung zinga chhanna dik rawn thawn hmasabertu chu
Ngurthansanga, kum 25, Dungtlangkhua a ni. Ngurthansanga, kan lawmpui
takmeuh che a, chhangtu dang zawng zawngte chungah pawh lawmthu kan sawi
a.
Quiz hi tunkar Inrinni zandar 6.30-ah kannei leh ang a, min telpui leh vek
turin kan sawm che u a ni.
<><><>
COVID ADVISORY
India chuan COVID-19 vaccine dose vaibelchhe 100 a pe tling lek lek tawh a. Vaccine
chak taka pek anih theih nana thawktu doctor, nurse leh midangte All India Radio chuan
zahna chibai a buk che u a. Hetih rual hian ngaithlatute hrileng a la reh loh avangin fimkhur
chhunzawm zel turin kan ngen che u a, Vaccine la kim lo tepawh la ngei turin kan ngen che
u a, midang pawh la ve tura sawm turin kan ngen a che u.
Sakhaw hunpui lo thleng turah hian hmaituamna vuah, midang hnaih loh, kut leh hmai
tihfaite lo ngaipawimawh zel ang che u.
Covid-19 kaihhnawiha hriatduh nei chuan rampum huap helpline number - 01123978046 leh
1075 bakah, Mizoram tan 102 te hi biakpawh theih reng a ni e.
<><><>
BY-POLL
Party hrang hrang ten Tuirial assembly bial by-election a campaign an kal pui danah
Election Commission of India (ECI) inkaihhruaina siambawhchhiatna awm ni a an sawi chu
MPF chuan ECI hnena thlen a tum.
MPF hian nimin khan thuchhuah siamin TV Special Report leh Video Clip hrang
hrang atanga a lan danin sum leh therhlo hmanga vote zawn te, buh inphurhsak te, a
thlawna Ration buhfai sem te leh lei laihna khawl hmanga lei laih sakte leh ruaithehte a
awm niin an hria tih an tarlang a. An hmalakna bul tan na'n Mizoram election department-
ah inthlan danphung bawhchhiatna hi ziakin an thlen phawt dawn niin an sawi a. Hetiang hi
ECI Model Code of Conduct in a phalloh (corrupt practice) leh party te nena thawhhona
thuthlung kalh a nih avangin MPF Gen.Hqrs chuan thuneitute hnenah hma la turin an thlen
tawh a ni. MPF Gen. Hqrs chuan hetiang hmanga vote zawng lo tur leh thianghlim taka
campaign kal pui turin Candidate te leh party worker te an ngen thu an thuchhuahah hian
an tarlang bawk.
MPF chuan mipuite pawh Candidate te tihautak lo zawng leh Thawhhona thuthlu ng
pel zawnga beisei neilo turin an ngen a. Bial chhung khawtina MPF Local Forum leh
Constituency Forum te pawh theihtawp chhuaha Thawhhona thuthlung hre renga vil tur leh
mitmei reng turin an ngen thu an thuchhuah-ah hian an tarlang a ni.
 MPF hruaitute chuan Social media mai bakah khaw hrang hrang atangin (ECI) in
Model Code of Conduct a siam bawhchhe zawnga hmalakna thlalakte pawh an dawng tih a
sawi a, party tin te chuan thawhhona thuthlung an bawh chhe deuh vek tawh niin a sawi
bawk. BJP chu hetiang lamah sawi la kai lo leh complain an la dawn loh awmchhun a ni.
Hetihlai hian Tuirial by-election lo awm tura helai biala Bru vote nei mi 663, Tripura
a inbengbel tawhte chungchanga political party hrang hrang leh pawl hrang hrangte ngenna
chungchangah Election Commission chuan thu leh hla a la rawn nei lova. Election
department hotute chuan tunkar chhung hian ECI hian an thutlukna an rawn hriattir tawh
ngei a an rin thu an sawi. Pawl hrang hrangte hian Tuirial biala Bru vote nei la awmte
hming hi electoral roll aţanga paih an duh thu hi election department kaltlangin ECI-ah an
thlen a. YMA lam chuan vote an thlak dawn a nih pawhin an pem thlak hma a an vote
neihna khua a vote thlak an remtih laiin Tripura a an awmna hmun aţanga vote an thlak an
remti lo a ni.
<><><>
PARTIAL LOCKDOWN
Mizoram sorkarin a kalpui mek inthlahdul deuh chunga inkharkhip chu vawiin
aţanga October ni 30 zanlai thleng pawhsei leh a ni.
Mizoram chhunga COVID-I9 darh dan leh mipui zinga hri kai tharawm dan thlirin
inkaihhruaina kalpui mek leh hri kaite enkawl kawnga hma laknachhunzawm zel hi chu
State Disaster Marragement Authority chuan ţha ni a a hriat avangin inkaihhruaina hman
lai mek angin October ni 30 thlenga kal turin thupek a chhuah a. Hetih rual hian Aizawl
district bawrhsap chuan zantin zan dar 8 leh zinglam dar 4 inkarah pawn chhuah a khap zui
zel bawk a. Lirthei intlanchhawk dan tur chu Senior SP (Traffic) thupek tihchhuah anga
kalpui zel tur a ni ang.
<><><>
REFUGEES
Myanmar ram, a bikin Mizoram dep Chin state a Myanmar sipaite leh tualchhung mi
ralthuam kengte an inkah deuh reng avangin Mizoramah raltlan an lo luh belh leh mek.
Champhai district-a Tuipuiral Group YMA president Pu MC Lalramenga sawi danin
tun hnai ni 4 chhung vel khan East Tuipui assembly bial chhungah raltlan 187 an lo luh belh
a. Vaphai khuaah mi 110, Farkawn-ah mi 50, Vanzau khuaah mi 13, Bungzungah mi 6 leh
Khuangthingah mi 4 te an ni a. Heti hian tun dinhmunah East Tuipui assembly biala khaw
21-ah raltlan 2,625 an awm mek a. Farkawn khuaah awm tam berin 1,050 an awm a,
Vaphai-ah 592 awmin Khawbungah 239 an awm bawk a, a tam ber hi Chin state a
Thantlang district mi an ni.
Zirtawpni khan Tuibûal khua a Myanmar sipai camp-ah silai a puak a, tlai lamah
bomb a puak nasa hle bawk a. Silai leh bomb puak ri hi Vaphai khua aţang pawhin a hriat
phak a. Chanchin kimchang erawh chu hriat theih a ni rih lo. Hnahthial district lamah pawh
raltlan hi an luh belh a. Nimin khan mi 6 Thingsai khuaah an rawn lut a, Thawhlehni khan
mi 11 an rawn lut bawk. Ngharchhip khuaah mi 13 chu nimin khan an rawn lut a, anni hi
Hakha khawpui ami an ni.
Chin state-ah hian tualchhung mi ralthuam keng (Chinland Defense Force – CDF) leh
kum 30 chuang rammu tawh Chin National Army (CNA) te ţangrual chuan sipai hmun
engemawzat la tawhin sipai kal vel an lambun fo a. Tun thla chawhma lam khan sipai tam
tham tak chu Hakha, Tedim, Falam leh Thantlang lamah an lut hlawm a. Nilaini khan Rialti
khua chu sipaite hian an hal a, Baptist biakin pawh a kang ral vek a, a tukah Thlanrawn
khua an hal leh bawk.
<><><>
VACCINATION
Pawn chhuak thei lote hnena hri danna pek mek a ni a, kokim taka pek tum a ni.
State Immunization Officer, Dr. Lalzawmi chuan pawn chhuak thei lote an chenna inah
kalchilhin hri danna pek ţan an nih thu a sawi a, Mizoram pum tuam chhuak tura hma an
lak thu a sawi bawk. District zawng zawnga an la kalpui loh thu sawiin district panga
aţanga report an dawn tawh chinah hetiang mi hi mi 761 an awmthu a sawi. District dang
atangin chanchin nghah mek a ni a ti. Hri danna pekna hmun pan thei lo, pawnchhuak thei
lote pek tan an nih lai hian chutiang mite zawn chhuah hna kalpui nghal a ni a, kokim taka
zawn chhuaha hridanna pek vek tum a nih thu a sawi.
Dr. Lalzawmi chuan hri danna la duh lote finchhuaha, an lak duh theihna tura puitu tur
‘mobiliser’-te ţhahnem tak an laktawh thu a sawi a, chung mite chu zirirna pawh pek an nih
tawh thu a sawi. Hridanna hi sakhuana leh thil dang vanga la duh lo an awm niin a sawi a,
dose khatna pawh la duh miah lo an awm rualin, dose khatna la tawh, a bikima la leh duh lo
a, hel leh ta te pawh an awm tih a sawi. Chutianga hridanna la duh lote chu VLTF/LLTF
kaltlanga zawng chhuakin, ‘mobiliser’-te hmalaknain hridanna dawntir ngei an tum thu a
sawi a ni
Covid-19 hridanna hi nimin thleng khan dose nuai 11, sing 8, sang 1 leh 005 pek chhuah a ni
tawh a. Hri danna dose hmasa dawng tawh hi mi nuai 6, sing 9, leh 197 an ni. Kum 2011
chhiarpui-ah khan Mizoramah hian kum 18 chin chunglam mi nuai 7, sing 7, sang 5 leh 106
awm anga chhutin za zela point 89 .05 chuan hri danna dose hmasa hi an la tawh tihna a ni.
Hri danna la kim tawh hi mi nuai 4, sing 9, leh 808 an awm tawh a, hri danna la kim tawh hi
za zela 63 point 32 an tling tawh a ni.
<><><>
CHURCHES
Mizoram sawrkarin Covid hripui leng kara inkhawm theihna dan inkaihhruaina a
siamthar leh aţanga Pathianni vawi lina thlengin Lunglei khawpui chhung veng hrang
hrangah inkhawm an la awm mumal lo.
Sawrkarin Biak in leng zatve emaw mi 200 aia tamlo emaw Pathianni-ah inkhawm a phal
leh hnuin Lunglei khawpui chhung bik veng 20-ah chuan mipuite hri laka him zawkna beisei
vangin tualchhung kohhran tam ber an la inkhawm lo a, Vawiin thlenga veng hrang hranga
tualchhung kohhran inkhawm lo an la tamna chhan chu tualchhung kohhran Committee
duh anga inkhawm rihlo te an awm laiin, VLTF te ngenna avanga inkhawm rihlo an awm
bawk a, hetihlai hian Biak In hmunhma 4C atan hman vanga la inkhawm theilo pawh an
awm bawk.
Hetiang a nihlai hian Tualchhung Kohhran vawiin lama inkhawm loh te zingah loh theihloh
avanga hun pawimawh Baptisma leh Sacrament bakah hun pawimawh bik hmang erawh an
awm nual thung a, Hetihrual hian Hnahthial Peniel BCM biakinah vawiin khan Burma
raltlan mi 10 vel chu kohhran member nghet lo atan bialtu Pastor in a lawm lut a ni.
<><><>
COVID VACCINE
Ram pumah tun thlengin Covid-19 hridanna dose vbch 97 leh nuai 65 chuang
pekchhuah a ni tawh a, Union Health Ministry sawi danin, darkar 24 kalta
chhung khan hridanna dose nuai 41 leh sing 2 chuang pekchhuah a ni.
Darkar 24 kalta chhung vek khan hri kai thar 14,146 an awm a, hei hi ni 229
chhunga hri kai hmuhchhuah thar tlem berni a ni. Tun dinhmunah hri kai dam
leh hi za zelah 98.10 a ni a, nikum March thla hnua a sanber tum a tling a ni.
<><><>
CHRISTIANMISSIO NERIES KIDNAPPED IN HAITI
Haiti ram khawpui, Port-au-Princeah American Kristian missionary leh an
chhungte, an vaiin mi 17, misual pawlin rubovin an hreng mek a, an zingah
hian naupangte pawh an tel a ni.
News agency pakhat sawidanin missionary-te hi fahrah enkawlna hmun pakhat
an chhuahsan laia rukbo an ni a, hemi chungchangah hian US sorkar atangin
thuchiang zawk nghah mek a ni.
Haiti ramah hian inrukbo a lar hle a, kumin Jan atanga Sept. ni 30 thleng khan
mi 600 chuang rukbo an ni a, kumkalta hemi hun chhung vek khan mi 231
rukbo an ni.
Haiti hi North America khawmualpuia ram retheiber pawl a ni a, kumin July
thlaa an President thah anih hnuah leh Aug thlaa lirnghing natak an tawrh
hnuah tharumthawha chetna a hluar chho nasa hle a ni.
<><><>